تعالوا ابييكم كلكم ضروري تكونون معاي لي الأخير !!

انا وصلت لمرحلة من التنرفز اللي ما اقدر اسكت اكثر عن االي قاعد يصير !!

فـ كتبت هالموضوع والله الشاهد على نيتي .. و هالمنتدى ثاني مكان اكتبه فيه

طولوا بالكم و خلكم معاي من البداية لي الأخير .. و يا ريت تركزون معاي شنو الهدف من هالموضوع كله !!

بعد اللي شفته بالمنتدى امس و بره المنتدى اللي قاعد يصير من سوالف كلكم عارفينها قررت اكتب هالكلام ..

ليش قاعده تزيد نسبة الطائفية و التفرقه عندنا ؟

" لكم دينكم و لي ديني" .. ليش ما تمشون على كلام الله سبحانه ؟

كل واحد له دينه و عليه باللي يؤمن فيه و ماله شغل بدين و مذهب غيره

هالشغله بين الانسان و ربه .. محد له حق يتدخل و لا اكراه في الدين !!

يعني الحين العبادات اللي تمارسونها تكون بينكم و بين ربكم .. و المفروض ما تأثر بعلاقاتكم مع غيركم

يعني مثلا

بالنسبة للمذهب الشيعي : يسوون مآتم و نعي للامام الحسين عليه السلام بيوم عاشورا و القاء الخطب خلال شهر محرم
بالنسبة للمذهب السني : يصومون و يحتفلون بيوم عاشورا حمدا لله تعالى لانه نجى الله فيه موسى وبني اسرائيل من عدوهم

يعني كل مذهب و له اعتقاده و ممارساته الخاصه .. ليش ما نسوي اللي نعتقده مع احترام اعتقاد غيرنا !!

لو كل منا احترم اعتقادات المذهب الثاني جان احنا بخير و انمحت الطائفية من الكويت ..

بعدين محد له حق يقول هذا صح و هذا غلط و الله يهديه !! الله يهدي الكل ان شاء الله

اللي نحس انه صح نسويه و الله سبحانه بـــــــــــــــس اهو اللي يحاسب

لا يصير في حقد داخلكم على بعض عشان مذهب و أصل! وكل واحد يألف له حديث او موضوع و ألقاب عن الثاني

ولا تسمحون حق اي شخص نفسه ضعيفه انه يفرق بينا ولا تعطونا فرصة لا تسمعون له خلوا قلوبكم صافية

وانتوا اساسا لا تتناقشون بهالمواضيع لان ما راح توصلون لحل ..كل واحد و معتقداته ما تقدرون تغيرونها !!

مــســتــحــيــل ! النقاش بهالموضوع عقييييييييييييم .. كل اللي بـ توصلون له .. خلافااات و مشاعر كراهية

لا تخلون الفتنه تدش بينا و نقسم اهل الكويت على اساس حضر و بدو و سنه و شيعه ..!!

ترا في عوايل بالبيت الواحد سنه و شيعه و حضر بدو و عايشين ببيت واحد !! و ما بينهم مشاكل من هالناحية بالعكس عايشين بخير

انتوا اعتبروا الكويت بيت واحد و كلنا عايشين فيه !!

قبل مع انه الناس ما كانت كلها دارسه و مثقفه ما كان في شي اسمه سنه و شيعه بالكويت لان قلوبهم صـــــــــــافية

الحين كلنا دارسين و اغلبنا خريجين جامعات و فاهمين المفروض نكون جيل وااعي و ارقى من الحجي اللي نسمعه

لمن كنا صغار بدت السالفه كـ تلميحات بس .. الحين صار الوضع اشكرا و الكل يغلط عالثاني ..

ترا اذا تماديتوا -لا سمح الله – هالشغله ممكن توصل حق حرب اهلية الله لا يقول

بنات عارفين شنو يعني حرب أهليه ؟ يعني أهــــــــــــــــــــــــــل يتذابحون !!

و هذي عمرها ما صارت بالكويت !! وان شاء ما تصير ابدا ..

بلييز عفيه فكروا عدل و ثمنوا الكلمه قبل لا تقولونها !! العالم ايام الغزو كان يحسدنا شلون كنا ايد وحده ..

والحين قاعدين نشمت العدو فينا و حتى جيرانا ودول الغرب ..

أمااانه بنات لمن تشوفون مجلة اميركية .. و لقيتوا تقرير امريكي يقول " إشارات لتوتر سني-شيعي بالكويت" !!

شنو شعوركم ؟ و شنو تتوقعون الافكار اللي ببالهم عنا ؟

مسلمين و متخلفين ..!؟

خلونا من الغرب ..

شنو شعوركم لمن تشوفون هيد لاين بجريده او مجله عربــــــــــيـــة او خليـــجـــيــة يقول

" حروب الكويت تشهد توحد أبنائها سنة وشيعة في وجه العدو"

" لافتة طيبة تعكس تلاحم أهل الكويت سنتها وشيعتها"

ما تستانسون ؟ ما تحسون بفخر انكم كويتيين ؟؟

و لمن تشوفون هالـ هيد لاينز :

" التصريحات الطائفية.. الكويت لا تتحمل مزيداً من الفتن"

"دق ناقوس الطائفية في الكويت"

" ان التأزيم والفتن الطائفيه سوف تلوث سمعه الكويت"

.. سمعة الكويت بنات..ترضونها على ديرتكم ؟؟

الحين شنو شعوركم ؟ منو الأهم ؟ الكويييييييييت قبل كل شي يا بنااااااااااات

شوفوا كلمة صاحب السمو بشهر 9 اللي طاف :..

https://www.aawsat.com/details.asp?se…36106&feature=

================================================== ===========

و اهني بشهر 8 اللي طاف :

كما قال سمو الأمير لم نكن في السابق نسمع سنة وشيعة اتذكر جيدا كنا نسكن في منطقة الدسمة وكنا خليطاً من ابناء قبيلة العوازم والرشايدة والحضر شيعة وسنة وفي اوقات المنافسة ومباريات كرة القدم او في اوقات المشاغبة والهوشات لا يصطف العوازم والرشايدة ضد الحضر سنة وشيعة ولا يصطف السنة كقبائل وحضر ضد الشيعة او العكس كنا خليطاً كل فريج فيه السني والشيعي والعازمي والرشيدي وغيرهم نفزع لبعض حسب الربع والصداقة لا حسب التصنيف القبلي او الطائفي. وفي عاشوراء كنا جميعا نغيب عن المدرسة ونشرب الشربت ونأكل العيش واللحم ولم نتحدث في مجالسنا الخاصة او العامة بحديث طائفية الافك او قبلية التعصب. اذاً ماذا حدث ولماذا اليوم هذا التصنيف القبلي والطائفي ؟!
================================================== ===========

حطوا نفسكم مكانه .. بذمتكم تشوفون اللي يصير بديرتكم بين أهــــــــــــــــــل و مو عارفين شالحل غير انكم تنصحون .. ما تتضايقون ؟؟

الله يرحمه بابا جابر .. لو للحين عايش جان مات مرة ثانيه من اللي يشوفه الحين ..
جذي يصير بالأهـــل لـي راااح الأبو .. ؟!!!!

خلونا قلب واحد .. امنية اتمنى تتحقق بالسنه اليديده
صفوا النيى و صفوا قلوبكم .. 2024 نبيها غير
ترا بالنهاية كلنا عيال الكويت .. و عيال آدم