تجربتي مع عملية تحويل المعده عند دكتورمحمد العجمي

السلام عليكم ورحمه الله وبركاته

حبيباتي كويتيات حبيت اليوم اقول لكم عن تجربتي مع عملية تحويل مسار المعده

سبحان الله .. ابدأ من البدايه

انا دائما اسوي رجيمات دائما ما خليت لا كيميائي ولا فواكه ولا ماي ولا سوائل !

وكله ما نفع معاي ؟

حبوب واخذت
وشاي وشربت
ورياضه اداوم اسبوع والاسبوع الثاني ما لي خلق اروووح واتعذر عشان ما اروح

اول كان وزني عادي 60 كيلو بس

عقب تزوجت وشوفوا وين وصلت طق وزني 76 كيلو

وانا قصيره ؟ يعني 150 سم ووزني 76 كيلو !

كوره والله مثل الكوره اتحرك

درج السينما ما اصعد الا وانا ألهث !! تعب علي .. حتى مع ريلي تعب .. بكل شي تعب

مهما اقول لكم تضايقت من وزني ومن حالتي ما تصدقوني !

اتوقع بس المتينه اللي مثلي اهي اللي تحس فيني وتعرف انا شلون عانيت !

والطامه الكبرى حمال ما حملت 5 سنوات زواج ما في لا حمال ولا عيال ولا اي شي !

الطبيبه تقول لازم تضعفين نفسج ! مو زين المبايض تعبت من الابر والهرمونات

تخيلون 3 سنين على ابر هرمونات وحبوب . وكلوميد وبويضه كبرت او ما كبرت وابر تفجيريه !

وكله على الفاضي
وجهي صار طبق ! وكلمن شافني قال شفيج نفشتي !!

وهم صادقين عيل بشهر واحد ازين 3 كيلو ؟

سمعت عن عملية تحويل المسار وخفت قلت شلووون اسويها ؟؟

خاصه اني ما عندي لا واسطه ولا خرابيط بالمستشفيات الحكوميه

قعدت اجمع يمين ويسار واخذت لي قرض مو من بنك لا والله من وحده من خواتي ( من غير فوايد )

وقلت اسوي العملية جمعت بحدود 3 آلاف دينار ( سلف ودين )

وقعدت ادور على طبيب يمين يسار اسمع عن فلان وعلان
واروح واجرب ومافي ..

بالاخير رحت عند دكتور محمد العجمي رئيس قسم الجراحه في العسكري والمعروف عنه انه رااائع بالعمليات والكل مدحه لي صحيح انه عصبي وينرفز بس سبحان الله يوم رحت له قلبي انشرح

عياده في الجابريه . فتحت ملف هناك ورحت

قعد يلف معاي يمين ويسار على العملية ليش العملية مو لازمتج ؟ وقعد يقولي عن آثار العملية واني راح اضعف وايد وراح يوصل وزني 50 او 49 كيلو
قلت له عز الطلب انا طولي قصيره 150 سم يعني وزني يصير مثالي !

وفهمني على ثلاث عمليات
قص المعده
الحزام
تحويل المعده

بالطبع انا اخترت التحويل
لاني شفت بنات تبارك الرحمن ضعفوواا عليها بطريقه مو طبيعيه

قلت توكلي على الله . سبحان الله استخرت وقلت ابي اسوي العملية تعرفون بسرعه بسرعه

رحت للطبيب يوم الاحد . سويت التحاليل

طلب مني تحليل الدم وسونار للبطن عشان المراره

وطلعت الحمد الله تحاليلي زينه وحدد لي العملية يوم الخميس في الهادي

وبالفعل رحت الهادي يوم الخميس . مع اني اقدر اروح الاربعاء بالليل بس انا ما احب المستشفات

قلت لخواتي لا ابي اروح الخميس احسن وطبعا صايمه

ودخلت الغرفه وخذوا ضغطي و قاسوا الحراره وعطوني ادرب خفيف وابره وشافوا المضاد الحيوي اي واحد ينفع لي

بعدين جابوا السرير

سرير العملية

لبست ملابس العملية وصعدت

صراحه خقيت وخفت بس قلت توكلي على الله انتي مستخيره

ويتلون بالسرير لغرفه العلميات وخواتي ناطريني بره قلت لهم يا ويلها اللي تتركني تنطرون بره محد يرووح .

دخلت غرفه عاديه وسدحوني وجا دكتور محمد العجمي يا حلو ها الدكتور

ها خايفه ؟
اقول له : لا مو خايفه

مسك راسي وقال يافلانه لا تخافين العملية سهله انتي بتنامين الحين ولما تقعدين بتحسين بعوار خفيف بعدين يروح اوكي

قلت له اوكي

وجا دكتور عصام من مستشفى هادي دكتور التخدير . وحط لي الكمام

انا كنت خايفه لا يسوي العملية وانا قاعده اقول له : انا قاعده للحين ما نمت

يضحك ويحط الكمام مره ثانية

وانا ادوخ

المره الثالثه ما حسيت بشي الا وخواتي يقعدوني ( فلانه ) العملية نجحت ما شاء الله قعدي قعدي

العملية خذت حوالي ساعه ونصف وساعتين بالافاقه .

وقعدوني لقيت نفسي بسريري في الغرفه حقتي ونايمه ما قعدت الا الساعه 8 مساء من الساعه 4 العصر ما قعدت الا 8 لا وفيني النوم من المخدر والابر اللي حطوها

الحمد الله الحمد الله

يومين وطلعت من المستشفى وعطاني دكتور محمد تلفونه الشخصي عشان ادق اذا حسيت باي اعراض

والحين لي 3 اسابيع من العملية وتبارك الرحمن ضعفت حوالي 8 كيلو !

من غير رياضه ومن غير اي شي

طبعا اول اسبوعين اشرب فقط سوائل

والحين انا الاسبوع الثالث بديت بأكل المهروس

باجي لي اسبوع بعد بالمهروس

وبعدين اقدر آكل اللي ابيه من غير خوووف

العملية رووعه انصح فيها وااايد ما تتترك اي اثر اثر العملية كبر الظفر شمخه ظفر حوالي 5 فتحات ( بالمنظار العملية )

ما في لا فتح بطن ولا خرابيط وما تاخذ اي مجهووووووووووووووووووووووووود

اللي عندها اي استفسار انا حاضره اللي تبي اي معلومه من عيوني

وادعوا لي يا بنات اني انزل بعد لان ودي حيل يصير وزني 50 كيلوووو

ماشاء الله الحمد على سلامتج والله يتمم عليج يارب بس البنت اللي مو متزوجة وتسوي العملية ما يأثر بعدين على الزواج والحمل

عليج بالف عافيه وصج هالدكتور ينحط على الجرح يبرى
انشالله يتحقق الي في بالج ويرزقج بالذريه الصالحه يا رب

انشاله يارب توصلين حق الوزن الى تبينه
امانه عليج انا بسويها وخايفه موت ابي تشجعينى انا وزنى 85 وطولى 157 وشلون العوار والاعراض وعوار العمليه ادري عورت راسج حبيبتي بس ل هذا من الخوف انا اقره قصتج وارجف

ماشاء الله الحمد على سلامتج والله يتمم عليج يارب

يالله يارب توصليين للي تبينه
بس حبيت اسأل ما عطاك فيتامينات؟؟؟
انا سمعت ان اللي يسوونها يعيشون على الفيتامينات
صج؟؟؟

حبيبتي جم كلفتج العملية ؟ المجموع يعني حق الهادي والدكتور جم دفعتي؟

الحمدلله على سلامتج انا ضد هالعمليات لان الله سبحانه مايخلق شي عبث
لو مسويه نمط حياتج كله صحي كان افضل بس ان شاء الله خيره يارب وتستفيدين
وانتي مرتاحه

الحمدالله على سلاااامتج

ويارب توصلين للوزن اللي تبينه

شوفي ياقلبي العملية سهله بس اللي بعد العملية صعب
لان تمشين وبطنج يطلع اصوات من الغازات يبي لج كله بس وانتي بكرامه اطلعين غازات من تحت واتارعين عشان الغازات تطلع . ولازم ولابد انج بعد العملية بيوم تقومين تمشين انا كنت امشي تحت بالمستشفى عشان الغازات تطلع

ثاني شي كتجميلي ما تبين كلش انا الحمد الله سويتها وكا الجروح عاديه مو مبينه والحين استخدم كريم عشان يروح الاثر

عوار العملية اكيد لانه جرح لازم في عوار ياخذ له بحدود 6 ايام عشان يروح العوار والانتفاخ بالبطن

اللي يغث انج شهر كامل الاكل لازم تمشين على جدول معين
2 اسبوع سوائل عصير وشوربات مصفاه
2 اسبوع مهروووووووس كوسا بيذنجان جزر

هذا اللي يغث وبس

بعدين تبدين قطعه توست مع جبن دايت ـ صمونه صغيره حلوم دايت
من الاشياء الخفيفه هذه

ادري بتنصدمين بس صدقيني سبحان الله لما تصير المعدة صغيره ما تشتهين الاكل انا يمر عليه يوم كامل بس على الماي و شويه عصير ما اشتهي كلش اشوف اهلي ياكلون وجبات ويشربون بيبسي وعيوش وانا حدي اخذ لي شويه مرقه واشرب لي 8 ملاعق بعدين خلاص شبعت

تعرفين المعده تصير كبر فنجان القهوه يعني بسرعه بسرعه تحسين بالامتلاء

اشرب الشوربه واحس اني ماكله خروف خلاص الاكل بيطلع من خشمي ما في مجال اشرب وهي كلها شوربه شعريه كنور

بالعكس ياقلبي الطب متقدم . والله خلى لكل شي علاج
والسمنه مو خلقه الله السمنه سوء اختيار مني مع سوء تصرف وتصير مرض

ترا السمنه تجيب الامراض الضغط القلب السكري ! كل الامراض سببها السمنه .

وعلاجها العمليات . لو اقدر على النظام الصحي كان استمريت عليه لو اقدر على الرجيمات كان استمريت عليها . بس الحمد الله .. العملية وااااايد فايدتني .

شوفي ياقلبي عطوني 5 ادويه حبوب
4 انواع من الحبوب عباره عن مجموعة من الفيتامينات استمر عليها 6 شهور
بعدين اسوي تحليل عشان يشوف الدكتور مستوى المعادن اللي بجسمي
بعدين يقرر يغير الفيتامين او يزيده .

وحبه وحده عشان لا احس بالحموضه ( الحارق ) فهمتي علي .

وشفيها لو اخذت فيتامينات ؟
على الاقل اضمن ان شعري ما يطيح . وااظافري ما تتكسر .

تعرفين ليش الفيتامين
لان اغلب الاكل اللي بعدين راح اكله يروح الامعاء ويطلع وانتي بكرامه كـ ( خروج )
يعني الدهون ـ والخرابيط هذه ما يمتصها الجسم يعني رشيقه لاطول فترة ممكنه
وبنفس الوقت الفيتامين اللي بالاكل ما امتصه كامله .

عشان جذي اعوض النقص بالحبوب . وشفيها لو اكلت لي حبتين الصبح . وحبه الظهر . وحبه قبل النوم

شوفي واايد بنات سووها انا اختي بتسويها على شهر 6 بس تبي تظمن الاجازه من الشغل . وتسويها
وزنها بحدود 140 كيلو ! وحيل تعبت
بالنسبة للحمال لازم اذا تبين تحملين تنطرين على الاقل 4 شهور بعدين تحملين
انا اعرف بنات مالجات سوو العملية من فلوس المهر تقول العرس بعد 3 شهور انا اسوي العملية الحين وارتاح . عشان يوم العرس يكون شكلي زين . والحمال خو مو من اول ليله تحمل

يعني يمديها تسويها وتحمل عقب 4 او 5 شهور ما فيها شي ..

ثاني شي ما يأثر على الزواج لان العملية منظار مو شق بطن ! يعني ما في اي تشوهات

الحمدالله على سلامتج يقلبي وانشالله توصلين للوزن الي تبينه حبوبه

اي سؤال بنات ترا انا حااااضره من عيوني