|
|
اسمعو القصه باختصار
أنا هذي ثاني سنه لي كلية الآداب
وعلى أساس أني بحول تربيه
تخصص عربي مساند اجتماعيات
ابتدائي طبعا
والتحويل يبيله معدل طبعا
وكذلك اجتياز 30 وحده
وما يزيدون عن 45 وحده
يا بنات لي الحين ما حولت
والسبب أني ما جبت معدل تخيلوا
والدكاتره ما شاالله حدث ولا حرج c يعطونها للطالبات بطلعة الروح
وتدرون كم وحده مجتازه الحين
والله راح ابكي
30
ومع هالكورس راح يصيرون 45
والمشكله المواد اللي ما خذتها كلها مواد تربيه تخصص العربي والاجتماعيات
بنات والله راح أبكي وأذبح نفسي
انا ابي حل علما أن درجاتي مالت امتحانات الأشهر نص ونص
بس مو كل المواد يعني احتمال مادتين من الخمس مواد اللي ما خذتهم هالكورس أخذ فيهم A
بنات والله متووووووووووورطه
إذا ما حولت شنو راح أسوي تروح علي مواد التحويل طبعا
تدرون شنو سلاحي ألحين
ولا شي غير الدعاء
واقول ((إن الله على كل شيء قدير))
وأني اشد حيلي بامتحانات الفاينال وأشوف النتيجه اللي بالكاد ترضي الدكاتره
والله مالي حيله
تدرون وحده من صديقاتي ماره عليها نفس الظروف بس هي أهون بوايد
وتقول لي انا احس بإحساسك انتي مهدده
كلمة ((مهدده)) تخوف صحححححححح؟
بنات الجامعه أنتظر ردودكم يا مثقفات يا أمورات
وكفايه لوم كافي أني لما أحط راسي عالمخده ألوم نفسي ستميه وخمسين ألف مليون مرررره
اللي أبيه حلول منطقيه من الجامعيات
رجااااااااااااااااااء حاااااااااااااااااااااااار
راح ابكي ترى
هذا حسب توقعاتي وحسب نفسية الدكاتره
حاسه فيج انا صارلي نفس ظرفج
بس الفرق اني 3 سنوات بالجامعه
يا حبيبتي نصيحه مني لا تعشمين نفسج انج بتحولين وتروح عليج السنين هدر وانتي ماسويتي شي
انا كنت اداب وبحول تربيه وكل كورس معشمه نفسي بالتحويل ويطلع معدلي اخرررررطي
صكة فيني الدنيا مريت بحاله نفسيه الله لايوريج بسبة التحويل والمعدل
المهم قررت قررت قراااار صج يحز بالنفس ويعور القلب لكن ماكان جدامي غير هالحل قمت سحبت اوراقي من الجامعه وقدمت على كلية التربيه الاساسيه والحين ادرس اول سنه فيها
سمعت كلاااااام يعور القلب ويجيب اكتئاب واحبااااااط .. حسسوني اني ارتكبت جريمه لمه سحبت اوراقي
لكن حالتي ليلحين مو مستقره بالتربيه الاساسيه لاني هم بحول لتخصص ثاني لكن عطيت نفسي سنه وحده بسسسسس اللي اهي سنه اولى والسنه الثانيه اكون بتخصص ثاني اذا ماحصلي التخصص اللي ابيه بلعنه ماراح اضيع نفسي بالتحويل مثل الجامعه
فنصيحه مني لج لااااااااا تضيعين وقتج بتغيير التخصص خليج بمكانج اللي انتي فيه
وعلى فكره التقيت بالتربيه الاساسيه اشكثر بنات محولين من الجامعه ووضعهم كان مأسالوي بالجامعه والحين ماشين تمام
وصج نسيت اقول لج شغلات ترى بالجامعه حتى لو اجتزتي 45 وحده يحطونج بلجنه خاصه ويقبلونج
والله يكتب لج اللي فيه الخير
|
المشاركة الأصلية كتبت بواسطة !+! تــوتــه !+!
 انا كنت اداب وبحول تربيه وكل كورس معشمه نفسي بالتحويل ويطلع معدلي اخرررررطي صكة فيني الدنيا مريت بحاله نفسيه الله لايوريج بسبة التحويل والمعدل وصج نسيت اقول لج شغلات ترى بالجامعه حتى لو اجتزتي 45 وحده يحطونج بلجنه خاصه ويقبلونج والله يكتب لج اللي فيه الخير |
أنا كل نهاية كورس أعشم نفسي بالمعدل ويطلع أزفت من الزفت وتصيبني حالة اكتئاب والله ما أقص عليكم مو أقل من اسبوع
البنات يقولون لي الناس تستانس بقرب العطله وأنت متضايقه اشفيج؟
مع أنا فيه بنات أعرفهم يحولون بسهوله أسهل من شرب الماي
أم طه شلون 51 وبتحولين يعني أنت لجنه خاصه؟<<<< على فكره توني أسمع فيها من توته حبيبتي
وعلى طاري اللجنه الخاصه ممكن توضحين أكثر كلامج هذا يعتبر ضمن((أول الغيث قطره))
وتوني أسمع بشي اسمه( لجنه خاصه )
معقووووووووووله؟
وشلون وأنا بخلص 45 وحده ؟
بس انتي لازم تحطينلج حل بديل حق الوهقة قبل لاتصيرين نفسي انا بسنة ثالثة الحين وماشية بالجامعة ماكو شغل .. سمردحة .. الله يعيينا والله اصلا جامعة الكويت جامعة الفقر على قولتهم اذا شفت شي لا عالبال ولا عالخاطر فابتسم لانك في جامعة الكويت
بس تعالي خوفتيني شنو أتلاحق على عمري ؟
أم طه ما جاوبتي على سؤالي؟؟؟؟؟؟؟؟؟
أنت لجنه خاصه وشلون طريقة هاللجنه؟؟؟؟؟؟؟؟؟؟؟؟ وفيه سؤال بعد: كم عدد إنذارات المعدل؟
وبعدين أنا لا يمكن أسحب أوراقي من الجامعه
بس بنات أبي حل غير أني أسحب أوراقي وأروح كلية التربيه الأساسيه…<<<<هذا الشي أعتبره إحباط
لأني كافي ضايعه علي سنه بالثانويه
وهم لأني ما صدقت أدخل الجامعه…
أبي توضوحون لي شنو اللجنه الخاصه؟؟؟
عيدي المواد الي خذيتيها مو تاخذين مواد يديده عشان ماتحسبلج
وكلمة مهدده انا شبعت منها بالجامعه وماشلت انذاري الا كورس التخرج 
كلمي الدكاتره قوليلهم ظروفج وانج مهدده راح يراعونج
انا كنت امر بأزمة تحويل بس طبعاً مع فرق الكليات و العمادة كانت تتعاطف معانا
لان انا كنت علوم و حولت الحمدلله علوم ادارية
حتى من كثر ما تأزمت دشيت على عميد القبول و التسجيل بالعمادة
قالي اهم شي ان معدلج فوق النقطتين و انج تييبين بمادتين من علوم ادارية C و فوق لأن هذا شرط الكلية
و الحمدلله سهالات و مشت الامور .. بس ماادري احنا اللي بالعلوم و الهندسة و الطب واااااااايد يتعاطفون معانا لأن طبعاً تعرفون شنو تعني هالكليات و شنو المآسي اللي فيها
اما عن الآداب ماادري والله .. بس الكلية سهلة .. يعني ماادري ليش تقولين معدلج نازل مع ان سهل تييبين فيها درجات و جريدات زينة !!
انتي شدي حيلج و قدمي عالتحويل و اذا اجتزتي 45 وحدة مو مشكلة ترى و اذا معدلج ماعليه انذار هم مو مشكلة .. لجنة خاصة و اللجنة ترى وااااااااااااايد تتساهل .. انا الحمدلله ماكنت محتاجة لجنة خاصة .. بس بعض رفيجات دشوا لجنة خاصة و كانت واااااااايد اسهل من التحويل العادي ..
ان شاء الله الله يوفقج و تحولين
والحين عندي البكالريوس ودوم اقول الحمدلله انا عندي الشهاده الجامعيه وموعاجبني المعاش عيل الله يعين الدبلوم والثانوي وغيرهم
لا تيئسين توكلي على الله وشدي حيلج ومولازم التربيه روحي اي كليه وترى محد بيفيدج غير شهادتج وهالشي ماراح تعرفينه الا بعد ماتشتغلين وتدور فيج الدنيا يمين وشمال قهر وتعب ومشاكل وأزمات راح تحسين انج انتي شايله روحج بشهادتج وسويتي شي بحياتج يله حبيبتي شيلي هالأفكار من بالج ولاتضيعين الشهاده من إيدج
zeen_el_q8 كلامك حسسني بالقوه لأن لما كنت بالثانويه شاطره وأجيب أعلى الدرجات بس ما دري ليش ياني الفقرلما دخلت الجامعه لأ والمشكله أني بحول…….
وعلى قولتج بشد حيلي وأروح أكلم الدكاتره …….. والله يسمع منك يا قلبي
أنت قلتي ((إن شاء الله الله يوفقج وتحولين))<<<<<<< هالدعوه عندي ترد الروح وتسوى الدنيا وما فيها……
بس الدكاتره ما أدري شفيهم ما يتعاطفون كلش كل واحد يحط الدرجات على كيفه……
كموووووووووشه تدرين والله توني أدري أن فيه بنات مثلي على بالي أنا الوحيده
والله كرهت نفسي من هالتحويل وهالمعدل الزفت
وانا صح دايم أقول حالي حال هالبنات اللي تخرجوا من الجامعه مافي أحد احسن من احد بس أنا حاله خاصه
انا قصدت من التعاطف مو الدكاترة
لأن الدكاترة بالعلوم انحس و انذل منهم ماااااااعمري شفت
انا اقصد عمادة القبول و التسجيل نفسها
ما كانوا وايد معقدينها و كله سهالات و اللجان الخاصة اسهل و اسهل
صدقيني الجريدات مو صعبة تييبينها بدون ماتكلمين الدكاترة .. بس جابلي شوي و شدي حيلج و الله كريم
موفقة حبوبة