مالت علي الفين مره :eh_s:

شلونكم كويتيات حبيباتي من امس وانا ابي اكتب موضوعي بس مادري شفيه اليوزر نيم حقي ما يبطل اليوم استلفت نك اختي عشان اقولكم مشكلتي حدي متوهقه وكارهه نفسي نبدا بسم الله
انا متزوجه صارلي 10 شهور وربي ما يعني على الدلع والكلام الحلو لزوجي اذا جيت اقوله كلمه حلوه تنقلب سوالف رفع ضغط وطنازه وبعدين لما اخورها في الكلام ابدا اقول كلام حلو بس عقب ما يكون زعل وتضايق وصير مالها طعم مدري ليش اسوي جذي لدرجه انه تعود حرام على اسلوبي وكان يجاملني وقول انا احب اسلوبج
زوجي كان رمنسي وبدا يصير نفسي ويتبع سلوبي صارة حياتنا ما فيها اي كلام حلو جنا متزوجين من 40 سنه والله اكتبلكم وان خانقتني العبره
بنات انا لما اكلم زوجي ما اقدر اقوله حبيبي واذا نادني ودي اقوله لبيه بس ما تطلع مع ان كل ما اناديه ما يقول الا لبيه وفديتج
مره دقيت عليه وقلت له حبيبي ولما صرنا بليل حسيت زوجي غير ومستانس سألته قال انج قلتلي اليوم حبيبي وانا من قلتيها وانا بعالم ثاني رحت الحمام وقعت ابكي بس ما في فايده ما يعني ربي اقولها دايم مدري ليش
انا الحين انفاس عند اهلي صارلي 12 يوم والله يا بنات من طلعت من المستشفى كل مكالمتنا جيب هذا وناقصني هذا وبس لين مليت وقلت لازم احرك الجو حرام احسه زهق ومل دقيت عليه قبل امس بليل وكلعاده اسلوبي البايخ بعدين قلتله اشتقت لك ما فقدتني ؟ قال مكانج مبين قلت شلون ؟ قال البيت عفسه والسرير انام وقوم على حطته وبس ؟ قلت هذا اللي فقدته بس تدرون شرد علي !!!!
امبيه يا بنات قالي كلام ذبحني قال انتي عودتني على الدفاشه في كلامج وانج ما تعرفين تعبرين عن مشاعرج لدرجه اني صرت نفسج ما عاد اهتم ولا عندي مشاعر وقال يمكن اذا اتبعت اسلوبج احسن لي

حاولت ابين انه ظالمني وان دايم مو فصدي بس اقول هلكلام غصب عني
رد علي وقال :دايم مو قصدج مدري متى بتقولين شي قصدج ترفعين ضغطي بكلامج بعدين تقولين كم كلمه حلوه اكون شفقان على الكلام الحلو انسى كل كلمه تجرحني وقال خلاص ما ابي كلام حلو منج دام في قبله كلام يغث
حاولت ارقع السالفه قلت : انا داقه اقول مشتاقه اقعد معاك وسولف مشتاقه اقوم من النوم وشوفك
وما كملت كلامي قالي دقيقه ودق عليج
ودقيقه صارت يوم (امس بليل ) دق علي سوى نفسه ناسي الموضوع مت من القهر ونجنيت ما قلت له شي طنشت الموضوع
بس ما جاني نوم دزيت له مسج ((ما نسيت شي امس ؟؟؟تقول انا دفاشه وما اعرف اعبر عن مشاعري واللي سوته امس مو دفاشه ؟؟ ))
ولا رد علي وطنشني
واليوم الصبح كان عندي امتحان قال يبي يودني بس انا قلت بروح مع سايق اهلي لان ما ابيه يشوفني وانا نفاس يمكن دق علي عشر مكالمات من طلعت من بيت اهلي لين رديت يتطمن علي وعلى امتحاني ولان اليوم مطر وكان خايف علي مع السايق وشارع زلق بس ولا قال ولا كلمه عن الموضوع وانا كنت اكلمه في برود بس قالي لوصلتي البيت دقي علي فديتج ولا دقيت مالت علي لا تسألون ليش كنت ميته ادق بس ما دقيت دق علي وقال ليش ما دقتي
كذبت وقلت دقيت دقه
قال انتي وين
ماااااااااااااااااااااااالت علي صرفته : قلت بسريري بنام
رد : نوم العافيه ماتبون شي ومع السلامه

تكفون شوفولي حل شلون اخاف افقد زوجي بتصرفاتي تعبت ابي اعبر انا احبه واموت فيه بس احس فيه شي يمنعني

انتي تخربين على نفسك
مشي الاموووور لاتدققي بشي

اقنعي نفسج ،، انج طول ما انتي بتعاندين انج تعبرين عن احساسج وحبج ،، فحياتج الزوجية بتتردى
وان سويتي الشي اللي انتي عارفة انه بيجذب زوجج لج فحياتج بتكون للأفضل

انتي شنو تختارين ؟؟

ماكو شي مانعج غير انج كودتي افكاار قبل على الحين فزادت الطين بله

ابدي من اول مكالمه الحين بحجي حلو حتى لورد عليج بدفاشه خلج على الاسلوب الحلو وحاولي تتصنعين او تمثلين

عشان يتعود لسانج عالكلام الطيب

وبتشوفين نفسج تغيريتي باسلوبج

وانتي الحين نفاس يعني النفسيه على طريف والدمعه كذلك :>

شدعوااا

حتا حبيبي ماتبين تقوليله
انتي الغلطانه

والحل بيدج عدلى اسلوبج وطريقتج

انتي نفس حااااااااااااااااااالتي قبل

غباء على دفاشه على قوايه على حيا على خوف على كبر

بس مابي اقولج النتايج

تسنعي وانا اختج قبل لايجي يوم تندميييييييييييييين قد شعر راسج

اااب

الله يسهل طلعة الحجي الحلووووووووووووو من حلجج ياختي

لووول اسمحيلي انتي تقولي مالت علي الفين مره
انا اقوووووولج مالت عليج مليون واكثر يالخبله لاتتدققين بالامور وعلمتي الرجال علي طبعج طبع الزعل وكل شي توقفيله فيج ونام ونسي المووضوع ورحتي وتذكرينه فيه
اوكي ماتقدرين تقولين كلام حلو يعني مااصارلكم فترة متزوجين ويمكن تستحين عاد تركي هالشغله مع الايااام تتغير اهم شي غيري نفسيتج من الداخل وغيري طرقة كلامج

الله يعينج

عادي يمديج اتغيرين

طيب ادري اني ادقق وخايفه اني اندم وابي والله اتسنع بس الحين الحين شسوي افكاركم يا كويتيات انسى كلامه واكلمه عادي والا ارد اقوله كلام حلو وحاول ((بس مدري احس فيها مذله ))لانه دقرني اول مره
ابي حل بلييييييييييييييز

ياقلبي عليج

ماعليه مع الوقت تتغيرين والعشرة

حاولي تردين من النفاس غير

تبين رايي ؟؟

وبصراحه وبدون زعل ؟؟

دام انج نفاس بيت اهلج .. قزريهها مكالمات ومسجات

صدقيني جربي مرة وثنتين وثلاث وباجر بتتعودين ولسانج بياخذ على الكلام الحلو والدلع

بس نصيحه لا تحرمين ريلج

اي صح نسيت اقولج

دام ان ريلج تعود على طبعج .. طولي بالج معاه يعني بتييج كلمه تعور القلب وتجرح لكن قابليها بكلمه احلى من العسل صدقيني راح يلين

وبعدين انتي الغلطانه من البدايه ماكان له داعي تصرفينه وانتي تدرين ان خايف عليج كنتي تقدرين تستغلين هاللحظه اللي عبر فيها عن مشاعره مو تصرفينه !!

على العموم مثل ماقلت لج

انسي انج زوجته وكلميه كحبيبه
تجرأي معاه بالنهايه هذا حلالج

حبيبي وعمري ودنيتي وقلبي وحياتي وغيرها من هالكلمات كل ماقلتي كلمه منهم وفرحت قلب زوجج ربي يآجرج

عطيه عسل يعطيج شهد

عطيه شوك يعطيج علقم

انتي اختاري حياتج شنو تبينها تصير

ومثل ماقلت لج دام انج نفاس تجرأي اول شي بالمسجات دزي كلام حلو ودزي احساسج الخاص ولالالالالالا تعاتبين كلش ابتدي صفحه يديده

تركي عنج العتب لان من البدايه انتي الغلطانه مو اهو

وبعدين شوي شوي راح تلقين نفسج تتجرأين ويصير هالكلام روتين بلسانج