|
|
السلام عليكم يا كويتيات … و مشكورين كل الي سالو عني في غيابي
سامحوني بنات على التأخير في دكر تجربتي في الشفط بس كنت تعبانننننننه حييييل يا بنات الايام الي فاتت و نفسيتي صفففففففر من ورا العملية حتى كنت ادخل المنتدى بس مالي خلق اكتب شي ….. اليوم الحمدالله شفت نفسي احسن عاد قلت بدكر لكم تجربتي علشان تستفيدون منها
أولا ….. بعد الاستشارة و الاستخارة قررت اسوي عملية الشفط عند دكتورة شيرين ابو الفتوح الي بعلاج كلينك …. و سويت التحاليل و قالتلي كل شي اوكي و حطت لي موعد للعملية يوم الخميس 26-5-2011الساعة عشر و نص و قالولي لازم اكون بالمستشفى قبل العملية باربع ساعات .
ثانيا … يوم الاربعا بالليل دقت علي ريهام سكرتيرة دكتورة شيرين و قالت ان عمليتي صارت الساعه 9 الصبحو لازم اجي مبجر و ممكن تجين الاربعا بعد الساعه 11 المستشفى ما يحسبون لج الليله …قلتلها لا ابي انام هالليله مع عيالي و ان شاء الفجر انا عندكم
من الليل مسكتني الضيقة و الخوف بس اتعود من ابيلس خذت عيالي الافنيوز و مشيتهم و غديتهم و تشريت لهم ملابس اقول حق نفسي اشفيني جني اودعهم اسم الله عليهم
اجدب لو اقول اني نمت هالليله و ميته قهر ان علي الدورة و مو قادرة اصلي و لا اقرا قرآن قبل العملية علشان ادعي ربي يردني لعيالي 
سقت سيارتي لمستشفى السلام و دخلت الريسبشن و سويت اجراءات الدخول و خدو مني المستشفى 500 دينار تحت الحساب وصعدت غرفتي مع العامل …. جتني السستر خدت مني التحاليل و قاست وزني و ضغطي و قالت نبي نسوي تحليل دم و خدت عينه دم
بعدها بساعه جابتلي لبس العمليات سميت باسم الله و لبسته و على الساعه 8 و شوي جات الدكتورة شيرين قالت لي احنا اتفقنا شنو نسوي انا هنيه @@ قلت لها دكتورة من صجج قالت انا امس كنت مشغولة و نسيت اشوف ملفج قبل العملية الحين ادق على رهام تشوف الملف …… انا بصراحه حسيت بضيقه و خوف المهم صورت جسمي من جدام و من ورا و خططت على الاماكن الي ابي اشفطها انا قلت لها ابي اشفط بطني و الخواصر و شوي من الظهر و الفخود كاملة و الزنود ….. قالت بس كانه وايد الي انتي تبين تشفطينه قلت لها دكتورة هدا الي اتفقنا عليه من اول موعد و انتي قلتي اوكي و انا دفعت فلوسه … قالت ان شاء ما يصير الا الخير راحت و قالت موعد عمليتي بعد ساعتين … دقيت على امي اطمنها و حطيت راسي و نمت من التعبت فتحت عيوني و لا الساعه 11 
…. استغربت ان للحين ما نزلوني العمليات …. سالت السستر قالت العمليات زحمه و ما نزلوني الا الساعه 12الا ربع لاني سمعت أدان الظهر و انا يدخلوني غرفه العمليات
تخيلو يا بنات و انا توني داخله غرفه العمليات و بعد ما جت دكتورة التخدير تسالني الاسئلة المعتادة جتني دكتورة شيرين و قالت لي شوفي جدامنا الحين شيئين انتي نسبه دمك نازلة
(11.7) يا ان نسويا لعملية على مرحلتين نشفط الحين جزء و بعد كم شهر تحسنين نسبه دمج و نسوي العملية مرة ثانية و نشيل باقي الدهون او ان نشيل كمية الدهون الي نبي نشيلها بس راح نضطر نحطلج دم لان راح تفقدين دم وايد …. تخيلوو بنات احساسي حزتها … قلت لها دكتورة الحللين صعبين اشلون اسوي العملية مره ثانية و شلون احط نفسي بوضع احتاج نقل دم …. قالت تبين رايي خلينا نشيل كل الدهون و نحطلج ادا احتجتي دم و عملية وحده و تخلصين بدال لا تسويين عملية ثانية …. قلت لها دكتورة انتي ادرا بشغلج بس انا الي ابيه اني ارد لعيالي بسلامه … قالت ان شاء الله الله كريم
بلشت عمليتي تقريبا الساعه وحده الظهر تخيلو بنات متى قعدت من البنج …. الساعه 10 و نص باليل ….. و الم فضيع بكل جسمي و تفكيري كله مع امي احاتيها شنو قاعده تسوي الحين … اصرخ و اطلب من السستر تعطيني مسكن تقولي ما اقدر انتي ماخدة اربع ابر مسكن و ما اقدر اعطيج بعد طبعا الالم يا بنات شي لا يوصف بكل مكان بجسمي
الساعه 11 صعدوني غرفتي لقيت امي شبه منهارة و معاها عيالي يبجون هم من اربع العصر بالمستشفى و ناطريني اطلع من غرفه العمليات و تقول كل ما اسال احد عنج يقول للحين ما خلصت العملية و ما ندري شنو فيج …. انا قايلة لامي العملية بسيطه و كلها ساعتين و اطلع ان شاء الله
طبعا الي صار معاي ان دمي نزلللللللللللللللللل وايد و حطولي جيس دم و خلوني بالملاحظة 6 ساعات
اسمحولي بنات بكره اكمل لكم الي صار معاي لان تعبت الحين
دام دمج نازل جان كنسلتي العمليه لييي يوم الثاني
يمكن من الصيااااام قبل العمليه
هونيها وتهون ان شالله ايام تمر وترتاحين
يلغينا شصار بعدها
ان شاء الله النتايج تكون حلوة
مادري ليش
حاشتني ضيقة
خل اصلي واتعوذ من ابليس
الله يحفظج لعيالج وانشاء الله النتيجه تسرج
وتنسيج الالم كله
الصرااحه خرعتيني لان ناويه اسوي شفط وشد على شهر 1 ان شاء الله
وربي يجزيج كل خير على نقل تجربتج يت بوقتها كنت وايد محتاجه تجارب في الشفط
كان الله في عونج
الله يخليج لعيالج يارب
كملي خوفتيني من الدكتوره
الحين بكمل لكم اشصار
أنا قبل لا اسوي العملية قريت تجارب بنات واااااايد مسوينها من قبل و كلهم قالو ان فيها الم بس الم الشفط اقل من الم الشد و انا ابي اسوي بس شفط علشان جديه تشجعت اني اسويها ….. صدقوني بنات انا من النوع الي يتحمل الالم و ماني دلوعه كلش و مار علي انواع عمليات و آلام من قبل (( قيصريات و مرارة و التهاب بالكلى حادث سيارة و كسور و عملية تجميل نسائية )) وقلت مستحيل الشفط بيكون اصعب منهم …. بس و الله يا بنات الالم الي حسيته الم بعمري ما حسيت فيه من قبل …. الم ما اقدر اقول وينه لانه بكل جسمي ….
أنا ما اقول هالكلام علشان اخرعكم من الشفط بس علشان الي تبي تسويها تكون عندها فكرة عن الي بيحصل لان العملية كللللش مو سهلة
المهم ….. ما ادري شلون مرت علي الليلة بس المسكن اكيد هو الي خلاها تعدي علي و الليله كلها ما كنت قادرة احرك حتى اصبع … كانو ملبسيني الكورسيهات من العملية و رجولي حاطين عليها الضباب الي يمنع الجلطات و رافعينهم و ايديني كل ايد على مخدة علشان يرفعونها الصبح جات السستر و شالت بربيش البول عزكم الله و قالت لي بعد ساعه لازم تنزلين من السرير و تروحين الحمام ….. لما شالته لاحظت ان فيه بربيش ثاني قاعد يطلع منه سائل لونه احمر … استغربت لاني الي اعرفه ان البربيش ينحط بعد عمليات الشد و الشفط ما ينحطلها بربيش بس بعدين لما كلمت الدكتورة قالت هي حطته لانها اضطرت تحقني بكمية سوائل كبيرة علشان تمنع النزيف و لازم هالبربيش يظل كم يوم علشان يصرف السوائل الي في بطني لا يصير تجمع لها
على الساعه سبع جوني السسترات و قوموني من السرير و رحت الحمام عزكم الله و هناك دخت و بغيت اطيح عليهم ردوني بسرعه للسرير ارتحت شوي و رديت قمت للحمام …. هناك فهمت الوضع شوي انا لابسة كورسيهين واحد من تحت الصدر لي تحت الركب و الثاني نفس الجاكيت ضاب الايدين مع الظهر والاثنين غرقانين دم …. فضت السستر بربيش الي موصل في بطني و علمتني شلون افضيه لان بطلع فيه للبيت و غسلت و حسيت ردت فيني الروح شوي
جابولي ريوق و قالولي لازم آكل علشان آخد الدوا …. و فعلا اكلت و اخدت دواي الي كان عبارة عن مضاد حيوي و حبوب حديد و فيتامين سي مع حبوب الي تصرف السوائل من الجسم
طبعا الدكتورة ما جتني لان كان يوم جمعه بس على الساعه عشر كلمت الدكتورة بالتلفون و قلت لها ابي اطلع قالت لي مو مشكلة بس لازم تجيني بكرة العياده و عطتني شوي تعليمات
جوني خواتي يا عمري و طلعوني من المستشفى على ويل شير لاني ما اقدر امشي
البربيش ظل لحد يوم الاثنين يعني اربع ايام و فعلا هو بروحه عدااااااب
يوم الاثنين بعد ما شلت البربيش ر جعت البيت و فصخت الكورسيه طبعا هدي اول مره افصخه بعد العملية علشان اتسبح لان كنت خلااااص مو قادرة اتحمل نفسي بعد اكثر
و هنيه صج الصدمه …… كل مكان تحت الكورسيهات لونه ازرق على بنفسجي ….. رضات رضات بكل جسمي و الله الي يشوفني يقول هدي دايس عليها نساف شايل طابوق و عرفت شنو سبب هالالم هدا طبعا بالاضافه للورم الي بكل مكان
طبعا بعد ما تسبحت قعدت اعد الغرز الي بجسمي
الايدين 6 غرز
البطن 7 غرز
الظهر 4 غرز
الرجلين 4 غرز
مسحت عليهم بالكحول و حطيت على كل غرزه لزاق … طبعا هدي تعليمات الدكتورة
الغرز يا بنات صغاااااار حدهم و اتوقع بس تشيلهم ما راح يبين مكانهم … بس الي يعور الكدمات و الورم الدكتورة قالت الكدمات حدها 10 ايام بعد العملية بس الورم يبيله بحدود الشهرين علشان يروح مره وحده
و قالت لي بعد اسبوعين راح ابدأ اشوف نتيجه …. بس بعد شهرين تكون النتيجه النهائية …. و قالت لي اكلي اناناس و تحركي شوي شوي علشان تتصرف السوائل بسرعه
و ان شاء الله ما يضيع تعبي و لا يضيع الام الي احسه على الفاضي و اشوف نتيجه حلوة