معاناتي متكرره ادعولي بالفرج

اول شي شلونكم؟ تذكروني؟كتبت هالموضوع قبل 9 شهور
https://www.q8yat.net/showthread.php?t=592634

مادري شلون ابدا الموضوع؟ مافي شي يديد بس ودي افضفض ماعندي احد اقوله الي بقلبي. معاناتي للحين متكرره وماتغير شي غير ان المشاكل كل مالها وتزيد بيني وبين اهلي

الي ماقروا موضوعي بقولكم وبحاول اختصر. انا عمري 24 سنه, تزوجت وانا 19 واحد اكبر مني بتقريبا 13 سنه والحين انا مطلقه صارلي فوق ال3 سنين. عندي ولد عمره 3 سنين.. للحين ادرس بالمعهد.. ابوولدي ولامره سال عن ولده ولا حتى يشوفه صارلنا فوق 3 سنين ماشافه الا 3 او 4 مرات ولا يدق يسال عنه

الله يعلم شكثر مضايقه ومهمومه…شكثر اتحمل واصبر وماكتبت الا وانا خلاص بنفجر وابي حل
مشكلتي ياخواتي مع اهلي خصوصا امي
اكيد بتستغربون مني ومن قصتي
يابنات انا مشاكلي مع امي ماتخلص من قبل لا اتزوج واهي متسلطه علي تزوجت بس عشان ارتاح من مشاكلهم بس الله ماكتب اكمل بهالزواج

خلوني افهمكم وحده وحده
ابوولدي شخص ماكان قد المسؤولية وكان يشتغل بالاسم بس يعني ينزله معاش من دوامه من غير مايداوم
بس ياكل ويسهر وينام ويروح الدوانيه ماعنده هدف بحياته بس نفس الوقت ماانكر ان فبداية زواجنا كان مدلعني ويحبني
مر اول شهر من زواجنا ورحنا شهر العسل بجيت مابي اروح معاه اول يوم من ملجنا حسيت اني اكره هالشخص مو بس ماحبه لا اكرهه كان يعاملني احسن معامله اول ماتزوجنا مدلعني ومدللني بس انا من غير سبب ازفه وماقوله كلام حلو وكنت امنعه من حقه . تطلقت وصارلي 3 سنين مطلقه وقبل سنتين دقيت على طليقي وااايد ودزيتله مسجات اترجاه ان يردني بس ماكو فايده حتى مارضى يرد علي… وقبل سنه تقدملي واحد فخليت ابوي يدق على طليقي يقوله اني انخطبت عقبها دق علي وقال ان يبيني بس صارت بينا مشاكل كاتبتها بالموضوع القديم فماريدنا حق بعض

الحين بدش بالموضوع المهم

موضوعي عن امي يا بنات…ماني عارفه شلون اتعامل معاها…ساعدوني؟ اهي وايد عصبيه علي بس انا مع اني احن وحده عليها من اخواني. والله يابنات مامدح بمفسي صج اني مو كامله بس مو مقصره معاها وشكثر متحمله قسوتها علي
اخواني القاسيين عليها تحبهم ولو مهما يسوون تموت فيهم بس انا البنت غير معاي.لان اهيه جذي ماتحب البنات وعندها ان 10 ذكور يساوون بنت وحده.والبنت ماتسوى شي

لما تهاوشني اقعد مع نفسي استرجع الموقف الي صار واشوف واتعلم عشان ماسوي الشي الي ينرفزها…. بس الاقي نفسي مو مسوية شي اصلا واهيه تسوي مشاكل من لاشي

امي مااحس انها امي. دايما تعايرني بطلاقي وتطنز وتقولي ماينلام لما طلقج والله والله يا بنات ان مرات من شي تافه تافه ومرات بدون سبب بس جذي
ومره يمعت كل الي بالبيت وتصرخ انتي زوجج هج منج ورفيجاتج مايبونج انت مينونه ومعقده ….
بنات تدرون شنو الشي اليديد الي امي بدت تقولي اياه …. طلعي من البيت..تقولي طلعي وراح اطردج ..

بنات انا تعبانه حيل من الوضع الي انا فيه….مادري شنو اجابل وشنو اشوف…دراستي الي موراضيه تخلص
ولا ولدي الي قاعده اربيه بروحي حتى ماعندي احد يساعدني فيه ولا امي الي كارهتني ومتسلطه علي
ويابنات احنا الخدم الي نييبهم حدهم عندنا 3-4شهور بعدين يروحون مايتحملون الظلم الي هني
وكل مانييب وحده يديده مسؤوليتي انا اعلمها كل شي من تنظيف حمامات وملابس وكل شي
واذا الخدامه سوت غلط ياويلي انا وياها من امي….
و الخدامه تنام كل يوم متاخر لان شغل وايد فمره قتلها روحي ابدي الشغل مبجر عشان تنام مبجر فراحت تنظف الملابس دقت علي امي قالتلي شتسوي الخدامه قتلها تنظف الملابس زفتني زف وقالتلي لا تحديني على اني اطردج من البيت ….كانت اول مره تقولي هالكلمه….بجيت بجي حسيت جني مذلوله وجني وحده فقيره عايشه عندهم متى مايبوني طردوني

ومن يومها واهي دايما تكرر الكلمه اطردج واطلعي انتي وولدج

انا يا بنات ابوي زين معاي ويحبني وكان يدافع عني بس الحين ساكت مايتكلم عشان لاتصير مشاكل
واخواني يطالعوني بنظرات واخوي جم مره يطقني حيل تدرون ليش لان امي تشيشهم علي اعطيكم مثال مره كنت مداومه بيوم كان الغياب فيه كثير بس انا داومت لاني كنت بسال الدكتورة عن شي
امي دقت على اخوي قالتله اني مداومه ومافي دوام(مع اني قبل لا اطلع كان كل شي اوكي وقايلتلها اني رايحه الدوام)
دق اخوي يسالني قتله اليوم شوي مداومين بس فيه دكتورة وحده مداومه قالي اوكي
رديت البيت وسولفنا شوي ورحت فوق
جان تدق على اخوي تقوله اختك تقول ان انت داق عليها معصب وشاك فيها ياني اخوي شايش

و مره اخوي الثاني امي قالتله ان ولد اختك(عن ولدي) ماذينا ومزعج اخوي قالها ترا محد ماكلها الا اهي مسكينه جان امي تصرخ عليه تقوله يعني حزنان على اختك

احس بذل لما امي تسبني خصوصا جدام اخواني لان مابيهم يسوون فيني نفسها
ولدي مسكين اهو الي ماكلها جم مره امي تطقني جدامه مسكين يبجي حيل ويروح يوخر امي يعني يبي يدافع عني كاسر خاطري حبيبي الي مو قادره اعطيه حنان

ادري ان بعضكم بيقول اني ابالغ بس صدقوني صج ان شخصيتي ضعيفه بس انا فاهمه وواعيه حق كل الي يصير ولا اتخيل هالاشياء اصلا كل شي مبين وانا ادري ان اذا الله كتب وتزوجت وغبت عنها فتره بتفقدني لاني انا الي دايما اساعدها ولما تسافر انا امسك البيت كله وكل مارحت مكان اييبلها معاي شي والله يا بنات مو مقصره حتى لما احتاجت فلوس انا الحمدلله اخذ معاش من الشؤون ولما احتاجت فلوس يتني تطلب مني عطيتها مبلغ ماقصرت والمره الثانيه يتني وعطيتها شوفو يا بنات ماراحت حق اخواني مع انهم موظفين ومومتزوجين ولا عندهم مسؤوليات بس ماراحتلهم يتني انا وعطيتها مرتين بنفس الشهر
اخواني اذا احتاجو شي يجوني و اي شي تطلبه اييبه لها مع انها كل ماهاوشتني وزفتني تقولي صار عندج معاش يا خايسه؟ الله يلعن الي خله عندج معاش؟ اي ليش شسويت

بنات لا تقولولي كلميها لما يكون مزاجها هادي
صدقوني كلمتها بس ماكو فايده اصلا ماتعطيني مجال اتكلم وتطنز علي وتقلب الموضوع علي وصلت لدرجة اني مااكلمها نهائيا بتستغربون من الي بقوله بس فعلا ارتحت لما قمت ما اكلمها بس للاسف المشاكل توصلني وانا قاعده بروحي مالي شغل باحد
عايشه على مسبات وذل واهانه جدام الكل والدعاوي الله لا يوريكم

تعبت من الهم والمسؤوليات الي فوق راسي شلون راح اعيش جذي قولولي انا مو مشكله بطقاق بس شلون ولدي
بيعيش بهالحاله
و الحين وصلت لمرحله الي خلاص استنفذت كل الطرق وقمت اذا زفتني وسبتني اصرخ عليها
دايما يقولولي رضا الام ورضا الام ولا تصيرين عاق زين واحنا العيال مالنا حقوق؟؟ انا وحده وصلت حدي من معاملتها وقلبي قام يرقع يعني تييني سكته واهمه للحين يقولولي رضا الام والي ماترضى شلون؟

لا تقولون امي متنرفزه من طلاقي….اهي صح متنرفزة من الطلاق بس معاملتها لي ماتغيرت ….واهي جذي من زمان من قبل لا اتزوج تكره البنات ماتحبني من وانا صغيره تعاملني بقسوة مو طبيعيه انا يا بنات تربيت في بيئه الله يعلم شنو اهي اصلا انا كبرت وانا مو طبيعيه ماعرف اتكلم مع الناس وبالمعهد كله اقعد وراه محد يعرفني واذا تكلمت ارجف واتأتأ ادري ان تربية اهلي لي مو شماعه اعلق عليها اخطائي بالعكس انا ودي اغير من نفسي بس شلون…

لو ادري ان طليقي يبيني جان رديتله بدون مافكر بس هومايبيني ..مع ان امه وابوه حاولوا فيه بس ماكو فايده واهو للحين ماتزوج

شنو الحل؟