كارهة المدرسة شنو الحل

لسلام عليكم
انا معلمة لي عشر سنين
ومعلمة ممتازة ومبدعة وملتزمة والحمد لله ما عندي مشاكل مع احد فارضة احترامي على الكل

المهم: صارلي بمدرستي الحالية 5سنوات والله متفانية بعملي وكل عمل يكلفوني فيه اقول انش ا الله
بداية هالسنه صار موقف بسيط جدا مع الناظرة وعلى طول عطتني افادة انا مثل اللي صفقتيني على وجهي انصدمت وقلت للوكيلة ليش شصاير والله بنت الحلال مستحية مني قالت الناظرة عصبت علي امس بالهدة لانك خليتي البنات وطاعتي قبل طقت جرس الهدة قلت طبيعي اولى ابتدائي يطلعون قبل الجرس قالت لازم تنطرين لما اهلهم يجون ياخذونهم قلت هذا مو شغلي المهم وقعت الافادة وعطيتها وصج تضايقت
من هالموقف تغيرت صرت مالي خلق على الدرسة ونفسيتي تعبت وكثر غيابي
وقبل اسبوع صارلي موقف مع المشرفة وحسبي الله عليها تبلت علي واشتكت علي عند الناظرة وقالت طولت صوتها علي
وعطتني الناظرة افادة

مابي اطول عليكم بس ليش الانسان الملتزم على ابسط غلطة يحاسبونه حساب عسير وينسون كل اللي سواه

الحين انا كارهة المدرسة والصبح يحوشني مقص شديد اذا بغيت اداوم فاغيب غصبن عني

والله انا محتارة تكفون شنو الحل انتقل من المدرسة والا شسوي الله يجزاها خير اللي ترد علي

الله يعينج
وتنحل مشكلتج

هدي نفسج لايكلف الله نفسا الاوسعها

لاتضغطين على نفسج الامور هذي اتصير للشطار اكثر لانهم حساسين ويشوفون ان الدنيا انهارت عقب الافاده

عادي طوفي ولاراح يتاثر على شغلج ولا تقديرج ولا احترامج شي

استمري وخليها دافع لج للامام

وارض الله واسعه يمكن صار هالشي عشان الله يبيج تنتقلين

خليج ايجابيه وشوفي الموضوع من زاويه ثانيه

مثل الله يحبني صار لي هالشي عشان اشوف شي ماشفته او اعرف صديقي من عدوي او عشان اخذ خبره اكثر

بهالمدنيا والمدارس

انت شاطره وقعدي مع نفسج شوي رتبي افكارج وحسبيها اذا غلطانه تراجعي واذا انتي واثقه روحي للناظره

وناقشها

يمكن اهي منقول لها شي غلط عنج او في لبس بالموضوع

اخذي نصيحة اخت لها باع طويل بالمدارس كنت مثلج بالضبط

مشكورين حبايبي على الرد

انا رحت الناظرة وكلمتها وشرحت لها كل شي بس احس انها مو مصدقتني وحسيت انها بتة انيلوي ذراعي عشان مرة ثانية ما اعترض على شي المشكلة انها ما تعدل نا س مرتاحين وناس مضغوطين

انا افكر انتقل لان المسألة نفسيتي تعبت والله انا قاعدة اكتب وانا تعبانة حيل
بس اخاف اذا انتقلت نفس الشي ما ارتاح والله محتارة

لا تفكرين بالنقل حاليا .,

انتي بحالة غضب ., وأي قرار صادر عنج ., مو عدل .,

شوفي هذا الوضع طبيعي بكل المدارس .,
صدقيني وين ماتروحين بتصادفين هالاشياء البسيطة .,

ولأنج معلمة ممتازة اكيد الانظار بتكون عليج ., فأنتي نمي نفسج اكثر واكثر .,
وحطي في بالج مراقبة الله لج .
وان الله مايخليج.,

الله المستعااااان .,
(:

نفس مأساتي

والله ابتلشنا بالناظرات>>>>>>ينسون انهم في يوم من الايام كانوا مدرسات!!

انتقلي حبيبتي
اهم ماعليج صحتج ونفسيتــج

انتقلي باقرب وقت ممكن ^-^

نقلي الله يعوضج باخير منها يارب

هونيها ،،، وتهون ،، وكملي السنة و إنتقلي السنة القادمة إن شاء الله

رح ينقلونك معلمة بكل لحوال و يمكن ترتاحين،، ومن واقع خبرة إذا ما إرتحتي إنتقلي أحسن لك

حبيبتي قلبي معااك بجد … بس بقوولك شغلة يمكن تهون علييك

وتقبليها من اختك الي صارلها زمن في التدريس …. شوفي يا قلبي

التعامل في المدرسة ابدا مافيه رصيد … يعني لا تقوليين انا من زماان او المفروض يكون لي

مكان عندهم … لا المدرسة مثل مكينة البانزين … في نهااية الدواام تتصفر كل الحسابات

وبااكر يوم جديد بحسابات جديدة مالها شغل بامس او اول امس او السنوات الماضية

وللاسف هالشي ماصار عندنا الا من الحريم وصلوو للمناصب … ولعلمك المتميز دائما ضحية تميزه

والي ما يغيب ضحية التزاامه واخطااءه رغم انها بسيطة بس تكون واضحة ببساطة لانه متميز

اما الانسان الي يغيب ويسكب عليهم وعلى دواامهم مريح حاله وماله اخطااء

وحتى لو انتقلتي بتلاقين نفس السيااسة مع فارق الوجووه

عشان جذييه حبي دواامك عشاانك انتي … ولا تسمحين لاحد يكدر علييك حتى لو المديرة

ولعلمك افادات المدرسة مالها اى اثر مهني لانك تكتبين السبب اما الي ممكن تخاافين منه

الافادة والاندار لو وصلك من المنطقة من مكتب المراقبة … بس افادات المدااارس مجرد تهويش

كلامي هذا مو مجرد كلام الا تاكيد لاني اعرف قوانينهم وانا اصلا مديرة مساعدة

ارتااحي وطنشي وروحي دواامك ولا تخلينهم يكرهوونك في شغلك

حبيبتي آقري سورة البقره
شوفي تجآرب البنآت عن هالسوره وايد زينه
< انآ طالبه وبدآية هالسنه صآرت فيني ضيقه ..
ماقدرت ادآوم اول جم آسبوع
مادري شفيني يقولون عين
بس سمعت عن سورة البقره وآلتزمت آقراها
< مو يوميآ بس متى مافضيت يعني يومين آو 3 بالاسبوع
< وكنت آفكر بآشيآء سلبيه وكانت حيآتي آكتئآب
بس وآيد تحسنت
< وقطعت عن الآيه والحين رآده بقووه

اذا متضايقه او عطي نفسج فرصه وفكري بعدها قرري اذا تنقلين او لا بصراحه شي يقهر ليش هالدقه الزايده

بعد عمري حبيباتي والله ما قصرتوا صج خففتوا عني

الله يجزاكم كل خير

والله يا بنات اني ودي استقيل واقعد بالبيت بس انا محتاجة الوظيفة :eh_s(

انزين المدرسات اللي درسوا صبيان يقولون مدارس البنين اهون احنا مشكلة مدرستنا نموذجية وشغلها وايد ما يخلص ومتشددين حيل واحس اني مراقبة هالاحساس بروحه قاتل
والمدرسات كله متوترين ويكرفون حشى عمال

ابــــ ابــــ ابــــ ابــــ

شوفي حبيبتي .. اذا لايعة جبدج من المدرسة .. احسن شي تسوينه انج تنتقلين ..

تبين الصراحة .. نصيحة من اخت لي اختها ..

عطي التربية طاف .. واشتغلي بس عشان ربج .. لا عشان تقييم ولا شي ..

أنا طبعي خايس .. وليلحين ما اتعلم وكل سنة عن سنة انقرص .. انا احب اشتغل حتى لو ما عطوني شغل .. انا حابة الشغل بشكل عام .. وحتى لما تكلفني رئيسة القسم والا الموجهة بشي اقول ان شاء الله وتلقيني خلال يومين بالكثير خالصة الشغل ..

بس التربية موكفو .. سوي شغلج الأساسي .. عطي حصصج واخلصي فيه لوجه الله وحق اليهال .. سوي درجاتج .. وجان معطينج اشراف اداري او مربية صف .. سويهم وخلصي .. بس لا تسوين لا اكثر ولا اقل ..

والله مو كفو احد يشتغل لهم .. ولي اشتغلتي يكرفونج تكرمين جنج خروف .. مو ادمي .. وفي النهاية يخلون غيرج ياخذون افكارج ويطبقونها .. واللي انتي سويتيه يقطونه تكرمين بالزبالة .. وتصير الفكرة فكرتهم ..

وسعي بالج .. يا انج تقعدين وتصبرين وتوكلين امرج لله .. او انج تنتقلين وتشترين راسج ..