تاخذ عزيز و لا حمد؟؟ مطلوب رأي الحكيمات في الحب و الزواج

اول شي احب اوضح ان مشاراكاتي في هالقسم قليله جدا … و اغلبها بقسم القصص لاني جربت حظي و كتبت قصتين و الحمدالله حققوا نجاح ما كنت متوقعته… و هذا بفضل الله و من ثم تشجيع البنات

ماني مطوله عليكم بالتفلسف في قصه صارت لوحده اعرفها شخصيا و حبيت اشاركم فيها و بهالقسم تحديدا لسبيبين:

انا وعدت البنات بقصه ثالثه و ما حبيت اذكر الموضوع بقسم القصص لان هدفي من نشر هالقصه اخذ النصيحه منكم

و السبب الثاني لان القسم من اكثر الاقسام نشاط بالمنتدى

الزبده يا جماعة الخير…

في بنت اعرفها عمرها الحين تقريبا 27 سنه قاعده تمر بمرحله شوي صعبه و انا ودي اساعدها… راح اغير اسماء الشخصيات للحفاط على خصوصيتهم..

فرح صديقه من صديقاتي البنت حيل حبوبه و مشاءالله جميله من الداخل و الخارج بس للاسف احسها غبيه في فهم الرجال!

حاليا متقدم لها شاب (راح اسميه عزيز) عاجبها و هي عاجبته…ماشي الحين وين المشكله؟؟

فرح صديقه اخت عزيز بس مو قريبه منها حيل يعني كانت تعرفها من ايام الجامعه …. قبل تقريبا 6 سنين كانت تزور اخت عزيز بما انهم مع بعض بالجامعه فكانو يدرسون مع بعض الخ…

عزيز شاب جذاب حيل و معروف في الوسط الشبابي يعني معارفه وايد… مره شاف فرح و هي زايره اخته و الفتت انتباهه حيييييل!! شكلها و طريقتها و اسلوبها برائتها… البنت مو شوي!

المهم طلع رقمها و اتصل عليها… فرح مو النوع اللي يعترف بالعلاقات مع الشباب… لكن عزيز حيل لفت انتباهها و كان وايد حذر بالطريقه اللي دخل في الموضوع… كان ثقيل حييييل …. كلمها كذا مره و كانت فرح تحاول بطريقه حلوه ترده لانه اخو صديقتها و لانها بنفس الوقت ما تبي تزعله… بس للاسف كان عاجبها شكله و اسلوبه … فصده كان مو سهل كلش!

سبحان الله بعد كذا مكالمه بينهم …. كانت قاعده مع وحده من البنات اللي تعرفهم و دار بينهم حديث… و بالصدفه عرفت ان البنت هذي تكلم عزيز!!!!!

فرح هني انصدمت!!! يعني ليش هاللعب ؟؟ فرح لا ينقصها جمال و لا اخلاق و لا شي الحمدالله الكل يتمناها زوجه مو لعب!! لحظتها فرح انصدمت و استوعبت ان فكرتها السابقه ان العلاقات مع الشباب ما وراها الا عوار الراس صحيحه!

اتصل عليها عزيز بعدها كذا مره بس هي ما ردت و غيرت رقمها و ما قامت تزور اخته بما انها تخرجت بنفس الكورس….

بعد مرور 6 سنين!!

اللي صار انها لين هالسنه ما تعرفت على احد بعده و من داخلها للحين مجروحه…. لانها كانت متصوره انها شي مميز عشان جذي كان يركض وراها ما تصورت ان كان يشوفها حالها حيل غيرها… مرت الايام … و بالصدفه تعرفت على شخص في فيس بوك … هالولد اسمه حمد

حمد للامانه شخص محترم و حبوب و نظيف… و تموا فتره يتكلمون في الفيس بوك… فرح ما كانت حاطه في بالها ان الشي ممكن يتطور و كانت تنظر للموضوع انه مجرد صداقه نظيفه … و بالفعل كانوا يتكلمون عن مواضيع عاديه جدا … مع مرور الشهور حمد تعلق في فرح حيل و حس انها بالفعل البنت اللي يبيها بالرغم ان ما شافها ولا مره و لا حتى سمع صوتها… بس اعجبه اساوبها الراقي ….

المهم حاول كذا مره و طلب انها تتصل عليه و هي رفضت… و بعد الحاح طلب منها انها بس تتصل لمجرد السلام و وعدها ان ما راح يزعجها… و فعلا بلحظة طيش او حظ او مادري شتسمونها اتصلت عليه..

حمد فرح حييييييل!! و تعلق فيها زود لما شاف ان الاسلوب اللي كان عاجبه من كلمات يقراها على شاشة الكمبيوتر كان بالواقع اروع و احلا… فرح طلبت منه انه خلاص يوقف اتصالات و تتم صداقتهم على الفيس بوك و بس!! حمد رفض و كان حيل متمسك فيها… لدرجه عرض عليها الزواج و قال لها ان مستعد اخلي امي تتصل على اهلج الحييييين من اول اسبوع كلمها فيه!

فرح كانت رافضه الزواج فيه! صج الشي حز بخاطره لان الصج ينقال الولد ما ينقصه شي ولد عايله معروفه حيل و اهله محترمين و وظيفته وشهادته ممتازين… بس فرح كانت رافضه الموضوع نهائيا!

مادري شلون تتطورت علاقتهم و صاروا يتكلمون مع بعض يوميا… فرح كانت تشوف العلاقه انهم عودوا على بعض و حمد كان يشوفها انها مشروع زواج و كان كل ما مره يفاتحها بموضوع الزواج تصده و مع هذا يصبر…

الي صار ان حمد حبها لمرحلة الجنون صار ما يفكر الا فيها و على قولته كان يوقلها انتي غيرتي حياتي انتي الاستقرار اللي ادوره من زمان… حبها لدرجه مو طبيعيه…. بصراحه ما الومه البنت طيبه حيل و تنحب!!… و هي تصده و تقوله حمد انا ما استاهلك!

حمد كان يرد عليها و الله انا المحظوظ فيج… و انتي شي نادر الحين ان بنت مثلج تدور على شاب لذاته مو اسمه او فلوسه! و كان كل ما يكلمها يحس براحه نفسيه … و لما تغيب عنه يموت من الوله … كان يعرف اذا هي زينه او لأ من صوتها… كان ما يخليها تنام الا و هي مرتاحه و مو زعلانه من اي شي!

فرح من داخل كانت مرتاحه حق حمد بس تدري انها ما تحبه و حاولت كذا مره تقطع علاقتها فيه عشان ما يتعلق زياده…

المهم راح اختصر… صارت بينهم وايد مواقف و فرح مرت في مشاكل وااااااايده و حمد ما قصر وقف معاها لدرجه انها مره تقدم لها ولد خالها و كانت راح تقبل بس رفضت باللحظه الاخيره لان حمد كان حيل معور قلبها….. بتقولون ليش حمد ما تقدم لها؟؟؟ هي محلفته و قايلتله اذا كلمت اهلك دون علمي و شوري والله راح ازعل و اردك !!

حمد كان مستغرب من رفضها للموضوع و تأجيله بس فعلا سمع كلامها و ما كلم اهله مع ان مكلم اخوه ان في بنت عاجبته و يبيها…

اللي صار ان قبل فترة شهر و نص تقريبا اتصل حمد على فرح و شاف ان صوتها ما كان زين كلش كلش!! سلها شفيج ما رضت تقوله… و بعد الحاح منه سمع شي ما يسره ابدا!!!

فرح: حمد… اكو واحد دق علي اليوم
حمد: منو هذا؟
فرح: واحد كنت اعرفه
حمد: شيبي؟
فرح: يقول اني عاجبته و مو قادر ينساني
حمد: (مو مستوعب ) خليه يولي … هذا اللي مزعلج… افا عليج بس خرعتيني!
فرح: (تصييييييييح)
حمد: حبيبتي شفيج؟؟ ليش تبجين؟؟
فرح: حمد …. انا هالرايل كان حيل عاجبني بس… اكتشفت ان يلعب … و الحين يحلفلي ان صادق
حمد: (في باله ان فرح تحبه و مستحييييل تخليه) انزين انتي شاللي مزعلج؟
فرح: حمد احبه
حمد: (!!!!!!!!!!!!!!!!!!!!!!!!!!!!) ………..

حمد قال حق فرح اذا انتي تشوفين سعادتج وياه انا بطلع من حياتج و اتمنى لج كل خير!!!! ة هو من داخل ميت!! مروا اسبوعين بدون اي اتصال بينهم و حمد حيييل تعبان و الكل كان ملاحظ انه ما كان طبيعي

فرح بالوقت نفسه كلمت عزيز و قالت له اذا تبيني تدل بيتنا!

و عقب هلاسبوعين اتصلت على حمد تتطمن عليه و تقوله انها خلاص عزمت تتزوج…حمد اول ما سمع صوتها ردت روحه و صار لا اراديا يبوسها بالتلفون و يقول لها ابيج و مستعد احطج بعيوني… فرح انتي احلى شي بحياتي بدونج ما اسوى شي و من هالحجي…. فرح كانت تسمع كلامه و قلبها يعورها عليه…. بس اعتذرت منه و قالت له صعبه عليك و علي ! حتى لو لنا قبلت انت ما راح تنسى انا كنت بيوم ابي غيرك…. رد عليها و قالها انا مستعد ادوس على كرامتي و اسوي روحي كأني ما سمعت اللي قلتيه بس تصيرين حلالي…. فرح صدته و قالت له ان خلاص عزيز بيتقدم لها و هي بتوافق

طبعا القصه مشوقه اكثر من جذي بوااااايد بس انا اختصرتها و عطيتكم زبدة الزبده… اللي ابيكم تساعدوني في شي واحد…

اللي صار الحين ان فعلا ام عزيز اتصلت و طلبت فرح حق عزيز… بس فرح مو عارفه شتسوي…. كل ما قارنت بين حمد و عزيز تتعب…. عزيز عاجبها و هي منجذبه له بشكل مو طبيعي… حجر و عنيد و راسه يابس و يخرع و مع كل هذا االي يطلبه منها تنفذه لانها تحس انها ضعيفه جدامه … و حمد طيب و حبوب و ما يرد لها طلب بس للاسف مو دخل قلبها!!

صار لها اسبوع بس تبجي… و كل مره تتهاوش مع عزيز او تطيح بمشكله تلاقي نفسها لا شعوريا تتصل على حمد و تشكيه و حمد يا عمري عمره فوق كا اللي سوته فيه يراضيها و يطيب خاطرها و ما يخليها تنام الا و هي مرتاحه… و فوق كل هذا ينصحها شلون تتعامل مع عزيز… تقول ساعات يقولي لا تخليني اروح اذبحه!! ترى و الله تنرفزيني!! و فرح تبرر مواقف عزيز و حمد المسكين مو عارف شيسوي…. ميت يبيها بس يدري انها ما تبيه…و هي تبي عزيز بس مو قادره تتأقلم مع واحد عسر عقب الطيبه اللي شافتها مع حمد… فرق السما عن الارض عزيز جفس و عسر و صعب و حمد طيب و حليو و حنون

و بالختام اسفه طولت عليكم بس ابي ردة فعلكم تجاه القصه و شنو برايكم الحل …. ترجع لحمد؟ و لا تاخذ عزيز مع العلم اتها صارحته بموضوع خيانته و اعترف ان وقتها كان بعرف البنت الثانيه قبل لا يتصل على فرح و كان ناوي يقطع علاقته فيها…. مسينكه كاسره خاطري… يمكن البعض يقول قلعتها هي اللي لعبت و حطت روحها في هالموقف… بس و الله انا اعرف البنت شخصيا ترى قلبها نظيف لابعد حدود بس سبحان الله بلحظه ضعف اتصلت على حمد و شربكت روحها معاه لا هي قادره تحبه و تريحه و لا هي قادره تنسى فضله عليه و ترتاح

شنو نصيحتكم لها؟؟