خانقتني العبرة، رحت لدكتور نفسي وطلع .

السلام عليكم

أنا عضوة قديمه وكثير كتبت مشاكلي مع زوجي سواء اهني أو بالمنتديات الثانية

زوجي ما أعرف أتعامل معاه، كثير عصبي وما يسمعني أبداً حتى سالفة على بعضها مستحيل تكتمل معاه

ألاحقه طول اليوم وصعب يقعد وباله معاي، دايماً باله مشغول ويتهمني بأني السبب بكل شي سيئ يصير !!!

ما نطلع من البيت ولا يحب يختلط مع الناس، صرت منعزلة عن العالم ومادري عن الدنيا

بعد ما فاض فيني إهماله لي وسوء معاملته وعصبيته على أقل شي، قلت بروح مركز استشارات نفسية واجتماعية وبشوف حل لمشاكلنا لأني صعب أكمل بهالوضع، الطلاق صار طول الوقت على بالي

دخلت على الاستشاري وفتحت قلبي وتكلمت وتكلمت وتكلمت ..
الغريب إن الدكتور كان يكمل معاي جملي
وكل صفة أقولها يعطيني عليها مثال صار فعلاً بحياتي
الدكتور حسسني إنه عايش معانا من كثر ما كلامه كان مطابق للي أعانيه !!!!

بنص الكلام قالي :

زوجج يعاني من اضطراب فرط الحركة ونقص الانتباه

سألت الدكتور : هالمرض أسمع إنه خاص بالأطفال
قالي : هو يبدأ بمرحلة الطفولة ويتم تشخيصه بوضوح بسن المدرسة وباستطاعة الشخص السيطرة عليه لما يكبر .. لكن بحالة زوجي هو مو عارف إن عنده مشكلة أصلاً فمتكيف معاها ويشوف نفسه صح والناس كلهم خطأ

والعلاج بيده ولازم يراجع دكتور نفسي وإذا ما ودج تواجهينه لازم تتحملينه وتصبرين عليه وتسايسينه، ولما تصعب أموركم اعتبريه واحد من عيالج وتصرفي معاه بحكمة

يا خواتي أنا متضايقة وايد، وضايق خلقي على زوجي أحس إني ظلمته بشي ماله دخل فيه .. بنفس الوقت أقول وينه طول هالسنين ؟؟؟ زوجي كبير شلون عاش حياته بهالشكل بدون ما يحس إن فيه شي مو مضبوط بشخصيته

محتاجه دعمكم خواتي .. ودي أنفجر بالبجي

سجلت بمعرف جديد بس عشان أفضفض، هالخبر مستحيل يطلع لأي شخص حتى له شخصياً لأنه بيتحول لوحش كاسر ويتهمني إني أتبلى عليه وإني أنا المريضة نفسياً .. أتكلم عن تجربة

الله يعينج

كشختي لنفسي كتبي بقوقل : فرط الحركة ونقص الانتباه

أغلب المواضيع تتكلم عن الأطفال بس تخيلي الوضع مع ريال كبير

اللهم أجرني في مصيبتي وأخلفني خيراً منها

زوجي ياي على عصبية ومرات يصير عدواني ما يتحكم بنفسه واشكثر كنت أهدد وأتوعد وأترك البيت

تخيلي الدكتور يقولي لا تلومينه تراه يغيب ما يدري اشقاعد يقول ولا اشقاعد يسوي ولازم ما تناقشينه ولا اتعاندينه ترى إنتي الخسرانة

انتي الحين عرفتي علته حاولي تتعلمي طرق التعامل معاه اعتبريه مريض تثقفي حول هالموضوع وان شاء الله شوي شوي تسيطري على الوضع

وان شاء الله ربنا بيسر الامور وبحسنها يارب العالمين

لاتزعلي حبيبتي كلها حسنات الك ،ـ والواحد ما بياخد معه من هالدنيا غير اافعاله ، فااكسبي اخر بهالزوج ، الله يريحك بالك يارب حبيبتي