❃❂❁حريم الاخوان،،مابين الرفض والقبول والسلبيات والايجابيات❃❂❁

من بعد زواجها رح تدش على حياة يديدة مع الزوج واهل الزوج واشياء كثيرة رح تتغير عليها

من حيث الاسلوب

التعامل

الذوق والذرابة

الاخلاق

وامور كثيرة تتعلق فيها من خلال حياتها الزوجية

اذا كانت الزوجة رافضة مبدأ تفضيل الاخت أو الأم او اي شخص غيرها

فهذا ممكن يسبب لها بعض المشاكل ويخلق العداوة والكره بينهم

هذا شي

والشي الثاني ،،

الزوجة اللي تحن على زوجها بمقولة :

شوف اختك

شوف اخوك

شوف أمك

شوف ابوك

ترا ماكو انسان كامل والكمال لله عز وجل

كل انسان وله سلبيات وايجابيات

وطبيعة الزوج ما يحب الزوجة اللي تحن وخصوصا في مثل هذي الأمور

لأنه أغلب الرياييل عندهم في المقدمة أهله ومن ثم زوجته

واذا الزوج يبي يرضي الطرفين

لازم يعدل بينهم

وما يظلم اي طرف في حال صار في خلاف بسبة كلمة او تصرف ويحل المشكلة

والمشكلة ان تمت قائمة وماقدر يتصرف رح يكبر الخلاف ويصير مثل شرخ في علاقة الزوجة مع اهل الزوج وممكن يتولد الكره والحقد بينهم

يا زوجة الأخ،،

ان فرضتي احترامج على اهل زوجك من البداية وعرفتيهم على شخصيتج

رح يحترمونج طول العمر ورح يزيد من رصيد محبتهم لج ومحبة ريلج لج بعد

انتي مو غريبة عليهم
صرتي منهم وفيهم

ولما يجي منج عيال رح يشيلون اسم العايلة
وبجذي ارتباطج فيهم صار قوي

واليهال علميهم من البداية يحبون اهلهم ويحترمونهم مهما صار في مشاكل وخلافات

وان صار العكس مارح تخلصين من المشاكل وعوار الراس ويقولون عنج انج خليتي عيالج يكرهون اهلهم

خلي كل شي منفصل عن بعض

المشاكل بصوب

والتربية بصوب ثاني

بتكلم الحين بالنسبة لأسلوب الزوجة

كل انسان وله طبعه الخاص فيه واسلوبه الخاص

الأسلوب الراقي في كل انسان يخليه محبوب من الكل

لازم تعرفين تتعاملين مع اهل الزوج كل واحد على حسب طبعه

وفي النهاية كل انسان يسوي باصله الطيب

وان واجهتي أسلوب ما اعجبج من واحد من اهل زوجك

لا تعاملينه بنفس أسلوبه

عامليه باسلوبج الراقي اللي تربتي عليه في بيت اهلج وبجذي رح تفرضين شخصيتج الحلوة عليهم في كل موقف يصير

لكن الا الكرامة

ان مسها شي

لازم يكون في تصرف سريع وسليم بنفس الوقت ويحتاج عقل كبير يفكر قبل ما يتصرف ويقرر

وحاولي بعد انج ما تتدخلين في حياتهم الشخصية مهما كانت الا اذا تم الطلب منج واخذ رأيج

علشان تفكين نفسج من عوار الراس

واذا اهل الزوج واجهوا مشكلة معينة او مشكلة تتعلق باحد فيهم
قدمي المساعدة لهم بالشي اللي تقدرين عليه حتى لو كان بالكلمة الطيبه

المهم انج سويتي شي حلو ويتسجل في رصيد حسناتج ان شاءالله

خوات الزوج اعتبريهم مثل خواتج وخلي معاملتج معاهم حلوة وحنني قلب ريلج عليهم ودوم ذكريه فيهم

ترا الزوج والله رح يحبج اكثر لانج مهتمه بجزء مهم في حياته

ولو كانت معاملتهم معاج مو زينه

خليهم براحتهم ما يشوفون شر
وهم بعد خليج انتي الاحسن ومعاملتج ما تتغير

والزم ما عليج ريلج وعيالج وكل الناس اللي يحبونج

ام الزوج ،،

اللي اهي الخاله

اللي المفروض تعتبريها مثل امج وتحترمينها وتقدرينها علشان خاطر ريلج ورح يكون لج اجر وثواب من رب العالمين

انا ادري انه معظم الخالات تصدر منهم تصرفات وبعض المشاكل تجاه الزوجة

بس هني يجي دورج وتعرفين شلون تتصرفين وياها مهما سوت وقالت

كافي انج مو مقصرة بواجباتج الزوجية وعارفه نفسج انج مو غلطانه بشي

وحطي في بالج

انه كل انسان رح يتحاسب على افعاله واقواله في النهاية من رب العباد

وان تعرضتي للظلم
بس قولي :

حسبي الله ونعم الوكيل

وتمسكي باخلاقج الراقية

أخواتي العزيزات

شكثر في امور متعلقة بحريم الاخوان بس حبيت اتكلم عن الأشياء المهمة واوضحها لكل زوجة

اللي تبي السعادة حقها وحق غيرها

واذا كنتو ما ترضون الاذية لبناتكم واساءة التصرف لهم

عيل لا ترضونه على بنات العالم

احسنوا المعاملة والتصرف مع الزوجة في كافة الامور علشان تحبكم وتقدركم وتتباهى فيكم جدام الجميع

وعلشان يكون الزوج راضي ومرتاح البال

بعدوا عن المشاكل والقيل والقال والغيره لانكم ما رح تخلصون

افرضوا احترامكم عليها باخلاقكم العاليه وخلوها تشارككم في كل شي يتعلق في حياتكم علشان ما تحس نفسها انها غريبه

هذا اللي اقدر اقوله لكم

في نهاية كلامي ،،،

حبيت انقل لكم بعض النقاط المهمة من المعاملة الحسنة:

فوائد المعاملة الحسنة وحسن الخلق

1..حسن المعاملة مع الله يورث التقوى والورع,ومع الناس يكسب ثقة الآخرين فيه وثقته في نفسه.

2…زيادة الألفه والمحبة بين الناس.

3…تجلب البركة والخير للمتعاملين با العماملة الحسنة.

4…دليل حب الخير للآخرين .

5…لا يكرم العبد نفسه بمثل حسن الخلق ولا يهينها بمثل سوئه.

6…حسن الخلق سبب في رفع الدرجات وعلو الهمة.

7…حسن الخلق يحول العدو إلى صديق.

8…حسن الخلق سبب لعفو الله وجالب لغفرانه.

9…يدرك المرء بحسن خلقه درجة الصائم القائم.

10…حسن الخلق يجعل صاحبه ممن ثقلت موازينه يوم القيامة.

11…بالخلق الحسن يكثر المصافون ويقل المعادون.

وعسى ربي يهدي الجميع ويصلح حالهم

ويبعد عنكم كل مكروه وكل المشاكل

وأتمنى ما احد يزعل مني من اي كلمة ذكرتها في هذا الموضوع اللي يهم الجميع

بقلمي الخاص