لا امساك بالمعروف ولا تسريح بإحسان

خواتي هذي اول مشاركة لي بالمنتدى واتمنى انكم تفيدوني من خلال تجاربكم واراءكم.

انا متزوجة من ست سنوات تقريبا وكان زواج مااقدر اقول عن حب بس كانت بينا علاقة مدتها قصيرة لأنه على طول قاللي بتقدملج ولم تقدملي اهلي بالبداية عارضو على اساس انهم قابلوه وشافو اسلوبه وكلامه وقالو انه مايصلحلي ولا يناسبني ومبين انه عصبي وبسرعة يثور على اي شي المهم انا سكت بالبداية بس شفت الريال تقدملي اكثر من مرة وعاند واصر على الموضوع بصراحة حسيت انه متمسك فيني فقلت لأهلي اني موافقة وأبيه وخلاص يمكن هذا نصيبي.
المهم تزوجنا وفعلا بينت الأطباع من ايام الملجة اعصاب وصراخ وخلاص كل واحد يروح بطريق ومن هالكلام انا طبع قلت هذا اخياري لازم اتحمل تطورت المسائل بدا يمد ايده علي وهم انا صابرة وساكتة والمشكلة ان انا اسكت وهو اللي يتصل بأهلي ويقولهم انا طقيتها وتعالو خذوها ومابيها ومن هالكلام.

ساعت يصير حنون وطيب وكل شي اطلبه منه يعطيني والله لو شنو كان هالشي انا عمري ما انكر هالشي المهم ياني ولد الحمدلله وبعدها زادت المشاكل بينا والضرب والاهانات تطورت معاه مرة كسرني تكسر والدم والله مطشر بالغرفة على الطوفة وعلى الأرض والله بس يعلم بحالتي حزتها وهم اتصل بخواني وقاللهم تعالو اخذو بنتكم انا مابيها
رحت عند اهلي جم يوم تحسف وياني يتسامح وطبعا اهلي مو من النوع اللي ما يحبون المشاكل والقيل والقال ردوني له

تحملت وصبرت يوم حلو ويوم مر ياني الولد الثاني المهم بعدها انا بديت اكش من زوجي مادري يمكن من كثر الزعل ومن كثر الجفا ومن كثر الاهانات بديت اكرهه وطبعا انا من خذاني وانا أدري عنده خرابيط وبنات بس كنت اسكت ولا اواجهه اقول مرده لي بس الحين بعد ماحسيت اني موطايقته بديت ادور من وراه ابي الزلة

شفت موبايل بسيارته واكتشفت المصايب اغلب العلاقات مع فلبينيات صور ومسجات انا طبعا انصدمت صدمة الله يعلم فيها هالكلام كان برمضان قلت اسكت جني ماشفت شي خل عياله يعيدون معاه وبعدين يصير خير
تميت طول الأيام وانا ادعي ربي انه سبحانه هو اللي يختارلي الزين لي ولعيالي انا ماني عارفة اتصرف ولا اتكلم

طبعا بهالفترة قعدت اتذكر اشياء ومواقف صايرتلي وماكنت دارية انا كانت عندي فلبينية اول مايتني كان دايما يقولي قوليلها تشيل شواربها ترا تلوع الجبد وانا اتهاوش مهاه شعليك منها لاطالعها وهو يقولي لا مقرفة ماقدر بعد الفلبينية يبت اندونيسية مرتجعة قعدت عندي يومين وانا بالدوام اتصل فيني قالي ترا بودي الخدامة المكتب خلاص مانبيها قتله ليش قالي تحرشت فيني قتله انا الحين ياية قال بس لاتكلمينها بالموضوع خلاص انا هاوشتها قتلج والله لاتكلمينها بالموضوع انا شكيت بس تعوذت من ابليس وسكت او وايد مواقف مع هالجنسيات بالذات وكنت دايما اشيل هالأفكار من بالي ولا ابي اشك بالموضوع

المهم ماقدرت او واجهته بالموبايل اللي بالسيارة انصدم وقالي كيفي اي احط تلفون انا مالقيت الاستقرار معاج قتله وعسى لقيته معاهم انا بس اهنيك على هالمستوى انا عقب اللي شفته ماقدر اعيش معاك بعد ابي الطلاق قالي مافي طلاق واذا مو عاجبج روحي بيت اهلج

انا ماتحملت خذيت عيالي ورحت بيت اهلي ولا تكلمت بشي قلت ابي الطلاق وبس
غير قفل الشقة وطرشلي ملابسي باكياس زبالة سود انا هني انهرت وقلت لخواتي عن اللي شفته وكانت الصدمة

خواتي قالولي تركيه احسن ولاتحاتين عيالج بيربون احسن تربية معانا ان شاء الله وفي موضوع احنا نعرفه من سنتين بس ماقدرنا نقوله لأنه بصراحة ماصدقنا الكلام .. مرة من المرات اختي سافرت وخلت بنتها وفلبينيتها عندي وقتها كانت عندي الغبرة الفلبينية تقول كانت تشوفه يدخل معاها الغرفة ويسكرون عليهم الباب ويطلع ماسك كلينكس

والله اكتب لكم الكلام وانا اعرق من الفشلة والقهر ودموعي اللي ماوقفت من يومها

المهم انا اصريت على موقفي ابي الطلاق خلاص انا يمكن ماقدر اسامح ولا اتحمل الاستغفال مع انه ياني تحت ريلي يبجي ويترجاني بس انا ماقدر اسامحه ولا اقدر اعيش معاه و عيالي والله هم اللي كاسرين ظهري بس غصب علي

الحين اهو موراضي يطلقني واهلي مايبون مشاكل ومحاكم وليلحين يحاولون يقنعوني اني ارجعله بس والله ماني قادرة مع ان الموضوع صارله شهرين تقريبا

الله لايحط احد بهالموقف بس ابي رايكم الموضوع بالنسبة لكم عادي وهين وانا فعلا مكبرة المسائل ولا صج هالشي ماينسكت عليه انا مابي قراري يأثر على عيالي وايي يوم يلوموني ليش حرمتهم من ابوهم

مابي يكبرون في بيت ابوهم يخون امهم فيه بغيابها ويمكن جدامهم هذا اللي ذابحني والله

شورو علي بنات واسفة طولت عليكم والله يعينكم على بدلياتي…