تجمع رئيسات الأقسام الجدد

السلام عليكم خواتي رئيسات الاقسام الجدد

ارحب فيكم واهنيكم بمناسبة بدا الاجازة الصيفية

وحابة اهني رئيسات الاقسام الجدد مقدما على الترقية واتمنى من الله انه

يعطيكم خير هالمنصب ويكفيكم شره

عزيزاتي رئيسات الاقسام الجدد حبيت نسوي تجمع خاص لنا هني

في هذا القسم الرائع حتى نتناقش فيه استعداداتنا

وكل ما يخص الانجازات والمعلومات اللي نحتاجها باذن الله للعام القادم

متمنية منكن التعاون والتفاعل في هذا الموضوع لما يخدم مصلحتنا

حابه اركز في هذا التجمع على نقاط احس انها مهمة وتدور في راس كل رئيسة قسم مسنجدة
وايضا اللي حابة تضيف اية تساؤلات او نقاط ممكن نستفيد منها او قد اكون اغفلتها اكون جد شاكره
لها

1- السجلات وكل ما يخصها يدءا من اعدادها وتنظيمها وكل ما يتعلق بها
2- القيادة وكيفية التعامل مع القسم والعلاقات الاجتماعية والعملية مع المعلمات
3- المواقف اللي قد تواجه رئيسة القسم في اول سنة
4- اهم الانجازات اللي راح نحققها لاثبات الوجود كسنة ندب
5- مناقشات وتجديات تدور في اذهان رئيسات الاقسام الجدد مع الحلول والاجابات الهادفة
6- مشاركات لرئيسات الاقسام الخيرة للافادة وتقديم النصح

اتمنى اني غطيت اكثر الموضوعات المهمة واذا في اي اضافات حياكم الله زميلاتي

دعوة عامة لجميع رئيسات الاقسام الجدد لكافة التخصصات لجميع المراحل عامة
ولريسات الاقسام للغة الانجليزية خاصة

يالله ابلات ننطلق وسوف تكون هنا نقطة البداية كي نحقق الحكمة التالية

نلتقي كي نرتقي

ربي يوفقكم

هلا والله
ودي اعرف متى يحطون اماكن التعيين؟

الف مبروك والله يوفقكم

انا اهمشي اللي يهمني برئيسه القسم اسلوبها السلس المرن مع المعلمات

كل ماكانت رئيسه القسم حبوبه مع الابلات ننسى الشغل والتعب

موفقين يا رب كلكم ..

انا رئيسة قسم .. انجليزي

خبرتي برئاسة القسم .. سنة واحده فقط لا غير

لي عوده مع موضوع عن السجلات

نصيييحة … بلشوو فيها من الحين …. لان على اخر الصيف يصير طق مطاقق على المطابع و تبدا الدراسة و سجلاتكم ما خلصت !

هذا الموضوع كتبته بمنتدى ثاني من سنه الا شوي ….

—————————————————–
مرحبا رؤساء و رئيسات الاقسام ..

الجدد و القدامى

كل عام و انتم بخير

موضوعنا هذا .. علشان نتبادل الخبرات و الآراء بخصوص السجلات ..

أمس رحت للمطبعة .. بشرق … مقابل المطافي .. تحت محلات التلفونات تلقونها هناك

او شوفو اي مطبعة عندهم تجليد فني

اخترت شكل الملف .. اخترت لون رسمي شوي

مع اني احب اشكال الملفات اللي يغلفونها بالمكتبات .. بس ما تشجعت اسويها .. احس انها مو ستايلي و كلغة انجليزية .. سجلاتنا وااايد .. فالشكل العملي انسب ,, و المسألة اذواق لا غير ,,

المهم طولت عليكم بالحجي ..

سعر الملف الواحد .. 5 دنانير .. و كل اضافة لها سعرها .. الاضافات تتراوح ما بين نص الى 3 دنانير ..

من الاضافاات اللي طلبتها :

اسفنج .. عشان يصير شكل الملف نفس الاجنده

عرفتو ؟

جيوب داخل الملف .. تنفع من الجهتين ..

معدن على الزوايا … لاطالة عمر السجل

الطباعة على الجهه الصغيره من الملف .. اللي بالنص

من اهم الامور اللي ذكرها الموظف .. ان بعد العيد راح يكون مزحوم و السجلات يبيلها اسبوعين مو اقل .. اما الحين .. كم يوم و يخلصون ان شاء الله ..

فشدوو الهمه اذا للحين ما بديتو فيهم ..

و جهزو الطابعه .. و الورق السنع .. و الجيوب البلاستيكيه .. علشان اول ما نعرف مدارسنا .. نبدأ بالطباعه و التعبئة ..

السعر للملف الفاضي .. اذا تختارون ملفات فيها الجيوب .. او دفاتر معينه .. تختلف الاسعار طبعا

انتو شخبار سجلاتكم ؟؟

كل الشكر لاختي .. علمتني ما قصرت و افادتني من خبراتها .. خاصة انها مديرة مدرسة .. يعني سوت سجلات لين قالت بس

الف شكر اخيتي الغالية .. أم مــ

*الصور من الانترنت ..

أهم شي تخافون الله في معلماتكم ولا تفرقون بينهم بالمعامله او تقطين الشغل الأكثر على وحده وتخلين الثانيه

السلام عيكم ابلات
شامرة لكم تفاعلكم

بس حبيت اعرف ترتيب السجلات من داخل
وخاصة ان ماعندنا فكرة عنها بتاتا

سجلات رئيسة القسم … لكل التخصصات الا اذا ذكرت غير ذلك عند اسم السجل :

سجل التوجيه الفني – حسب طلب الموجه اما يكون دفتر يشبه الريكورد له تقسيمة معينة .. او بملف

سجل زيارات الفصول
سجل الزيارات التبادلية
سجل التنمية المهنية
سجل الانجازات
سجل الانشطة
سجل الضعاف و الفائقين
سجل الخطط الاسبوعية e
سجل الاختبارات و اوراق العمل
سجل ما قطع من المنهج
سجل خطة رئيسة القسم
سجل متابعة الاعمال التحريرية
سجل النشرات الداخلية و الخارجية و التكليف
سجل توزيع العمل
سجل الاجتماعات الفنية و الادارية
سجل النسب

و طبعا هالسجلات قابله للزيادة و التغيير حسب نظرة الادارة و التوجيه
مثلا الموجه طلب افصل سجل الضعاف بروح و الفائقات بروح
و نفس الشي سجل الاجتماعات .. يبون الفني بروح و الاداري بروح

يعني حسب كل توجيه و كل اداره اهم شنو يفضلون
انتو سوو الاساسيات و كملو بعد اتضاح الرؤية

كل السجلات لها غلاف داخلي باسم المدرسة و عنوان السجل و اسم رئيسة القسم

من داخل .. عبيه بالجيوب البلاستيك
و حطي اي جدول يتعلق فيه ان وجد … او التقسيمة اللي تناسبه

مثلا .. الزيارات التبادلية تحطين جدول الزيارات اللي انتي سويتيه من قبل و قعتي عليه المعلمات
او سجل الضعاف .. حطي غلاف داخلي
فاصل لتحليل الاختبار التشخيصي
فاصل لخطة رئيسة القسم لمعالجة الضعف في كل مرحله
فاصل لكل مرحله علشان تحطين فيها نماذج متابعة الضعف اللي تعبيها المعلمة وهذي لها نموذج بحاول اشوف لكم

و لي عوده لان السجلات قصة مو سهله للي اول مره

هلا وغلا اختي مشغوله ومحتاسه
نورتي الموضوع بطلتج

بما انج تخصص انجليزي يلريت تنزلن اهم
الفورمات لرئيسه قسم الانجلش ونكون حد شاكرين لج
وناطرين مشاركتج ابقادمة عن السجلات

واي الله يعينه حدي مالي خلق لوية السجلات

مرحبا رئيسات احلى تحيه لكم ومبروك للجدد
عندي سؤال بما اني قديمه وماترشحت لرئاسة القسم بسبب الظروف اللي مريت فيها
خواتي انا خبرتي ١٤ سنه العام خذيت ٩٣ وهالسنه ٩٤ ،،،،،، متى راح يجيني الاشراف ؟ ولازم تكون عندي دورة الاي سي دي ؟ وسلامتكم

اقتباس:

واي الله يعينه حدي مالي خلق لوية السجلات

مو لويه ولا شي ..

اهي بس يبيلها ترتيب افكار .. كتابة اسماء السجلات بورقة .. اختيار مطبعة و سلامتج

افتكي منهم الحين نصييييييييحة ..

لان على رمضان لا احنا لنا خلق

ولا اهم فاضين يصير عندهم زحمممة

المفروض السنة الياية يحوشج ان شاء الله الدور و الترشيح

الشهادة مطلوبه اعتقد

و موفقه يا رب