كارهة الريال شنو اسوي فيها

السلام عليكم بنات ..
هذا أول موضوع أنزله بهالمنتدى ..
والسالفة مو لي لرفيجتي ..
آنا متزوجة الحمدلله بس اهي مخطوبة وأحس مو عارفة شقول لها ..
السالفة قالت لي اياها واحس آنا لو مكانها يمكن بزعل بس بعد مو عارفة شقول لها وشلون أصبرها ..
أتمنى ألقى رايكم بالموضوع

***

السالفة الله يسلمكم ويعافيكم انها من جم شهر كانت بمناسبة وشافتها أم الولد ..
وشكلها كانت من الله تدور وحدة لولدها يبي يتزوج زواج تقليدي ..
وهذي الأم أصلاً شايفتها كم مرة بس بآخر مرة شافتها مو متعدلة واعجبتها ..
وما صار يومين إلا واهي متصلة تبيها اهي ..

والبنت قعدت تبجي ما تبي تتزوج لان عندها اخت اكبر عنها قاعدة ..
والمشكلة انه أنسب لاختها الجبيرة ..
بس سبحان الله نصيب والأم اعجبتها الأصغر ..

ومرت الأيام والبنت مو راضية وتبجي تترجى امها ..
وامها استحت ترد الناس وقالت لهم حياكم الله ..
وقعدت تصبرها تقول لها انطري خلنا نشوف الولد ومايته بعدين محد راح يجبرج ..

اهي قالت هالكلام من صوب وبسرعة يوهم زيارة ..
وما صار أقل من أسبوع وجاهم الولد يشوفها ..
وابوها اول مرة يسأل عن الخاطب قبل لا يردون عليهم انهم يجون او لا ..
والناس ما ذمته ولا شي بالعكس مدحوه وقالوا الكل انه فيه خير وجذي ..
بس يعني وظيفته ع قده
وأكثر شي سمعته انهم قالوا عنه (اجتماعي)
واهي حطت هالشي ببالها لانها مو حدها اجتماعية ..

بس تفاجأت لما دخل يشوفها بواحد ينتفض ومرتبك ومستحي وكل شي ..
واصلاً كل عايلته وعيالهم موجودين معاهم ..
يعني كلش كلش مو ذوق ..
وما قعد يمكن اقل من 5 دقايق وقام ..

واللي صدمها أكثر ان اهله كانوا هم مستحين منها ..
وما كو احد سألها وين تدرسين ولا شي ..
اهم يعرفون كل شي عنها اصلاً بس يعني على قولتها ذرابة بغيتهم بس يسئلون ..

وتمت فترة طويلة لين ما ردت عليهم ..
وقعدت اختها اللي اكبر عنها ومو متزوجة تحن على راسها وافقي ووافقي ..
حتى لما قالت لاخوها مابيه عصبت هالاخت عليها مو زين والولد ما عليه كلام ..

وكانت فرصتها ترفض بس اهي اعتمدت على صلاة الاستخارة
+
فكرت بان علاقات وايد بتتدمر لو ارفضت الولد ..
اهي كانت ما تبي تشوفه يعني تقصر الشر وما ايون ..
بس جذي جد وهدايا رايحة وهدايا جاية ..

وسبحان الله مع الأيام حسيتها اقتنعت بس مو اللي متحمسة تتزوج لان في زوج ..
لأ متحمسة عشان تكشخ وتطلع وجذي مول مو مفتكرة فيه ..
أحسها جذي ظلمت الولد بالرؤية الشرعية لانه ارتبك ..

وانا عن نفسي احس ما ينلام مع لوية اهله ودرزن العيال كلهم امقعدين ..
والله اكسرت خاطري يوم قعدت توصف شصار لها وشلون كانت مصدومة!!

ومالكم بالطويلة وبعد ما شافها طولوا حيل حتى يوا يحددون المهر ..
وما حددوا الملجة ..
وامها مالها غير انها تقول ان ام الولد باردة وما تعرف تتصرف عشان جذي مو قادرة تلومها ..
وصارت ظروف وتأجل الموضوع يمكن للصيف وتشققت رفيجتي بعد ما عرفت ..

والحين بتسئلوني شنهي المشكلة ..

أنا بقولكم ..
اختها اللي اكبر عنها بعد جم شهر ..
جاها واحد منصب واسم وكل شي وتقدم لها ..
لما قعدت مع اهله كانوا حبوبين وقعدوا يتغشمرون معاها ويسولفون ..
ولما اهو قعد هم كان يسولف ورقيق وجذي ..

يعني عكس اللي صار لرفيجتي ..
رفيجتي صح كأي انسانة بتفرح وجذي لاختها بس بتشيل بخاطرها ان اهي ما صار لها هالشي ..

بس بعد هالسالفة قامت تكثر المقارنات ..
عنبو انهم بيت واحد وثنتيناهم مخطوبات ..
والمقارنة طبعاً أغلبها لصالح خطيب اخت رفيجتي ..

مع ان للأمانة اخوان رفيجتي قالوا اثنيناتهم نفس الشي ..
بس الفرق ان الاولاني كان مستحي وهذا شوي من اول زيارة خذ عليهم ..

المشكلة الحين ان رفيجتي تدعي ليل نهار ان يصير شي ويتكنسل الموضوع ..
تقول كرهت الولد واهو ماله ذنب بسبب هالمقارنات التافهة
وكله تحجي عن عرس اختها ومو مفتكرة ان اهي بعد بتتزوج ..
ومن ينطرى اسم خطيبها تنقلب خلقتها 180 درجة ..
مو عارفة كيف أخليها ترد الأولانية ..
أحسها كارهة الريال وكله تقول انا صابرة الحين واذا طلع مو زين والله برد مطلقة وما بقعد ..
متشااااااااااائمة يا جماعة ..

شنو رايكم وشنو تحسون لازم اقولها ..
آسفة طولت عليكم ويمكن المشكلة تافهة بس حاسة ان رفيجتي من بعد هالموضوع صايرة وايد جامدة وهالشي مضايقني وايد

الله يهدي سرها

الله يهديها

تستعبط هاذي!!
خل تطلب الطلاق دام مو بالعته
والله يهديها

اهيا مو متزوجته بالاساس .. بس خطبه وحددو المهر عدل !!!!!!!!!!!!

عموووووووما ختكبر عقلها عن هالسوالف والزواج والطلاق مو لعبه .. بالعكس المستحي احسن من الجريء تحسينه بريء مو متعود .. اكيد مو الكل جذي بس هذا اللي اشوفه .. و يبين انهم عايله على نيتهم وحليوين اهيا خل تستخير وماكو شي غصب .. وعلى فكره اعرف وحده لاخر لحظه واهيا تبجي وطولت سالفتها وهواش ونجره وماتبيه وقصب خذته بالاخير كاهي مااشاءلله مرتاحه وتقول انه بالزواج غييييير وبالخطبه شخصيته غير .. كانت تكلمه حزتها ..

فلا تحكمين عالشخص الا بعد العشره ,,

ودام انها من كلامج مو بالعته لا تبلش ولد الناس

هي بالأساس مو مقتنعه فيه ,,, ليش توافق كان قالت لأهلها ما أبيكم تغصبوني وخلاص
أنا أول ماتقدم لي زوجي هم ماكنت مقتنعه فيه بس أعتمدت على سمعته وعلى الإستخارة أكثر شي ,,,
بس ألف الحمد لله والشكر هذا حنا عايشيييين والله يديمنا لبعض ولا يحرمنا من بعض ماشاء الله ,,
وإذا على المقارنات لاتتبع المقارنات لأنها بتتعب ,, ولاتحكم على هالشي من أول نظرة والا أول جلسة ,,
أنا بنت أخوي جريئة وإجتماعية يوم الشوفة الشرعية حتى 5 دقايق ماظلت وطلعت وهي تبجي ! من الحيا ولا تكلمت معاه ولا شي وتمت واقفه بس !
وطبيعي أنه بيرتبك الرجال المفروض في الشوفة مااحد موجود غير أبوها وهي وهو وإذا أمها وأمه بسسس مو ألف واحد << سوري بس هذا الواقع !

بس نصيحه دامنه زين ومااااعليه كلام الولد خل تستمر وياه وتبتعد عن المقارنات وإذا قال لها أحد فلان وفلان تقول لهم كل واحد له شخصية يختلف عن الثاني بحكم البيئة اللي عاش فيها ,, وترا الواحد مايبين الزين و الشين اللي فيه إلا مع العشرة ,,,
وقولي لها إذا ماتبيه خل تفل الخطوبة من ألحين أحسن لها ,,

شي طبيعي بيكون مرتبك فهميها هالشي
وبعدين اذا اهو ع قولتج حياوي خل يطلعون مكان وتبدى اهي بالكلام معاه
وعلى شوي شوي يتعوود عليهم وعلى طبعهم
ولا تقاااااااااااااااااااااااااااااااااارن جذي راااح تكرهه اختها وتهدم حياتها
اهئ توها ما شافت من الولد شي عشااااان تكرهه
هديها وطمنيها
والله يوفقها

ترى المقارنه ماهي الا حسد على فكرة

اهي عليها من حياتها شعليها من اختها العوده خل تدعيلها بالخير دامها مستانسه

اما اهي ماهي مجبورة توافق ماتبيه خلاص تقول مابي مو غصب

وماعتقد سالفه انهم ناس يستحون عيب كبير

انا من هالناس ماتأقلم بسرعه يعني شنو منبوذه؟؟ تفكير معقد صراحه

يعني انا مااشوف في مشكله تقول حق اهلها مابي اتزوج وبس مو مرتاحه

شنو المشكله خو مو ريلها اهوا لا اتزوج وباجر تتطلق ولا تقارن خو مو ريلها خطيبها

باجر اييها تصيب احسن ومو بس ابي اتزوج وتفتك باجر مردها تتطلق لازم من البدايه في قناعه ولازم تكون مرتاحه

واللي صدمها أكثر ان اهله كانوا هم مستحين منها ..
الحين المفروض تفرح من هالشي وانا اقول ان الحب ايي بعد الزواج بس اذا كلش مو متقبلته او كارهته لسبب خلها اتصلي استخاره لان القبول شي مهم

واللي صدمها أكثر ان اهله كانوا هم مستحين منها ..
الحين المفروض تفرح من هالشي وانا اقول ان الحب ايي بعد الزواج بس اذا كلش مو متقبلته او كارهته لسبب خلها اتصلي استخاره لان القبول شي مهم

شلون تحكم على الريآل من آول نظره
خو اكيد بكون مستحي ومرتبك هالشي طبيعي عند كل
الاوادم .. عالبنه ريال يعني لازم يكون جريء
بالعكس هالنوعيه من الريايل عشرتهم حلوه وسلسه
تيب خاليتحجون فون مع بعض يكون اسهل عليهم
يتفاهمون ويفهمون بعض .. وبعدين مجال المقارنه
دوم غلط لحد يقارن حياته بحياة غيره الان كل شخص يختلف عن ثاني وكل عايله غير عن العايله الثانيه ..
رفيجتج مسويا سالفه من غير سالفه مو سبب هذا يخليها
تعوف الريال وتكرها وتعب نفسيتها هيك .. خالتعطي روحها مجال معاه بعدين تحكم مو من اول مره
فهميها هالشي .. والله يتمم عليهم بالخير ..

ممممم

مشكورين خواتي آنا قريت اللي قلتوه اهي صج أحسها مبالغة ..
بس أعرفها مو حاسدة اختها والدليل انها متحمسة لزواج اختها من الحين وتفكر ..
حتى كل شوي من يوصلها شعر حب ولا صور تعطيها اختها عشان تطرشهم لريلها بعد الملجة ..

بس هي اللي ذبحها سالفة المقارنات أعرفها حساسة حيل ..
واهي مستحيل تقول هالحزة ما بيه مو حلوة بحق أهلها اهي مو مفكرة بنفسها ..
آنا قلتلها Too late انج الحين تقولين لأ ..
واهيه مصلية استخارة فوق العشر مرات ..

الله ييسر

صج مشكورين وانا بخليها تقرى هالكلام وان شاء الله خير ..