|
|
قوة كويتيات شلونكم
شخباركم
بنات انا مطلقة صارلي اكثر من سنة وعندي ولد وعايشه عند اهلي
الحين كلنا نعرف ان رضا الله من رضا الوالدين وان الجنه تحت اقدام الامهات…زين بنات انا امي عصبيه علي بشكل مو طبيعي وماترضى عني لو مهما اسويلها اخواني يزفونها على اقل شي ترضى عنهم وتدعيلهم بالهداية وانا الي اسكت عنها ومارد عليها واشتري رضاها بالهدايا ماترضى عني و تسوي معاي مشاكل من تحت الارض تالف اشياء واذا ابوي او احد بالبيت تحجى قالها شوي شوي عالبنت تعصب ماتبي احد يدافع عني بنات لو اقعد اقولكم من الحين لي باجر ماراح اخلص بنات انا تعبانه مادري شسوي
امي ماذيتني بشكل موطبيعي صحتي قاعده تروح راح يصير فيني سكر من الزعل ومن كثر مااحط بقلبي
الحين انا بسالكم وابي فتوى عن هالشي
انا امي بدون سبب ومرات اسباب تافهه حتى ماتنعد سبب تزفني وتصرخ وتدعي علي
كلنا نعرف ان دعوة الام مستجابه انزين وانا بحالتي شلون ؟
اذا بدون سبب دعت علي وقالت انا موراضية عليج الله يستجيب ولالا؟
بنات اهيه كله تغلط وانا اسكت ومع هذا ادعي ربي ان يحنن قلبها علي وانها ترضى عشان ربي يرضى
جاوبوني بنات الله يجزاكم خير اذا امي ظلمتني ودعت علي هل يستجاب دعاءها ؟
واذا انا قاعده ادعي ربي بشغله (الزواج مثلا) هل تتوقف هالشغله وربي يحرمني من الاستجابه بسبب دعاء امي علي ؟
بنات جاوبوني بلييز قاعده احاتي
بس عسى الله يصبر قلبج و يحنن امج عليج …
يمكن اهي متضايقة عشان تطلقتي و ودها ان الله يرزقج بولد الحلال في ناس جذي ما يعرفون يعبرون عن مشاعرهم …
امممممم يمكن هالتفسير ما يقنعج … بس مهما كان هذي امج استحمليها و لج الاجر ان شاء الله …
احنا مو احسن من الرسل و الانبياء اللي استحملوا اباءهم مثلا سيدنا ابراهيم عليه السلام استحمل ابوه وكفره ..استحمليها عسى الله يهديها
و لا تحاتين ربنا عادل اذا انتي مو مضايقة امج و بارة فيها بعد ليش الله يعاقبج !!! انا ما افتي بس اقول اللي اعرفه
ع العموم عسى يرزقج بولد الحلال اللي يعوضج خير …
أختي الغالية
أسأل الله العظيم رب العرش العظيم أن يفرج همج ويحنن قلب أمج عليج وترضا عنج … آمين
وأسمحيلي أسجل أعجابي فيج وبأخلاقج وببرج لأمج لأن بهذا الزمن قليل نشوف بنات يبرون بأمهاتهم مثل برج للأسف نشوف أمهات يعاملون عيالهم أحسن معاملة وعيالهم للأسف ما عندهم ألا الجحد والنكران والعقوق
شوفي يا قلبي المثل يقول ( الدعاوي على قد الظلايم ) وأنتي أن شاء الله ما عقيتي أمج ولا ضريتيها ولا زعلتيها فلا تخافين وحتى الدعاء لما يدعيه الأنسان يرتفع للسما وأن كان الشخص يستحقه يصيبه وأن كان لا يرجع على من دعاه . أن شاء الله ربي يحفظج ويبارك لج ويرزقج الزوج الصالح . لأن الظاهر أمج زعلانه لأنج تطلقتي وأنتي تعرفين بعض عقليات بعض الأمهات الله يصلحهن يحملون بناتهم ذنب الطلاق وكأنه جريمة . بس ما عليه أنتي ماشاء الله عليج عاقلة وفاهمة ونحسبج صاحبة خلق ودين مما شفنا من معاملتج الحلوة لأمج وحرصج على رضاها
أنتي أستمري في بر أمج وأكثري من الدعاء بأن ربي يحنن قلبها عليج وأن ترضا عليج . وأنتي أن شفتيها معصبة أدعي بهذا الدعاء ( يا ولي نعمتي وملاذي عند كربتي أجعل نقمتها علي برداً وسلاماً كما جعلت النار برداً وسلاماً على أبراهيم )
وأحنا الحين بالعشر الأواخر ألحي بالدعاء . وكل يوم حبي رأسها وأيدينها ورجولها وقولي لها يما رضاج علي بالدنيا . وصدقني ماردها بتحس بيوم من الأيام لما تشوف الفرق بين معاملتج لها ومعاملت أخوانج .
ونصيحة أخيرة وهامة أكثري من الأستغفار على كثر ما تقدرين لأنه شفاء لكل داء يعني مو 100 مرة ولا 200 لا 1000 أو أكثر 
حاولي تكسبين رضاها بكل طريقه .. لو شنو ياج منها صدقيني ام او مردها بتفتح عينها فلا تزلين ابد