الولادة بمستشفى الصباح .عندي أسئلة؟؟؟

السلام عليكم بنات ….

بصراحة أنا مستحية وعندي أسئلة وايد … لأني بروحي بالكويت وأنا أجنبية … وحدي خايفة

فحابة أعرف كم تكلف العملية القيصرية بالصباح؟؟؟

وسمعت إنه ممنوع الزيارات ومحد يقدر يجي يشوفني ؟؟؟؟

ومعاملة الممرضات مو زينة ولازم تعطيهم فلوس عشان يراعونج؟؟؟

أي دكتور تنصحوني إذا عملية قيصرية؟؟؟

شنو آخذ معاي ؟؟؟

وإذا ولدت طبيعي شنو هاذي العملية التجميلية هم يسوونها من نفسهم ولا لازم أطلبها؟؟؟؟

هل الغرفة مع أحد ولا يصير أطلب بروحي؟؟؟ وجم سعر الليلة؟؟؟

آسفة على الأسئلة الوايدة بس فعلا محتاجة أحد يساعدني وتردون علي …..

وشكرا لكم بانتظار ردودكم….

و عليكم السلام
هلا حبيبتي
*الصراحه مادري جم اتكلف حق الاجانب بس اتوقع مو وايييييد
*اييي الزياره ممنوعه بس من الـــ 4 لي 8 اذا كنتي بالعمومي اما الغرفة الخصوصي من 8 لي 10
*معاملة السسترات بالجناح كلش مو شي و صج بس يدورون الفلوس مو بس السسترات حتى عاملات النظافه :/
*اذا قيصريه عندج دكتوره اسمها ميسون وايييد زينه
*الصباح ما يسون تجميلي
*يصير تطلبين غرفه بروحج و الاولويه حق القيصريه ،،، ما اعرف الاسعار

حبيبتي حياج
و سألي اللي تبينه

و عليكم السلام حبيبتي..
الله يهون عليج و علينا و على كل حامل و يسهل ولادتنا بإذن الله تعالى..
بالنسبة للتكلفة ما اعرف جم بالضبط بس ما اتوقع وايد اتوقع مبلغ بسيط جدا جدا ..
الزيارات مو ممنوعة بس ايام الدوامات مافي زيارة الصبح لان الدكاترة يدورون على المرضى فالزيارة تبدي من بعد الساعة 2 للغرفة الخصوصي اما العمومي تبدي الساعة 3 ..
السسترات مو كلهم يتعاملون بفلوس انا الله سخرلي السسترات الي كانو بجناحي و لله الحمد…
بالنسبة للدكاترة كلهم زينين و خبرة و مثل ما قالت الاخت دكتورة ميسون و انا ولدني دكتور اسمه ابراهيم نفس وحدة دكتور فرغلي و دكتور فرغلي بعد ممتاااااااز انا ولدت قيصرية…
بالنسبة للتجميلي اهما يسوون تجميلي بس اذا ما تحتاجين حرام ما يسوون لج بس عموما اهما يسوون تجميلي و اذا انتي فتح بطن بدون لا تقولين على طول الخياط يكون تجميلي و لا يبين ( انا جرحي ما يبين و مرت خالي بعد جرحها ما يبين )
تقدرين تطلبين غرفة خصوصي و اذا متوفرة يعطونج لانج فتح بطن و تحتاجين راحة اما اذا طبيعي مدة اقامتج تكون اقل يمكن ما يوفرونلج غرفة…
بالعكس اسئلتج مو وايدة و احنا حاسين فيج انج راح تولدين بروحج الله يسهل عليج يااااااارب
صح نسيت اقولج انهم يعطونج ابرة ظهر حق القيصرية و اذا طبيعي و تبين الابرة هم يعطونج ما عندهم مشاكل يعني الولادة هناك مريحة و بنفس الوقت ما تكلفج
و السهالة من الله رب العالمين بس انتي توكلي على الله

و الله ما ادري انشالله البنات يفيدونج

اذا انتي مو كويتيه ما ادري جم ياخذووون عليج والله
انا اعرفه ابلاااش

توها رفيجتي والده وهمن عضوه معانا بالمنتدى شوفي قصه ولادتها توها كاتبتها
الاثنين مدحوا معاملاتهم حتي تجميلي عندهم وابره ظهر
وبالعكس السسترااات حبوبييييين يمكن اذا مصريه شوي نفسيه بس مو كلهم

انا اراجع عندهم سنه بالضبط ماشفت منهم الا كل خير وشطاااااااااااااار
وبخصوص الغرف لأ عمومي مافي خصوصي الا للحالات الطارئه او الي يطولوون هناك

عسى الله يسهل عليج …

الله يسهل عليج يالغاليه

ماشاء الله عليكم بنات … ماقصرتوا والله يعطيكم ألف ألف عافية يارب

وإن شاء الله نشوف ردود اكثر ….

تحياتي للجميع

الله يسهل عليج إن شاءالله

حبيبتى الله يسهل عليكى وعلينا انا ليه صديقة ولدت مرتين فى الصباح والحمد لله المعامل كانت كويسة والغرف نظيفة ومدام انتى عندك تأمين اعتقد بتفعى فقط شئ رمزى يمكن ديناريينش

وعليكم السلام والرحمه ياااااااااقلبى عسا الله يهون عليج يارب ويقومج بالسلامه حبيبتى

حبيبتى العلميه نفس الولاده الطبيعيه تقريبا اعتقد بس الرسوم دينارين (جارتنا اهى قالتلى بس ما ادرى للحين ولا غيروه والله)

وقت الولاده الطبيعيه او القيصريه ما حد يدش ويااااج بس للين يطلعونج الجناح الزيارة تقريبا من 3او4 اللى اللساعه 7 او8 ما اعرف بالضبط والله بس فى الوقت هدا تقريبا

الممرضضات انتى وحظج والله فيهم ماشاء الله عليهم يهبلون وفيهم نفسيات بصرف النظر عن الجنسيات انتى وحظج ونفس الشىء الدكاترها بس شاطارتهم اهم شىء وتشفع لنفسياتهم …انا اللى اعرفه ان الهنود االعاملات اهم اللى يخدون الفلوس بس السسترات ما جربت الصراحه..حبيبتى انتى ما تقدرين تتقررين عند من تولدين الدكتور اللى بيكون موجود وانتى بالولاده اهو اللى بيولدج يا قلبى الا لو انتى قيصرى من قبل وعارفه ان انتى بتولدين قيصرى يحولونج المستوصف وتابعين عند دكتور وتتطللبى منه اهو اللى يولدج
التجميلى ما اعتقد الا قليل اللى يسولهم خيااااط عادى …لا حبيبتى الغرفه عمومى فى الولاده .. والخاص ما اعتقد بس حق الكويتيات
ومو اى وقت متوفره ياااااقلبى واذا قصدج على الاجنحه الجناح بعد عمومى وفى بيكون فيه 3 اسره وفى 4 والله ما شفتهم من زمان

ولو بتطلبين غرفه خاصه اليوم تقريبا 5 دنانيرللاجانب وحسب اذا متوفر او لالالالا يعنى ممكن تطلبين وما تحصلين عااااادى

وانا اعتقد اذا طبيعى ما تحتاجين لان ثانى يوم يطلعوج بس القيصرى ممكن وان شاء الله اكون فيدتج على قد ما اقدر عسا الله يتمم عليج يارب

لا سمعت الولاده ب30 دينار ماادري صح والا حجي انتي عاد حزت الولاده خل يكون معاج عالاقل 50 دينار اخاف سبحان الله والا شي ماتدرين

بس مستحيييييييييييييييييييييييييييييل اكثر من جذيه ما اظن

البنات ماقصروا ردوا على على الاسئله وانا انشاء الله بولد بصباح وريحوا قلبي بكلامهم الله يريحهم

عسى يهون علينا يارب

إي والله أخت فانيلا …يعطيهم العافية ماقصروا البنت كفوا ووفوا والله يسهل علينا يارب …