تجربتي مع مركز الاستتشارات الزوجية

السلام عليكم ورحمة الله وبركاته
شلونكم كويتيات
حبيت اكتب لكم تجربتي مع مركز الاستشارات الزوجية عشان تاخذون العبره وماتغلطون اغلاطي وتستفيدون من تجربتي
ماراح اكتب الي صار بالتفصيل بس راح اقوله بشكل عام تحفظا على اسرار بيتي

انا بنت جامعية عمري 23 سنه وزوجي عمره 24 سنه كنا نحب بعض قبل الزواج والحمدالله تزوجنا ويبنا احلى ولد والحين صار لنا 4 سنين ونص متزوجين لكن السعاده مااستمرت صرنا مانتفاهم مايمر اسبوع الا وفي زعل ومشكله وممكن مانكلم بعض شهور
صرنا مانذكر محاسن بعض بس مجرد ننتقد ونطالع العيوب
حتى العلاقة الزوجية انتم 3 شهور بدونها
كان في بعض المشاكل توصل للضرب
ماكو حب ماكو مشاعر
عايشين مع بعض حق ولدنا
لكني من داخل قلبي اتقطع لأن احب زوجي وااايد وكبرت معاه كنت اعرفه من عمري 15 سنه
زوجي دايما يقولي انتي ماتعرفين اتكلمين معاي… وساعات اذا زعلت او عصبت يقولي انتي معقده نفسيا.. وهالشي كان جرح كبير بالنسبه لي فقررت اراجع مركز استشارات زوجية مع علم زوجي وموافقته
لمن رحت استقبلتني الدكتوره بابتسامه جميله وكأنها قعد تقولي لا تحاتين كل شي راح يكون بخير
ودخلت معاها مكتبها .. قلت لها عن مشاكلي مع زوجي والي استنتجته من كلامي اني انسانه متعلقة وااااااااايد بزوجي لي درجة اني لو فقدته راح افقد حياتي… واستنتجت ان كل شي قعد اسوي من سعاده وحزن وفرح مو لأجل نفسي انما لأجل زوجي فقط.. واني ماعدي امان داخلي ولا احب نفسي… ولا اعرف اقدر جمالي لووول هذا الي قالته
عندي فرااااااااغ داخلي كبييييييير ومن كثر ما انا خايفة افقد زوجي قعد اوخره عني بدون قصد (( من خاف ماسلم))
مع العلم اني زوجي دايما طالع ويسافر ويروح ويرد مع ربعه يعني عنده حياة غيري بس انا كله قاعده بالبيت وادور على افكار تسعده
وكنت مشتكركه بنادي بس للاسف اني كنت دايما افكر بالبيت حتى وانا بالنادي وهالشي اكبر غلط
وانصحتني ان من هالوقت لي الاسبوع الياي افكر بشي انا احب اسويه واضحك لمن اسويه وزوجي مايكون جزء منه بالاضافه ان كثر مااقدر احمي نفسي من الافكار السلبيه الي مسيطره علي وخطوه بخطوه هي راح تساعدني اكون انسانه مستقله ومتفائلة وزوجها هو جزء من حياتها لكنه ليس اساس حياتها
وحبيت اذكر نقطه كنت غافله عنها : انا زوجي مايحب اسافر بروحي او حتى اطلع مشوار بدون علمه كللللش مايحب امسك بيبي ولا يحب البس تريننجات واكتشفت ان السبب في هذا كله ان زوجي مايبيني اكون نسخة امه وهالشي الدكتورة قالته لي
وهمن شغله ابي اقولها .. انا زوجي انسان جدا صريح لكني مو صريحه معاه بالعكس عشان مااجرحه الف وادور حوالين الموضوع وهالشي يهدم بيوووووووت .. ديروا بالكم منه يابنات.. واذا بغيتوا اي شي من ازواجكم لا تقولون والله فلانه عندها او شفت الشي هذا عند فلانه والا ريل فلانه شرالها هالشي لا لا لا والف لا …روحي حق زوجج وقوليلي يافلان انا ابيك تسويلي هالشغله
ولمن تحسون ان ازواجكم تغير مودهم من سالفة معينه لا تتناقشون فيها بنفس الوقت لا قولوله يافلان شكلها هالسالفه مو وقتها خلها وقت ثاني وفتحي موضوع ثااااني تماما
وبغيت انصح كل ام تقرا موضوعي يابنات انا صار فيني هالشي لان لمن كنت بنت بيت ابوي كان ممنوع نزور رفيجاتنا او يزورونا ماكان عندنا علاقات برا كلش بس نطلع مع امي بسسس
وكان ممنوع نطلع نتغدا او نتعشا او نتسوق مع رفيجتنا
كل شي مع امي وامي كانت شخصيتها قوية وكنا نشوف منها الحنان الي المفروض ناخذه منها وهالشي انعكس على شخصياتنا لمن كبرنا وتزوجنا
عطوا عيالكم كل الحب والحنان الي يحتاجونه ولا تحرمونهم من الربع
ومشكوووووووووورين
اي سؤال انا بالشوفه

بعد عمري
اهم شي حسيتي في تغير بعد زيارة الدكتورة؟

الله يوفقكم ويهديكم لبعض …………. تجربتج انا اخذتها من هالنت

تدرين سالفه الممنوع عند الاهل اهى سبب المشاكل اهلى نفس اهلج ما خلونا نحتك بالناس وصديقات بالاهل كل شي رسمي وقت المناسبات ما شفنا الحياه ما نعرف نتعامل الا بعيون اهلنا الله و البيت وا لزوج ليش ليش ليش ممنوع ممنوع لولا الله والنت يمكن حياتى صارت غير بس الحمد لله على كل حال …………….

حلو موضوعج والله يتمم عليج
بس ممكن تذكرين لنا اي عياده رحتي ؟

ان شاء الله تكون في نتايج ايجابية بعد الزيارة

الله يهديكم لبعض ويوفقكم

ويسخرلك زوجك يارب

الله يهديكم يارب

الله يهديكم لبعض ويحفظكم وييسر اموركم يارب

الله يهديكم ويسخركم لبعض

الله يهديكم ويهنيكم

انا معاكي في نقطة ان ممنوع الخروج من البيت او نزور احد
لأن تأثر على الشخصية والثقة يسير صعب على الشخص انه يكون علاقات وصداقات<<هذا اللي ساير معايا
شكلي حروح لمركز اسنشارات عندنا لأني بجد بحاجتها
الله يوفقكم يارب

احسن شي سويتيه انك دورت حل لمشكتلك وما كابرتي

مشكورين حق كل الي دعوا لي

انا رحت حق مركز الانماء الاجتماعي قسم علاج المشاكل الزوجية
هالمركز مجاني وسري للغاية
وغير جذي نفسيتهم تهبل وتعاملهم جدا راقي
وان شاءالله اي مستجدات تطري علي في زياراتي اليايه اكيد راح اكتبها

زين سويتي ورحتي دورتي حل لمشكلتج وماخليتها تكبر اكثر من جذي
الله يتمم عليكم ويسعدكم يارب ويبعد عنكم المشاكل