|
|
السلام عليكم … قبل لا أخطي أي خطوة …قريت و سألت واستشرت ربعي و أهلي.. بس اليوم قررت
أسألكم أنتو لأنكم أخبر مني بهالشي ….وحابة أخذ رأيكم لآني ودي أعرف …هل هذي أعراض توحد ؟؟…
علشان الله لا يقوله على الأقل أقدر أتلاحق على ولدي…
محمد مولود ب 30/01/2007 عندي بنتين وولد أكبر منه …الولادة طبيعية بس مع ابرة ظهر(أول مرة)
ملاحظاتي عليه : ما يعرف أسمه ..ما يعرف اخوانه ..و لا يعرف أساميهم … لمن أناديه يطنش..لمن أسأله عنهم مايلتفت
ما يقط الوصخ بالزبالة ( تكرمون ) اذا طلبت منه يسكر الباب ما يفهم ..أبسط الأمور مايعرفها و لايتجاوب معاي فيها
طبعا أنا وديته حق المستوصف ومنها عطاني تحويل حق الطب التطوري و تحويل ثاني حق مستوصف
السالمية عشان أفحص اذنه ..و لقى فيها الكتور شمع وعطاني قطرة للتنظيف ..بس طبعا مو اهوه اللي بيشخص
انا قلت له و أنا أدري ان اهوه يسمع و الدليل على جذي انه ..
يلتفت للصوت المفاجيء أو العالي أو التلفون اذا رن بس ما يشيله ولا يقول ألو..واذا ناديته باسمه مستحيل
يرد ولا يلتفت حتى لو صرخت وان أنادي باسمه ..واذا انا طالعه و اتصلت و طلبت اني أكلمه يمسك السماعة
و يخربط بكلام بالمرة مومفهوم جنه طلاسم و يحذف السماعة ..حتى الطلعة و السيارة ما يعرفها ولا يطالب فيها
دكتور السمع قال مادام عنده أخوان و خوات أكبر منه و عنده خادمة خاصة فيه لازم و المفروض أنه يتكلم
أفضل من جذي …. أنا للآمانة لاهية عنه بحكم و ظيفتي من 6:30 الصبح أطلع الدوام ليمن 4 يالله
أدخل البيت … بس قبل على وقت خواته و أخوه لمن كانو كبره وايد أفضل منه بجميع المقاييس أصلا كنت
لاهيه عنهم أكثر ومومجابلتهم و أشتغل اكثر وشفتين صبح و عصر وكلهم و لله الحمد طبيعيين …
يعني انا متواجدة ألحين أكثر من أول اللي خلاني أشك ..انه ليمن صار عمره سنة ولازال…
ما يصفق ..ما يلعب اللعبات البسيطة بالايد
Close Open مايسوي بايده باي … ما يكركر نفس البيبيات .. اهوه يبتسم و يقول بعض الكلمات البسيطة
بابا/ ماما / باي /هاي / أبي / قود نايت Go Come بس هالكلمات و طبعا حسب المزاج يقولها ..
ما يعرف يطلب ماي ولا الحفاضة و لا اسامي الباباي بالتلفزيون بس اذا يبي شي يحن ( أه أ ه)و يسحبني من ايدي
ولايعرف الأرقام ولا الحروف ولاشي مع ان الكل بالبيت يكلمه ويلعب معاه …
حاليا أنا ما أشتغل و باذن الله بتفرغ له .. فالخطوة القادمة باذن الله بحط له موعد بالطب
التطوري بس الصراحة ما فيني صبر مواعيد بالأشهر …تنصحوني بالخاص للتشخيص على اِلأقل..؟؟
و المشكلة الأبو رافض رفض نهائي و بدون ما أناقشه مستحيل (حده عسر ) اني أدخله حضانه ..
و كذلك مو متقبل شكوكي بوضع محمد ..دايما يقول عادي
ومافيه شي وكل اليهال جذي … الحمدلله انا وحده مؤمنة والله خير حافظ .. بس الاحتياط واجب وما أعتقد
اللي ذكرته عنه شي طبيعي …. ياليت تنصحوني …والله يحفظ لكم عيالكم ويشافيهم و يعافيهم و يفرحكم فيهم
يارب…ومشكورين مقدما
بس بسالك يحب يجلس لحاله في زاويه
يسوي حركه معينه بستمرار يعني يهز راسه بستمرار
اذ تالم او حس بوجع مايصيح
لما تكلمينه يطنشك ومايعطيك وجه
اذا جاع ماياشر على الاكل الي يبيه
احسن من انك تنتظرين
لا ما يطلب أكل بس اذا شافه يحاول يمد ايده ( ما يعبر بالكلام بس بالتصرف )
يحس بألم ؟؟؟مرة حاولت انزله بالدرج و بغى يطيح لأنه ما يعرف للسلم يمشي بدون ما يشوف دربهحتى لوجدامه بحر
ما يعرف و يمكن لأن احنا ما عودناه ع السلم فمرة بغى يطيح على راسه جان أمسكه من ايده حيل خفت يطيح
قال أه .. عور قلبي أول مرة يتألم ( الظاهر حيل عورته بالغلط )
من اللي قريته بالمنتديات يحب يطالع التلفزيون بالساعات و يصرخ اذا أحد مر جدامه لكن
ما يغني ولا يدندنو لا يقول اسم الشخصيات بارني تلي تبيز… سكوت أوخرابيط بالكلام الغير مفهوم أو صراخ
طبعا لما نكلمه يطنش ولا كأن في أحد يكلمه أو يسأله أو يناديه يكمل بدربه ماله شغل بأحد…
طفلك لما يجيك احد في البيت يخاف
مره انا رايحه المعهدانا وصديقتي
داخلنا الفصل الولد لما اغبلنا خاف وسكت حتى المدرسه تحاول تعلمه بس مافي فايده احس كل شي درسته فعلا ينطبق عليه كان كلا يهز براسه جالس في الكوخ صج حالته تقطع القلب
التحاليل الطبية والفحوصات بالتطوري نتايجهم تقرر فإنتي نطري النتايج والتحاليل وكل ماصار العلاج مبجر كل ماكان التطور أحسن وأفضل والحضانة على حسب حالته إختاري الحضانة بعد ما تطلع النتايج علشان تختارين المكان المناسب.
بس أنصحج نصيحة أخت لا تنطرين الطب التطوري مواعيدهم بالأشهر والسنين بس عالفاضي !!
دكاترتهم فشله من أول 5 دقايق يشخص الحالة ويصدمج ويحطمج بعد بس يبي الفكة !!
وديه خاص أحسنلج
انا ام عشت مع طفل توحدي ميه بالميه كانت كل اعراض التوحد فيه
من عمره سنتين لكن ولله الحمد نع التدخل المبكر والتاهيل اصبح من احسن ما يكون وصار بطء تعلم وممكن يدرس ويتعلم ويلعب وكل شي اهم شي تكونين معاه
طبعا ما نتمنى لج ولولدج الا كل خيروسلامه اعرضيه على التطوري بسرعه حاولي بواسطه
وفيهم والله دكاتره كفاءه وفي بكل مكان تلقين الزين والشين
واذا تبين بعد الخاص البنات وايد مجربين دكاتره
الله المستعان وربي يريح قلبج ويشرح صدرج ويطمنج على وليدج اللهم آمييييييييين
وبشرينه وبلغينه باي تطورات لان هذا ولدنا بعد
صبحكم الله بالخير…
ما قصرتوا خواتي على ردودكم و أسأ الله يشافي و يعافي عيالكم و يفرحك فيهم يارب
أنا اتخذت قراري بعد الا تكال على الله سبحانه و بوديه حق فاطة كلنك للتشخيص
و كذلك دريم سنتر بس ياليت أحد يكتب لي العنوان
أنا أعرف انه بالخالدية بس ماعندي رقمهم ولا عنوانهم …وجزاكم الله كل خير و بميزان أعمالكم يارب
رقمهم 24827123
والحمدلله الذي لايحمد على مكروه سواه
اليوم وديت محمد حق دريم سنتر … بفضل من رب العالمين أكو موعد تكنسل و صار من نصيبنا
طبعا حبيت بس أبلغكم بالتطورات لأنكم من شجعني و نصحني جزاكم الله خير و فرحكم بعيالكم يارب
طبعا قال لي الكلام اللي متوقعه اني أسعمه
( تأخر بالنطق/ عدم التواصل بالنظر بالعيون / سهولة التشويش و انقطاع التركيز/
و هايبر أكتف ) و الحمدلله على كل حال… و كلش ما نصحني أوديه الطب التطوري
لأنه أولا بعده صغبر وما يتكلم وثانيا محتاج سشنز بصورة مكثفه ومحتاج تركيز من ناحيتيأنا أكثر
طبعا قال لي لازم ما تشيلين هم الصراخ و البجي و العناد كملي و استمري و كلميه يعني الرك
أغلبه علي ….ما نصحني أدخله حضانة حاليا لأن بالصيف الحضانات لوبة و اهوه ما يتكلم
فما راح يسفتفيد لازم يتابعه أول و يحسن و يطور من نطقه و تركيزه تالي اذا باذن الله تحسن يقرر
نوديه حضانة أولأ ..عموما ..الحمدلله أولا و أخرا … و يارب شافي و عافي ولدي و عيالكم يارب
و فرحنا فيهم و بسلامتهم و بلغنا فيهم يارب….مشكورين عل المساندة والنصيحة مرة ثانية جزاكم الله كل خير
الله يشافيه ويبلغج فيه استبشري وتفااائلي واقري عليه قرآن
واتكلي على الله سبحانه قل لن يصيبنا الا ماكتب الله لناا..