|
|
ماتوقعت زوجي بهالقسوه يا بنات لهالدرجه الرجل مايحس بالمره عبالهم آله تكرف
بقولكم نبذه مختصره عن حالتي
انا متزوجه صارلي سنتين بشقه بروحي عباره عن غرفه صغيره حيل وصاله صغيره وحمام ومطبخ درست وانا متزوجه ارجع من الجامعه هلكانه على طول اطبخ الغدا تصوروا اغسل ملابسه الدشاديش يوميا والملابس الداخليه واكويهم انظف الشقه كلها بروحي لان معارض اخذ خدامة اهلي او اجيب الخدامات اللي بالساعات بحجه ان المره السنعه اهيا اللي تهتم فبيت زوجها ومحد يساعدها والله كرفت وانا حامل بطني شطوله وانا اللي كنت فبيت اهلي معززه
ولدت وجبت بنتي وانا بالميداني ( مدرسه ) نفاس بالميداني تخيلوا لان بخلص دراسه بسرعه واتوظف طلعت من نفاسي وانا للحين بالميداني ،،، وكانت بنتي عند امي عسى ربي يطول بعمرها ،،. خلصت من الميداني واخذت بنتي ونفس الموال كل يوم كرف كرف بالبدايه كانت بنتي متعبتني تعرفون بجر ما اعرف للجهال بس الحمدلله الحين وضعي تحسن حييييل ونومتها تحسنت والله يا بنات اكشخ له اخر كشخه واطبخ له والحمدلله يشهد علي ربي مو مقصره معاه بولا شي
بتقولون وين المشكله >>> المشكله اني قدمت بالديوان والحمدلله تخصصي نادر وبسرعه انقبل كلمت زوجي يقدم لي على خدامه عشان بالدوام احط بنتي عند خالتي مع الخدامه والخدامه تكون فبيت خالتي لان شقتي صغيره ومالها مكان والاخ معارض نطلع بشقه ثانيه >>> وهالشي مراعيته فيه لان معاشه يالله يالله
قال مو مشكله راح اقدم لج
قلتله لما اتوظف ناخذ غدانا من بيت خالتي لان اجي من الدوام تعبانه تدرون شنو قال والله صدمتي يصارخ يقول شحضرتج ليش ماتطبخين قلت ارجع هلكانه ارجع راسي مصدع شلون اطبخ لك واغسل وانا توني طالعه من الدوام غير بنتي اللي حتى مايعاونني عليها ،،، والله يا بنات قعد يصارخ ويقول مو لازم اداومين اقعدي فبيتج المره مالها الا بيت زوجها اااااخحخ اكتب لكم وانا ميته قهررر تدرون ليش لان يقول ماعندج شي شنو الشي الصعب عليج ومو قادره عليه قلت الطبخ حبيبي وملابسك كل يوم غسيل وملابس بنتي وملابسي وتنظيف الشقه منو يقوم فيه مو انااا؟؟؟
قلت مايخالف حط ملابسك دشاديشك بالمصبغه قال نعمممم ما اسمع بعرف انا ليش متزوج
بنات اللي متزوجات ويداومون اكثر ناس حاسين فيني ريحوني تعبت منه ومن التنظيف ومقابل بنتي اللي بروحها يبيلها وقت كامل شلون لما اتوظف والله اذكر بالميداني ارجع تعبانه حيييل ادور المخده وبنتي كانت عند امي شلون وضعي لما اتوظف ،،، صدمني زوجي ماتوقعته قاسي مدلعته اخر دلع والله صج قلب من صخر
ريحو بالي وعطوني حل؟؟؟
ولا يحرمج الاجر
احتساب الاجر
وانتظاره من الله
من الاشياء اللي تعيننا ع العيش في الدنيا
بالنسبة لحالتج
شوفي ترى الوحدة
من تتزوج وتكون ام
لابد من التعب والشغل
حتى لو اكثر من خادمة عندها
انت الحين
بتجيبين خادمة
الصبح مع بنتج
عقب الدوام تسوي شغل البيت
كله
وترى يخلص بسرعه
خاصة انها خادمة جاية للشغل
مو مثلنا
فتركز عليه وتخلصه
والطباخ ممكن بالليل
انت او هي
وعقب الدوام تكملينه ع طول
يعني
مثلا بالليل حمس وسلق
عقب الدوام
تسخنينه وتحطين العيش
او تحطين بنتج بحضانة
والهادمة تتفرغ الصبح تنظيف وطباخ
سهليها وتتسهل
ومردكم تطلعون ف بيت اوسع واكبر
باذن الله
الصبر مفتاح الفرج
انا لي نظرة (ممكن تكون صح و ممكن غلط)
لكن احس مشكلتك انك
مدلعته على الآخر و مومقصره معاه بشي….
بحالتك اتوقع بينه و بين نفسه قال ..اهيا جبارة حامل و تدرس و هم تكرف ….
انا لو مكانك …بهدي الأمور و ما احن لكن ببدي اشتغل على طاااقتي … ولنفسك عليك حق لات قصرين بواجبات البيت لكن بدي نفسك عليه اهو و بدي نفسك على بنتك بعد ما ترتاح نفسك اشتغلي للبيت و له
شوفيه اهو بنته اللي اهي بنته ما يساعدك فيها و اكيد مو مقصر على نفسه بالطلعات و الديوانية و الوناسه….
انا ما ابي اشيشج عليه … و زوجج ما سوا شي غلط …لكن انت كشفتي انج للكراف جدامه ….
الحين … الوظيفه من حقك … اثبات ذاتك و الماده حلوة … لا تعشمينه بالراتبك … المساعده حلوة …لكن راتبك من حقك
اصري على الوظيفه
بنت …حضانه
الأكل بدال ما تطبخين محاشي و مشاوي و فناتك
في وصفات سهله تتبل بالليل و الظهر دخليها الفرن و بس
اعمل على طاقتك
خليك مثل السياره مستحيل تشتغل من غير بنزين اذا خلص البنزين توووقف
اعذريني على التشبيه لكن كنت بوصل لك الفكره
اتمنى الله يلهمك حسن التصرف
و الاكيد انت تعرفين لريلج و شنو يصلح له من تصرف
الله يسخره لك
الخادمة ترى مهمه جدا تكون موجوده
بس حق شغله معينة يعني مو تقطين كل شي عليه من غسيل ملابس , طبخ , خمام , كواي تنظيف ووو ..
فوق هاي كله بنتج تقطينها عليها يا انها تهتم في بنتج يا انها تقوم بواجب اي خادمة بالبيت من تنظيفات وغيره
لانها بتتعب انا اقول الصبح تخلينها في شقتج تنظف وترتب وتطبخ وبنتج عند خالتج او عند والدتج الله يحفظها
وبعد ماترجعين من الدوام تاخذين الخادمة تردينها بيتكم او بيت خالتج كيفج وتاخذين بنتج لانه مالها مكان في شقتج
وحاولي تقنعين زوجج بشقة اكبر عشان يكون مكان للخادمة واذا مارضى الله يسهلها بذن الله ومثل ماقلت لج الطريقة
بس علاجج
بالتخطيط بالوقت
وهو
تنظيف البيت والطبخ بالليل
وتسخين الاكل بالنهار
وحاولي بلحظات صفاء بينج وبينه
تغيرون الشقه وتجيبين خدامه
هالمشاكل كلنا مرينا فيها وصارت ذكريات مضحكه لما كبرنا وكبروا العيال
موفقه
فوفو
بس هذا اهم الرياييل ما ينعطون ويهه ولا تعطينه اكبر من حجمه قولي له انا انسانه مو رجل ألي دربالج كل هذا محسوب من صحتج تعب و ارهاق
ضروري واحد من عائلتج يتفاهم معاه ابوج او عم او اخ او امج ويكلمه بخصوص الخدامة تساعدج بالبيت
انا يوم حملت سويت عمري دلوعه و كله ظهري يعورني و سويت خطة جهنمية عشان يرضى اييب لي الخدامة
حتى يوم دخلت للدكتورة قلت لها كلمي زوجي و قولي له شغل البيت و الوظيفة يتعبون الحرمة و اهتم فيها و ساعدها و شوي شوي عليها هههههههه و الدكتورة بعد ما قصرت بالكلام
وكلما يرجع يقول ليش ما تسوين هذا و يعصب ؟ اقوله ما اقدر حبيبي تعبانة الحين بسويه و بالعكس ما ازعل لو يعصب او يصارخ
يعني حسسته اني ما اقدر و مو سوبر ومن اسوي كل شي
و كلما اروح للدكتورة اقوله الدكتورة تقول الحركة الزايدة مو زينة للحامل لين ما شوي شوي رضى
يبغي لج كلام و اسلوب و ما تتضايقين و مكر و دبلوماسية و سياسية
وشوي شوي لين ما توصلين للي تبغينه
بس في نقطة ما حبيتها كيف تاخذ اكل من بيت خالتج
ترى مو حلوة بعد و بعدين بيتحجون عنج انج مو سنعة ومن ها الكلام
خلي الخدامة هي تسوي و علميها الطبخ
وانا دايما من اقوم الصبح اجهز سفرة الغداء ع الطاولة مع الصحون و كل شي
و اجهز السلطة و اخليها بالثلاجة
ومن ارجع من الشغل الخدامة تكمل الغداء
حبيبتي انتي زوجه وريلج يبي يحس انج زوجه وقاعده تقومين بدورج تجاه بيتج ويخاف اذا تماديتي اتشيلين ايدج من كلشي
ويصير مالج دور بالبيت
اكيد بتكون هاذي ردى فعله كلنا موظفات بس ماطلبنا من اهل الزوج انهم يطبخونلنا
الكل لاهي بدنيته ومشاغله مو بس انتي
وبعدين اذا يبتي خدامه علميها تطبخ
وانتي سوي اشياء خفيفه
وطبخي من اليل حضري طبختج ولما تردين من الدوام بس حطيها عالنار
انا جذي اسوي
وبالعكس ماشوف انها لي هالدرجه مشكله طالما ان الخدامه قايمه بكل شغل البيت
الطباخ مو عائق وماياخذ اكثر من نص ساعه الخدامه تقطع وتجهز وتغسل الاكل وانا بس اطبخه جاهز مجهز
نصيحه مدام ريلج قال بيبلج خدامه لاتتمادين ولاتخلينه يهون ويعاندج
لاتقصرين بحق بيتج وحاولي كثر ماتقدرين تقومين بواجباتج واليوم الي تعبانه فيه طبخي شي جاهز مقالي ولا مطعم
لا تكرفين روحج مره وحده ولاتشيلين ايدج من كلشي مره وحده
خير الامور الوسط
حاولي تناقشينه برواق وهداوة انه يا حبيبي لازم تساعدني انا ما فيني حيل كل هذا بروحي
رااااااااااااح زمن انه المرة للبيت وبس
لا يا عمري الزواج مشاركة تعاون وتفاهم وحوار لازم يخفف عنج التعب وربج ييسرها حبيبتي
انتو تقولون خلي الخدامه تسوي وتسوي …انا الخدامه بخليها فبيت خالتي لان ماعندي مكان بالشقه غرفه صغيره حييييييييل لدرجة ان الكبت حاطينه بالممر من كثر ماهي ضيقه والصاله اللي نقعد فيها هم صغيره ومطبخ نتفه وحمام الخدامه مالها مكان كلششششش
وين اقعدها وين تنام ومو راضي اطلع بشقه ثانيه
فهمتوا علي
انا لما اداوم راح اخلي بنتي عند الخدامه اللي هي بالاساس راح تكون فبيت خالتي
لما اطلع من الدوام اخذ بنتي والخدامه تقعد ومنها ناخذ الغدا مو اطلع من الدوام سيدا ع المطبخ وانتو تعرفون دوام المدرسه تاخذ شغلها للبيت يعني فوق شغلي طبخ ونفخ
اتمنى الصوره واضحه الحين
المره السنعه تعرف كيف تنظم و قتها
بعدين الدنيا ما فيها راحه
لو الكل مبسوط في حياته محد تمنى الجنه
اهم شئ احتسبي الأجر في كل شئ
فيه بنات كثير أعجبتني ردودهم الله يجزاهم خير
الله يكون بعونك
و كلامج عين العقل حبيبتي