عروس قديمة

السلام عليكم

حبيت اكتب هالموضوع لانى عروس قديمه (متزوجه من زمان) وعندى 4 اطفال الله يحفظهم ويحفظ عيالكم يارب

قصه زواجى ان ريلى كان يبى يتزوج واهوه ولد خالتى يبى يحفظ نفسه وانا كنت صغيره بس اقتنعت فيه لانى حسيت انه قادر على تحمل المسؤليه

وماراح تصدقون اذا قلت لكم انى كنت ادرس بالثانويه … بس كونه ولد خالتى وعمره كان 21 سنه بس وافقت امى وانا وافقت لانه كان وايد زين معاى وله مواقف طيبه مع امى

تزوجنا وسافرنا شهر العسل … ودانى باريس وجنيف ولندن

ماقصر والله بس كانت علاقتى فيه مو قويه واستمر الحال ويبت بنت تهبل مثل القمر وهم استمرت علاقتنا عاديه مايسولف معاى وايد ولايكلمنى بالتليفون وايد ولا يهتم بالى اقوله لكن صبرت وقلت اهم شى انه ريال زين مايأذينى بشى

استمر الحال لين يبت ولد وعلى فكرة اهوه الى سمى البنت و الولد وكنت مقتنعه بقراره لانه عنده ذوق بالاسماء بصراحه مابى اطول السالفه … بعد ماكبرت وكبر اهوه معاى تعدلت الاوضاع وقام يكلمنى وايد و الى قبل مايتغزل فينى قام يتغزل والى قبل ماكان يدزلى حتى مسج بدى يدزلى مسجات حب وغرام

ويفاجئنى بهدايا سفرات مفاجئه طبعا كلكم تحبونها و يقولى كل شى فى باله ….. الفكره ياخواتى ترى الريال مو كامل ولا فى ريال كامل ولازم نشوف الحسنات الى فيه قبل لانفكر بالسيئات الى فيه ومانقارن بينه وبين احد غيره لانها راح تفتح باب ماراح يتصكر

واذا كان الريال فيه شى ماتحبينه لازم تقتنعين انه راح يتغير واكيد راح يتغير لان انتى صبرتى عليه واهتميتى فيه وباشرتيه وعطيتيه كل شى يحتاجه

لكن تصدقون انا مع ان عندى 4 يهال احس انى لا ازال عروس

وبالتوفيق لكل عروس وكل عروس قديمه

الله يهنيكم يااااااااااااااااااااااااااااااااااااااااااااااااا اااارب

مرحباا

ماشاءالله عليك يا هدايا الله يوفقك و يتمم هالسعاده بينك و بين زوجك و يحفظكم من كل شر
بصراحه مادري كيف اشكرك احس كلامك رفع فيني حيل
تعرفين هالايام كثرت البلاوي و مصايب نسمعها و خلافات زوجيه ياكثرهاا
و انا عروس مقبله على زواجي للحين مارحت بيت زوجي بس كنت خايفه حييل
احس من كلامك عطيتيني دافع قوي ان الحياة الزوجيه حلوه انا دايم احس انها حلوه لكن هالاحساس
كل مازدت فيه اسمع شي يحبطه بلحظه ..

الله يهنيكم و يسعدكم طول العمر ..
ويارب تكتب لنا الي فيه الخير ..
و تسخر لي زوجي و تعينني على رضائه

شكرا

الله يهنيكم يارب..

ويتمم عليكم ..

الله يوفقج ويسعدج دايما

الله يوفقج

تصدقين انا لما اشوف غيرى اقول انا ماعندى شى ولا انا مثلهم بهذى السعاده

فى وايد حالات اسعد منى ويمكن لان انا قنوعه بالى الله كاتبه لى احس بالسعاده ….بس هذا المفروض الى تحس فيه كل بنت
وكل شى يتغير ويتعدل سواء كان فينا او فى الريال … وللسن احكامه كل مانكبر كل مانحس ان احنا قربنا من بعض اكثر وافضل زواج هو الى يزيد الحب فيه بكل يوم مو الى يقل فيه مثل بعض البنات الى تحبه وتعطيه كل شى قبل الزواج ولما يتزوجها تحس انه شخص ثانى

انا كتب هالموضوع على شان اوصل رساله
كل انسان يحس بالسعاده بطريقته والدنيا مو سوده … انا اشوف الدنيا لونها رمادى فيها من الاسود والابيض ولازم نفرح بالابيض ونتاقلم مع الاسود ونتعامل معاه بعقلانيه

وبالتوفيق لج يارب والله يرزقج السعاده يارب

الله يتمم عليج هسعاده يارب دوم

الله يتمم عليج ..

هذا اللي يسمونه القناعه والصبر
ونادر ما نشوف في بنات هالوقت من هالصفات

الهم يا كافي المحاكم متروسه من هاليهال للي توهم متزوجين وعلى اقل شي يصير الطلاق

الله يهنيج حبيبتي هدايا وان شاء الله يستفيدون البنات من تجربتج

الله يهنيكم يارب

خووش كلام وفعلا كلماتج تدفع بالانسان الى مواجهة الصعاب ويصبر اكثر واكثر والله على هالصبر اكيد بيعطي عبده
مشكورة وفعلا كلامج هون علي الخوف اللي مأزمني لان عرسي قرب حيل وحسيت براحه ان في رجال زينين مو كلهم شينين مثل ما اسمع

الله يوفقج بحياتج ويستر عليكم ويوفقكم دنيا واخرة

لما كتبت هالموضوع ماكنت ابى اقول انى سعيده وايد وان ماعندى مشاكل ولا ابى الناس تهنينى بالى انا فيه

انا كان بخاطرى اوصل رساله ان السعاده لها اكثر من وجه واهم شى البنت تفرح بالى عايشه فيه لان فى مثل او مقوله

مانى ذاكره بصراحه بس تقول( لو اطلعت على الغيب لخترت الواقع ) واقع الزواج جميل بحلوه ومره واهم شى لما تشوفين عيالج شلون يكبرون بتحسين بالسعاده حتى لو ريلج فيه بعض العيوب

هذا كان قصدى

والله يهنى الجميع بالحياة الزوجيه ويهدى كل ريال ومره على الخير

الله يوفقج ويهنيج مع زوجج امييين يارب ..

صاجه مفروض الوحده تكون قنوعه واخر شي راح تحصل السعاده بأذن الله ..

انا وحده الصراحه ما اتخيل اعيش حياتي بدون حب وعاطفه بس اكتشفت ان مو كل شي حب ومو كل الحياة سعاده ..حاليا ً اهم شي عندي الاحترام المتبادل هذا اهم شي ومايمنع الحب يجي بعدين

تحياتي لج .. عبث طفله

الله يزفقج ويهنييج ويسخرلج ريلج يارب