|
|
تعرف الصلاة؟ أه..عاشرتها؟ لأ..تبقى متعرفهاش
كانوا يقولولنا ان اللي عمره ما حب ميعرفش طعم الحُب..واحنا بنقولهم اللي ما بيصليش او صلاته مش صح عمره ما هيدوق حلاوتها ولذتها.
هحكي ليكم قصة واقعية من الحياة..واحد مهندس ديكور شغال في شركة كبيرة، في نهاية خدمته في الشركة كان اخر يوم ليه فيها فطلب منه مديره اخر طلب وكان انه يعمل ديكور شقة وبعدها خلاص يقدر يسيب الشغل … وافق المهندس بس مكنش راضي ولا سعيد من الطلب ده…بالفعل راح وخلص الشقة وطبعا مش باهتمام ولا باتقان…وراح سلمها لمديره قاله انا خلصتها اتفضل المفتاح..رد المدير عليه وقاله : لا الشقة دي هدية من الشركة ليك بمناسبة نهاية خدمتك!
وقتها بس المهندس ندم قال يا ريتني اتقنت الشغل فيها وعملته باهتمام!
زي بالظبط لما ربنا طلب منا اداء الفرائض الخمس وده مش ليه ده لينا احنا..اتقانها والاهتمام بيها هينفعنا احنا مش هينقص ولا يزيد من قدره تعالي في شيء.
الصلاة لو هنقضيها حركات لفوق وتحت وبس بتساعد بشكل كبير على الانبساط النفسي وده كلام علمي فما بالنا لو ركزنا فيها واستشعرنا اننا بنتكلم مع ربنا ومركزين في كلامه ومستمتعين..في ايه أجمل من كده؟
الركوع والسجود..في اليوم لواحد بنسجد لربنا 34 مرة.. افتكر بعد ما كنا بين يدي ربنا العظيم واستشعرنا مدى ضعفنا قدام ربنا مش هيكون في قلبنا ولا ذرة من الكبر ولا الغرور هيعتب شخصيتنا في التعامل مع الناس.
نداء الصلاة ” حي على الصلاة” لما تسمعه ويأثر فيك وتجري على المسجد عشان تلبي النداء ..بيعلم الانسان يكون عنده عزيمة قوية لما يؤذن حد فيه للجهاد في سبيل الله وقتها مش هيتردد لحظة انه يروح يجاهد
صلاة الجماعة مش مجرد انك بتاخد ثواب اكتر لأ كمان فكرة الصفوف المتساوية اللي مفيش فيها حد سابق حد كلهم زي بعض بتعلمك الشعور داخلك بالوحدة بين كل المسلمين من العالم كله..كل المسلمين رايحين مكان واحد لرب واحد.
لو جربنا نلزم نفسنا بمواعيد الصلاة تلقائي هنلاقي نفسنا ملتزمين في مواعيدنا مع اهلنا واصحابنا والناس واحترام المواعيد ده اظنه شئ من الاشياء المهمة في الشخصية.
كل صلاة سبحان الله بتيجي في وقت الانسان هو احوج واحد ليها بس هو مش حاسس وبيأجلها او بيطنشها خالص ومش كده كمان مع الوقت وانت بتواظب عليها هتلاقي شخصيتك اتغيريت كتير للاحسن.
صلاة الفجر لوحدها ليها تأثير مهم جدا.. انك لما تصحي في وقت الفجر ده بتقطع وقت النوم اللي فيه الاحلام ،الوقت ده كل ما يزيد كل ما الاكتئاب يزيد فالواحد يقوم الصبح مرتاح ومبسوط ونشيط..سبحان الله
صلاة الظهر واننا لازم نصليها في ميعادها لان وقتها بتكون مرهق من الشغل بقالك ٦ ساعات فهي تيجي تفصلك وتريحك بدنيا وذهنيا فترجع البيت لمراتك وولادك واهلك مرتاح واعصابك هادية
صلاة العصر “الصلاة الوسطي” ان وقت العصر الساعة ٣ ده بيكون الانسان في اقصي نشاطه والادرينالين بيزيد فهي تيجي تفصله عن متاعب الدنيا ومشاكلها وتهديه وتوجهه للخير بالطاقة اللي عنده دي
صلاة المغرب وصلاة العشاء وقتهم متقارب جدا يكون الانسان في الوقت ده اصبح اقل ارهاقا فيقدر يصليهم في مواعيدهم بكل سهولة
صدقت يا حبيبي يا رسول الله لما قلت : ” أرحنا بها يا بلال “ منقول