|
|
مساء الخير
شلونكم كلكم ؟
شخباركم ؟ من زمان عنكم
بنات حدي متوهقة مع اليهال
بالذات بنتي الكبيرة
مع الإجازة طبعا قمنا نطلع على طول ونروح ونيي مو مثل ايام المدارس متقيدين بوقت معين للنوم
والصبح اروح الدوام واليهال اوديهم عند امي ويكملون نومهم
المشكلة شنو ؟؟؟؟؟
المشكلة ان بنتي الصغيرة قامت تنام على 11
هذي عادي مو مشكلة
بس بنتي الكبيرة ام 6 سنوات قامت تقعد لي 1 وال2
مرتزة بيني وبين ابوها
كل يوم نجرة معاها عشان النوم
زوجي كل يوم يتحلطم فوق راسي
يقولي شالعيشة ماني قادر اقعد معاج ولاني قادر اسولف واضحك معاج بسبة بنتي اللي تسهر معانا
بالنسبة لي مو شي غريب ،، هذا طبعها من ولادتها نومها حيييييييييييل صعب يعني لما كان عمرها سنة وسنتين تنام عقب اذان الفير حتى الدكتور من ولادتها قالي ترى نشاطها زايد عن الطبيعي بس مو لدرجة انها تحتاج علاج
غير جذي اذا نوت تنام على ال 1 او اكثر
تقعد تبجي الا انا او ابوها ننام عندها بغرفتها
يعني كل يوم انام انا بروحي وزوجي بروحه
مضطرين عشان ما نخليها تنام واهي تبجي
بس ملييييييييييييينا من بدت الإجازة واحنا على هالسالفة
قايم زوجي من جم يوم بيروح الدوام معصب علي
يقولي متزوج وحالتي حالة واحتلم ؟؟ ( سوري على هالكلمة )
بس شوفوا لوين اوصلت الحالة عندنا مجابلتنا طول اليوم لي وقت نومنا ساعات ننام واهي للحين قاعده الله يحفظها
ما خذينا راحتنا الا من جم اسبوع لان صار عندنا عرس فحجزنا لنا غرفة بالفندق وتفرغنا لبعض
ودقت علي امي تقولي مي صارت 2 الفير دخنا نبي ننام وبنتج للحين قاعده !!!
عندكم حلول لهالسالفة ؟؟
لان قمت اوصي امي تقعدها مبجر عشان تدوخ بالليل هم ما فاد 
حطي بدارها او غرفتها تلفزيون شغليلها بباي ليما تنام
و العصاري او المغربيات خل تطلع طاقتها في اللعب او الانشطه .. ما يصير الليل الا و اهي متمخمخه .
و حتى لو رفضت بالليل تنام .. وديها فراشها و فجي اباجوره و قصي عليهم قصص لين تنام .. ساعات تنفع هالحركه .
و عموما اليهال كلهم تعتفس نومتهم و نظامهم بالاجازه .
طولوا بالكم عليهم .
و عندي تعليق على هالكلمه
| يقولي متزوج وحالتي حالة واحتلم ؟؟ |
ترى حتى الشياب يحتلمون .. و حتى المتزوجين .. هذا شي ب العقل الباطن و مو من الاشباع الجنسي
يعني حتى لو مفرغ طاقاته الريال مع مرته ممكن بنفس الليله او اللي بعدها يحتلم .
غير الناس
بتبوتا
اهي تنام بغرفتها بس تقعد تبجي الا احد ينام عندها بغرفتها ،، واذا انا او ابوها عصبنا قامت تصرخ انتوا ما تحبوني تخولوني انام وانا زعلانة واسطوانة طويلة عريضة تشغلها لنا
وكل شوي القاها مرتزة فوق راسي دموعها تصبصب ليما قصبن علينا واحد منا ينام عندها لان الوقت يمشي واهي حارقة اعصابنا بالبجي وانا ما احب بناتي ينامون زعلانين
زينة
تقوم على ال 11 الصبح او قبل وتضل لي الفير قاعده 
دام انتي بخير هذا اهم شي والله يعينج علي هم العيال
|
المشاركة الأصلية كتبت بواسطة ( مي )
 زينة تقوم على ال 11 الصبح او قبل وتضل لي الفير قاعده |
وايد لي 11 .. قوميها الصبح كل يوم ابجر .. يعني بلشي 10 و عقب جم يوم 9 و عقب 8 الصبح .
اذا قامت 8 .. الظهر عقب الغدا بتدوخ .. خل تريح ساعه و قعديها .. و تالي تلعب و تحوس لين ال10 او 11 تنام .
و جربي تسبحينها قبل النوم .. السبوح يساعد على النوم .
دايمن نصيحتي للامهات دخلوهم نوادي
العصر حطيها بنادي وراح يطيح مافي راسها من اللعب والوناسه
هذا اللي بيدج
الله يخليها لج يارب
بعد عمري انتي تسلمين
اهو هم العيال وهم الريل ما تدرين منو تراضين
زينة
امس دقيت على امي قلت لها قعديها 10
بس الله يحفظها هم ضلت قاعدة مرة نعصب عليها ومرة نضحك
سكتي زينة
مرة سبحتها ابيها تدوخ
قلت لها ها ماما شكلج دختي
جان تقولي لا ماما صحصحت اكثر
ههههههههههههههه
قمت اطلعهم الصبح على شان يدوخون بالليل هههه
و لو ادخلينها نادي نشاطات بنات صغار , راح تبذل مجهود و تتعب
دخليها دارها مبجر من الساعه 9 وسكري عليها الليت وخلي ابجوره وقعدي وياها شوفي التلفزيون او قوليلها قصه وكل ماتكمت قوليلها البنات الحلوين يسمعون واهم ساكتين اشششششششششششش
ولعبي بشعرها علشان تدوخ
عدويها تنام بروحها شوي شوي يعني عادي طلعي من الدار وقوليلها ان يتي وبجيتي ماراح اييج ااذا تميتي ساكته وهاديه تطالعين التلفزيون امرج كل ساعه مره وحده
وان صرتي شاطره ونمتي بروحج ايبلج باجر حلاو او كاكاو اللي تحبه
عشميها بهديه