مرافقة الزوج زوجته اثناء الولادة

معنى الولاده بالانجليزي Delivery
لذلك بعض الازواج ( تلخبط ) بين كلمة Delivery الولادة و Delivery التوصيل ..
لذلك اكتفى أن يكون دورة في ولادة زوجته أن ( يخبط ) بها بالمستشفى
إقتداء بموظفي البيتزا Delivery …

النموذج الاول
————–
ويروح يخلص أشغاله .. ويقول لهم إذا صار شيء مهم أو ( احتمى الطلق ) اتصلوا علي ..
تقول له الممرضه : اجلس ممكن زوجتك تحتاج عملية قيصريه ..
يقول لها بكل برود : إذا احتاجت .. ( أنتم ابخص )..
تقول الممرضة : بس نحتاج موافقتك في حينها ..
يقول بصوت واحد ضايق صدره ومستعجل : خلاص خلوني أوقعها من هالحين
وإذا احتاجت كملوا البيانات أنتم.

وفي هذه الاثناء تكون أم عياله ( بين الموت والحياة ) وتمر بتجربه من اكثر الأمور ( إيلاماً ) في مقاييس الآلام العلمية.
وأخينا في الله جالس في الدوام يشرب شاهي ويأكل ( حب ).

وإذا جاء العصر جاء الأب ( المزعوم ) عاطفيا ، والمقبول ( رسمياً )
( يسحّب ) رجليه ودخل المستشفى ، وعلى راسه كرتون فيه
( عصير سن توب ، ماء ، شيكولاته ( الكيلوا بعشره ).. شاريه من محل ( كل شيء بريالين .)
ثم يسأل الممرضات ..
فيه مدام أنا وش فيه يجيب ؟ >>>>>>>>> وعلى باله أنه يتكلم فلبيني بطلاقه.

الفلبينية : هادا بابا أأنتا فيه مدام جيب ولد ….. وتغمز له يعني عطني المقسوم ..
أنا اللي بشرتك بالفلبيني ( بان آن يااان دوي طاو بلنقاقووو ).

وتأخذه الممرضة للحضانه لكي يرى ( ولي العهد )

وبعدأن يراه ويلاعبه من وراء زجاج غرفة الحضانه…
ويقول له : قل بابا .. يا كليلوووو .. أمووووح ..ويطبع قبله على الزجاج

يلتفت الزوج على الممرضة ويقول : هااه كيف مدام ؟ ما فيه موت الحمد لله ..
الفلبينيه :أيوى بابا .. مدام كويس كويس .. >>>>>>>> آخر شيء فكر فيه المدام.

وتكون ولادة الزوجه فرصة له أن يشتري ( دفترأبوأربعين ) وكل يوم يقطع ورقه ..
لأنها أيام جميله بالنسبة لهذا الزوج .. ( يسهر ، ويسافر ، ولا فيه احد يقول له وين أنت رايح ؟ ولا وين أنت جاي ؟

-*-*-*-*-*-*-*-

النموذج الثاني
—————
بالمقابل نرى بعض الازواج على النقيض من الزوج اعلاه ..
أول ما تقول المدام في البيت ( آآآي .. الطلق الظاهر إنه بدأ ) ..
يطمر ويلبس ثوبه على بيجامة النوم المخططة
و يشيل المدام ولاقرب مستشفى ..
وطول الطريق ماسك يدها ويقرأ عليها قرآن ..
ويسمي عليها .. ويحسب أن الولادة تجي ( بدقيقه ) ..

يدخل المستشفى وهو يزاعق ( زوجتي بتولد ) ..

فترد الممرضة ببرود: اركد اركد ! زوجتك مو أول وحده تولد
بعدين يبي لها ساعات وساعات لين تولد ..

يجلس الزوج قلقاً في الممر يروح ويجي كأنه اسد في قفص…وبعد ساعة يقرر
أن يذهب لرئيسة الممرضات ويقول
( ودي أدخل عند زوجتي وهي تولد )..

تاخذه الممرضة وتدخله غرفة الولادة..
( تكرمش وجهه ) يوم شافها تصارخ من الالم ..

ويستمر هذا الصراخ ساعات وساعات ..
والزوج ماسك يد زوجته .. ويقول لها اصبري .. تصبري ..

يقول لها : هانت .. وهي تصارخ بأعلى صوتها .
إلىأن يشرف ولي العهد ( رأسا على عقب).
ويصرخ ويصرخ .. واااا .. واااااا … واااااااااااا …

يفرح الاب بسلامة الأم وابنها
ويفتح ذيك الابتسامة الله وش كبرها ..
ويطلع ويشره كل الممرضات بالمقسوم
بعدين ( يطمر ) للصيدليه ويشتري( حفايظ ، وحليب .. ورضاعات … الخ من احتياجات المولود ).
8
8
8
أشياء عمرها ما كانت بقائمة المشتريات.

ويروح العصر ويشتري بوكيه ورد كبيرررر وكوره.. وسيكل صغير >>>> بدري على السيكل يا أخينا.
بس لا تلومونه من الفرحه بإبنه الجديد.

الخلاصة :

ان هناك بعض الآباء لا يشعرون بمدى المعاناة التي تتعرض لها الزوجه في الولادة ، و ( أكلف ) ما على الزوج أن يقول .. " نبي نجيب ولد هالسنه " .. وكل سنه .. وش ورانا .. وكأن المدام ( عنز )..غير مبالي بما تسببه عملية الحمل والولادة من آلام أثناء الولادة ..و آثار على جسم المرأة بعد الولادة ..

وبين هذا وذاك كثير ..

وهناك كثير النساء لا يرغبن أن يدخل زوجها إلى غرفة الولادة … حتى لا يراها في حالة في التعب و الالم ..

السؤال في هذا الموضوع هو :

هل تؤيد/ين دخول الزوج مع زوجته أثناء الولادة ؟

انا اايده بشرط انه مايشوف الياهل وهو يطلع لانه راح يعاف المره ووايد ناس صارت فيهم هالشغله ..

لاكن اايد انه يشوف معاناتها ويعيش بالجو جنه هو يولد ويفكر الف مره قبل لا يقول لها حملي …

وتسلمون ..

خيتوو هو حلو ان يدخل الزوج لكي يحس بزوجته ويكون بجنبها

مشكورين على المشاركة

بانتظار البقيه

انا معاج

مرة سمعت ان واحد طلق مرته عقب الولادة لما شاف الياهل و اهوا يطلع

انا بصراحه اايد انه يدخل معاها غرفة الولاده لان يحس بمعانتها بعدين ما اعتقد انه الريال يشووف الياهل وهو يطلع لان يكوون اهو صووب راس الام والي اعرفه انا ما يخلوونه يشووف … بس حلوو انه الريال يحس بمعاناة المراا بالعكس يراعيها حيل ويحس فيها .

انا فتح بطن اتصدقون ودى هالمره زوجى يدخل معاى االعملياات لانى انا اخذ ابرة بالظهر بس اتهقون اكو مسنشفى خاص فى الكويت بدخل الزوج

انا ماايد انا اشمئز من نفسي شلون هو ؟؟
سما دار الشفا والمواساة يدش معاك عادي بالغرفة الخاصة للولادة ……

والله يهون عليك انشاالله …..

انا اايد انه يدخل طول فترة الطلق بس حزة طلعة الراس لالالالالالالالالالالالالالا

تصدقون خليتوني اوسوس الحين قمت افكر انا ريلي كان موجود لما طلع راس البيبي ولا لا؟؟
امممممممممممممممممممممممممممممم
ناسيه حدي تصدقون ذكرتوني
يلهوووووووووووووووووي اذا كان موجود
انا اللي اذكره انهم عطوه الياهل وسجل صرخته بالموبايل
بس كان ورى الستارة بهاللحظة
ياحررررررررررررررتي
بشتكي عليهم
ولا اقول لكم شكلي بساله اليوم

هلا بنات …

بكل مستشفيات الكويت ممنوع انه يقعد ويشوف طلعة الياهل

يبي يقعد عن راس زوجته

الا اذا تليقف هذا شي ثاني

انا ريلي قعد معاي شوية كسر خاطري

ويهه قام يقط الوان من الخرعه

هذا والطلق توه بادي

عيل شلون لو ملحق على باجي الفيلم

انا اذكر انه لحق على باجي الفلم بس هل كان من ورى الستارة ولا بالغرفة مادري؟؟؟

نفيشه

طااااااااااف شاف ولا ماشاف

ولا شرايج

انه ما كنت اايد ولا كنت راضية ان زوجي يدش معاي بغرفة الولادة ..

وانه ماكنت بوعييي بس شفت تصوير الفيديو حضرته واقف على راسي ويصور .. واعصابه تلفانه ههههههه وعيونه دمعت شوي مسكين كسر خاطري بس خل يحس شوي

بعدين انه من راييي اللي يقولون اللي يشوف مرته وهي تولد تلوع جبده هذا النوع قليل من الرياييل وبالعكس الواحد لمن يشوف مرته واهي تولد ويشوف ولده ويسمع صوته راح يحب مرته اكثر واكثر

هههههههههه قطع انه ماحب الريال اللي تلوع جبده مو شي حلاته الريال ماتلوع جبده من شي

واي بنوته ليش اتذكريني بفلم الرعب
واي كل ماتذكر الولاه اهون علي الحمل

انا يوم ولادتي وقبلها بلبيه قعد وياي وخليته اصلا ينام وياي بغرفتي مسكين عانا وياي بهالفتره
وانا والده بالاحمدي بس الواسطه خلوه يدش عندي عاد من زين غرفههههههههم حسافه معايني فيها
بس الدماتره حيل حيل شطار
المهم
يوم ييت اولد ودخلوني غرفه الولاده
كنت وقتها ارفض ان ريلي يدش جمله وتفصيلا
خلوه متابع من وراء الابواب لايدش
لييششششششششش
لاني كنت ابي ذوي الخيرات
طالبت بوجود اختي العوده اللي يايبه ثلاثه من قبل وحامل بوقتها بتوم نفسي
قلتلها لاتفارقين واول مابدا الطلق شمختها
وكل شوي اقولها هاااااااااااا شنو بييييييييييييييييييصيييييييييييير
ما انخلللللللللص
متا اصعب شييييييييييييييي
روحي يبي مجلااااااااااات وتعالي قعدي وياي علشان مايضيق خلقج <<< تاثير الكمام والبنج

وبعدين يت اختي الثانيه جان اطردها لانها كانت بس حامل واول ياهل يعني مافي خبرات سابقه شستفيد منها
بعدين يوم حمي الوطيييييييييييس دخلو ريلي وطردو الكل
جان اصرخ عليه طلعوه بررررررررررررررررررررررررررررررررررررره
الصراحه انا ماكنت ابيه يشوف
مابي يتعقد
فعلا فعلا في رياييل يتعقدوةن ويكرهون حريمهم لما يشوفون الياهل يطلع واهم يشقون للولاده وددددددددددددددددم وراس صاعد يشق
ويع انا انقرررررررررفففففففت
الوحده تنقرف من عمرها
واي وبنتي تطلع حسيت جنه ضفدع
شعور خايس جدا وحقدت علي الاجاااااااااااااانب ليش لان يقولون االولاده ذ بست فيلينغ ومريكال سوو اموشينل ولاشفت شي
انقرفت وتالمت بس المتعه فيه اني صرت ام ويوني بناتي بس
لكن عمليه الولاده نفسها لاهي حلوه ولا ممتعه ولاقالها الله
بس من اجل عين الف عين تكرم وقدرت امي اكبر تقدير انها يابتنا كلنا ولا تحجت ياعمري يامي يابعد قلب واول ماودوني غرفتي جان اهب باختي اللي كانت وياي لفيت عليها وقلتلها انتي شلوووووووووون سطرتيهم ثلاااااااااااااااث ولادااااااااااااااااااااااات وبعد بتيييبييييييييييييييييييييين
واهي تضحك علي
مستحيل انسا الالم

بعدين ريلي شاركني مسكين بالولاده والمها كان موجود دخل وطلع علي ترا كذا مره بس ماحبيت يكون وقت العجله موجود وقت الولاده الفعلي وطلعه الراس ابي اركز واادي المهمه علي اكمل وجهه

حطو نفسكم مكان الرييال
عقب هالمنظر
تحبون تقربون من حريمكم؟
ماظنش ابدا

مشكوره بنوته

بالنسبه لي لم ولدت طفلي الأول

زوجي ما دخل معاي

غرفة الولاده

بس أنا بصراحه ما أيد أن الزوج يدخل غرفة الولاده

للأن وايد سمعت عن حالات الطلاق

من عقب الولاده

ورفيجتي دخل معاه زوجه غرفة الولاده بمستشفي الهادي

وشاف رأس اليهال قعد فتره طويله ما يحب يشوفه

ولا يزوره

وبعدين صار عادي معاه

أتقولج قام يرجع

من اللي شافه