التفنن بتدبير المنزل && يالسنعات تفضلو حياكم معاي شوي

قوه بنات ..~

بعيد عن المشاكل الزوجيه وبعيد عن عوار الراس خلونا بدال لا نشغل انفسنا بالمشاكل والتعب ورفعة الضغط كل يوم وابو الشباب مو سائل فينا
نشغل انفسنا بشغلات احلى واحسن وطبعا منو فينا ماتحب تسمع كلمة اسمالله عليها فلانه راعية بيت سنعه والله يهني زوجها فيها او عزالله رجلها عرف من يختار ويازينها زيناه شاطره وربة بيت سنعه وهابة ريح ..~

طبعا انا اللي اقصده من كلامي هذا انه لابد فيه بنات سنعات يحبون يسوون كل شي بيدهم ويضيفون لشغلهم وبيتهم لمساتهم الخاصه << وياحسرة قلبي على البنات اللي كل شغلهم الخدامه تسويه حتى ملابس الداخليه ملوت زوجها الخدامه تغسلهم مادري شخلت

المهم بنات ابي اتكلم عن نقطتين بالنسبه لي مهمين بحكم اني صغييييره حيل وتوني متزوجه وكلش ما أأيد شغل الخدم وبنفس الوقت ودي اكون هابة ريح وسنعه وكبيره بعين زوجي واكيد رح اكون جذي بفضل الله ثم خبراتكم وتجاربكم بالحياة وطبعا اكيد كل بنت مرت بنفس شعوري واحساسي لمن كانت صغيره < اتكلم عن اللي كل شغل بيتها بيدها مو بيد الخدآمه

ماعلينا ادري قرقت عليكم وآآجد بس اللي ابي اوصله وهو مضمون الموضوع تدبير المنزل
بنات انا من النوع اللي زوجي يقولي الحياة سهله لا تصعبينها وكل شي عنده ايزي يعني يقولي ملابسي وملابسج نقطهم عالمصبغه والاكل مره خفايف من ايدج ومرات من مطعم والشغل نجيب كل 3 ايام بالاسبوع خدآآمه تنظف وكان الله غفور رحيم طبعا ادري انه ودكم ازواجكم جذي لانه مالكم خلق تسوون شي بس بناااات انا مو جذذذي فهمووووووووووووني
احب اسوي شغل بيتي كله بيدي احب اضيف لمسااتي بملابس زوجي واكله وترتيب بيتنا مابي اطبق اللي يقوووله وعشان اثبت له اني سنعه ابي كل شي اسويه يكون بروفيشنال وحاااولت مرات وفشلت الله يخليكم الحين مالي غيركم من بعد الله ابي خبراتكم وتجااربكم

بقولكم الاشياء اللي سويتها و نوعا ما غلطت فيها وانتو قولو لي شسوي

اولا بخصوص الغسيل عندي غساله فول اتوماتيك ..~
لمن اجي اغسل دشاديش زوجي طبعا احط ماي وصابون عادي مال غسيل الملابس واحذف الدشاديش واسكر الغساله لمن اخلص غسيل اطلعهم احطهم باالنشافه بعدين اروح اكويهم وبالكبت علطوول ..
وغير جذي ماعرف اللي ابيه منكم شلون اعطر ملابس زوجي بوقت الغسيل وبعد الغسيل شنو احسن الصوابين حق الغسيل وتكون معطره وحلوه يعني ريحة عود وبخور وهالسوالف
وبعد ما اكويهم شحط فيهم قبل لا اعلقهم بالكبت ابي زوجي لمن يمسك دشدااشته يلقاها بيضه تلق للللق وريحتها رووعه فيدووني الله يخليكم ونفس الشي الغتر شلون اغسلهم ابيهم يهبلون وبيييض ويلقون لق وريحتهم تدوخ الراس من حلاتها

ثانيا بخصوص الكوي عندي كوايه عاديه وكوايه بخآر ..~

طبعا الدشاديش اكويهم اول شي بالكوايه البخار بعدين اروح حق الكوايه العاديه ويكون فيه كسره بالدشداشه تحت الزرارات اجفسها واكويها عشان يصير شكله حلو ومرتب
بس الغتر مصصصيييييييييييبه مااعرف اكويهم علموني شسوي وزوجي مستهين فيني يقولي اصلا ماتعرفين تكوينهم وانا اوديهم مصبغه احسن وانا ودي اثبت له العكس ودايما اشوفه لمن يجيبهم من المصبغه مرتبين حيل وعند النسفه او مادري شيسمونها المهم تكون وااقفه وحلوه يالله عطووني من خبراتكم وعلموني شلون طريقة كوي الغتر

ثالثا بخصوص الملابس الداخليه ..~

ماعرف شسوي محتاره يعني اغسلهم بنفس صابون اللي اغسل فيهم الدشاديش ولا شنو بالضبط ولمن اجي اغسلهم اقطهم مع الدشاديش مره وحده ولا شنو ؟؟ وشلون اعطرهم ومرات على ايام قبل ببيت اهلي الاحظ انه فنيلات اخواني من كثر الغسيل تقلب صفرا شسوي عشان ملابس زوجي ماتقلب صفرا مع الغسيل يعني شنو احط مع صابون الغسيل عشان احافظ على بياضهم

يالله عفيه بنااات ساعدوني وفيدوووني لاني اكبر وحده من خواتي وامي ميته يعني كلش ماعندي احد يعلمني بهالسوالف ومو حلوه اسأل خالتي ام زوجي شنو بتقول عني !! احرآج طبعا

ناطره ردودكم العطره وياليت اللي ماتعرف ترفع الموضوع بذكر الله ..~

شوفي حبيبتي بالنسبه لدشاديش الزوج يفضل المصبغه عشان لا يصيرون صفر وبالمصبغه يكوونهم عدل خلي الدشاديش بالمصبغه اول ما تييج الدشداشه مكويه وخالصه رشي عليها عطر مبخر تلقينه باغلب محلات العطور مثل اجمل وامل الكويت والقرشي انا اخذ مال عبد المحسن اللي بجمعيه المنصوريه اخذ نوعين

ارشهم من بعيد على الملابس وبعدين احطهم بالكبت واييب المبخر وحط بخور واحطه بالكبت واسكر وقبل لا وتحترق البخوره اطلع المبخر واكرر عمليه البخور يوم وترك

واذا انتي حابه تغسليهم بالبيت قبل لا ادخلينهم مرحلة التنشيف رشي عليهم العطورات بس من بعيد وخليهم ينشفون عالمنشر عشان لا تبقع الدشداشه ويصير مكان العطر لون اصفر لان التنشيف بكون الهوا حار
حق البياض سواء للملابس الداخليه او المكسر او الدلاغلات استعملي نقطه شويت مع فينيش للالوان وافضل صابون بالنسبه لي برسيل

المرحله الثانيه حطي ماي مع كومفورت وبعدين مرحلة التعطير اللي قتلج عنها

وحبيبتي بالنسبه للغترهلازم تستعملين نشا اول شي تضربينها بشكل مربه بعدين تجفسينها بشكل مثلث وترشين نشا عالخط وتضربينها وشرط تخلين الخط سيدا

الملابس الداخليه اذا بيضا حطيهم مع الملابس البيضا وغسليهم مثل ما قتلج ولما تخلصين اكويهم وحطيهم بالكبت

انشالله اكون قدرت افيدج موفقه حبيبتي

ونسيت اقولج للملابس البيضه لازم يكون الماي حار ولازم تكونين موصله فلتر للماي اللي تستخدمينه للغساله

اقول لا تفتحين على نفسج باب

مشكوره بتبوتا حبيبتي على مرورج مع اني ما فهمت سالفة السهم الاخضر لول

مذهله 78 حبيبتي انتي امواااااااااااااااااااااااااه على راسج تستاهلين البوسه يالغاليه سنعه سنعه وعسى الله يدومها عليج يااارب وعسى الله يوفقج مع زوجج ويسعدج وياه ويعمي عينه عن كل بنات حوا ولا يشوف غيرج

بس انا عندي غساله فول اتوماتيك تنشيف وتشطيف وكل شي يعني ليش اخليه يغسلهم بالمصبغه وانا موجوده بصراحه ابي اسوي كل شي بيدي مابي احد يمسك ملابس زوجي بس ياليت تعلميني عالطريقه بالضبط فديتج

وفي شغلات مافهمتها من كلامج السموحه يالغاليه بسوي لج اقتباس عليهم وياليت توضحين اكثر

خلاص حبيبتي ناطره اقتباساتج ومشكوره عالدعوه الحلوه ولج مثلها

بس ياقلبي هالنقاط اللي قلتيهم ما فهمتهم عدل وضحي اكثر يالغلا ولا خلا ولا عدم مشكوره يالغاليه على نصايحج وعلى مرورج الروووعه

ما فهمت شنو المقصد من هالكلمه بالضبط
شاكرة لج مرورج يالغاليه

النقطه الاولى اقصد فيها انج عقب ما تغسلين الملابس وينظفون من الصابون راح تخلين الغساله تنشفهم صح هني لا تنشفينهم بالغساله طلعيهم ورشي عليهم العطورات ونشريهم خليهم ينشفون بهالواء الطلق بعيد عن النشافه مالت الغساله الاوتوماتيك عشان الملابس لا تبقع ويصير مكان العطر بقع صفرا

النقطه الثانيه في علبه زرقا لونها كحلي وعليها صورة دشداشه مكتوب عليها ( شويت ) لون السائل كحلي مثل الحبر هذا تحطين منه نقطه للملابس البيضا يخلي بياضها ناصع ويلق لق

النقطه الثالثه في نشا للغتر علبه ستيل وفوق رش عليه صورة مره لابسه قميص وماسكه اوتي ومبتسمه اسمه ( مريتو )

اول شي تضربين الغتره بشكلها المربع عادي بعدين تجفسينها بشكل مثلث نفس حجابات قبل وتاخذين النشا وترشينه على الخط الامامي مال النسفه وتكوينها وطوني حريصه ان الخط يكون مستقيم وما فيه اي تكسر او تجفس

النقطه الاخيره اقصد فيها ان ماله داعي تفصلين كل شي بروح خلي الابيض مع الابيض والملون مع الملون والغوامج مثل ( الاسود والكحلي والجنزات مع بعض )

بعدين عطريهم واكويهم وحطيهم بالكبت

انشالله تكون وضحت الصوره

تسلمين الغاليه مذهله 78 وحطيت لج اقتباس على اللي مو فاهمته

تسلميييييييييييييييييييييييين ياقلبي ايه الحين فهمت عليج
تعالي النشاء والصابون اللي قلتي عليه وين احصلهم بيني وبينج مالي خلق فراره ابي مكان معين اروح اخذهم واطلع
وعسى الله يوفقج ويسعدج وينولج كل ما تتمنين ويخليلج زوجج ولا يحرمج منه وعسى الله يحرم ايدج النار انشاءالله

شفته حبيبتي و انشالله كلامي يكون مفهوم

حبيبتي بكل الجمعيات والافرع والبقالات تلقينهم واذا ما عرفتي بس سألي مال الجمعيه عند المنظفات قوليله ابي نشا مال الغتر وابي شويت واهو يعطيج ياهم