اللي جربو الولاده المبكره يســاعدووني

عمري بداية الحمل—>21

وقت الولادة——->26 اسبوع

كانت التجربة الاولى وكان حملي الاول…

الأسباب….

أول سبب كان نفسي…كنت امر بوقت عصيب..
ثاني سبب عرفته توني من دكنور بمستشفى المواساه توه مسوي أبحاث يديدة وراجع من برا..يقول ان مريضات التكيس على المبايض يتعالجون بالجلوكوفاج وهو علاج زين بس لازم لما احمل استمر على الحبوب لمدة 12 اسبوع علشان لا تصير ولادة مبكرة….
وانا يوم اسمع عرفت ليش ولدت مبجر بدون لحد يعرف السبب الصجي…لانه كنات اتعالج بالجلوكوفاج بس الدكتورة اول ما حملت قالت وقفيه..وكان المفروض اكمل للاسبوع ال12..والله اعلم…

العامل الوراثي ما اظن كان له دور…لانه كنت شي نادر بالعايله اول مرة…الا اللهم بنت عمتي قبلي بجم سنه بس هي كان ضغطها مرتفع..

التغذية اذا لها دور..مادري كنت اكل عادي….اصلا كانت وجبتي الرئيسية…صبور..واذا بغيت احلي اكل رماااان>>كنت اتنسى فيهم..

حالة المولود بعد الولادة…

يبت بنت الله يخليها …وزنها كان كيلو واحد=1000 جرام
بعد الولادة بجم يوم نزل وزنها وصار 850 جرام..
طبعا كانت بالعناية المركزة للخدج…وكانت تتنفس على اجهزة التنفس والاكسجين …
وقبل لا ولد كنت اطلق خمس ايام الحمدلله اقدروا وقتها يعطوني ابر علشان تنضج رئة الجنين بسررعه..لانه رئتها ماكانت مكتلة..

بعد اسبوع من الولادة..قالو لي ان بيعطونها مضاد حيوي لانه صار فيها فطريات بالدم…وعطوها وصاارت زينه…
وكانو يطلبون مني حليب لها..وكنت اسألهم شكثر تبون..اذكر كانت السستر تقول كل رضعه 1مل بالبداية…وكنت استغرب…
وكانوا يحطون الحليب بالابرة ويحطونها بالبربيش اللي يكون موصل بقتحة الأنف او بالفم…وهالاشياء شفتها بعيني…

وكانت لما تبجي ماكو صوت..لان الحبال الصوتية ضعيفه..بس تشوفين الحلج مبطل وتعابير الوجه انها تبجي..ولما احط ايدي على بلعومها احس بذبذبات خفيفه..هني تكون قاعدة تبجي,,,

قعدت بالعناية المركز شهر كامل.. وبعدين انقلوها لجناح الخدج وطبها بالحضانه…
ظلت تكبر ويزيد وزنها بفضل الله..كل اسبوع تقريبا 200 الى 250 جرام…
لما صار وزنها 2كيلو…طلعوها من الحضانه…وفجأة خرعوني..قالوا تعالي بسرررعه نبي دم..وانا مت وحييت بالطريج على ماوصلت…
ولا تقول الدكتورة لا تخافين عادي اهي وزنها زاد بسرعه فدمها قل..محتاجة دم ..وعطيتهم دم وحطوها بالشيشة..وعطوها الدم…

بعدها بفترة صغيرة طلعوها…وكانت اقل من 2.5كيلو..
وعطوها مجموعة فحوصات حق العين..والحوض..والكلى وتابعوا نموها..وتطور حالتها اول 6 شهور بالخدج…

نسيت اقولج شي يمكن يفيدج…انا كنت اطلق..وفتح رحمي عادي وقت الولادة بس ولدوني قيصرية..لان بنتي كانت نازلة من المقعد يعني راسها فوق..وخافوا يلفونها لانها صغييرة..