>> الفــــــرق بــين التربــية الأساسيــــة و التربــــــــية بجامــــعة الكويــت <<

مرحبا كويتيات

كل عام و انتم بخير
و عيدكم مبارك مقدما ……

بنات ابي اعرف شنو الفرق بين التربية الاساسية و الجامعة

لأني دخت و انا افكر بالهموضوع ابي اعرف الفرق بس للحين ما وصلت له

ابي اعرف من حيت التوظيف المعاش و كل شي

عسى الله يفتح عليها اللي ترد علي

و يعطيكم العافيه مقدما

بقولج اللي آعرفه

الشهاده كلهم بكآلوريوس وكلهم يتوظفون على الدرجه الرآبعه

بنآت الآسآسيه آسآميهم بالديوآن قبل بنآت الجآمعه وهذي سمعتهآ وشفتهآ

الآسآسيه الحلو فيهآ من تدشين من اول كورس عارفه تخصصج وتبلشين فيه دآيركت

أمأ الجآمعه كورس اذا مو آكثر عشآن تقدرين تتخصصين

آستخيري

انا بكلية التربية جامعة الكويت

مستجدة

بس حيل مسستغربة مو معقووولة ان التطبيقي احسن من الجامعة اكيد في مميزات بالجامعة مو موجوده بالتطبيقي بس ما ادري شنو ؟؟

اللي اعرفه

صح كلام اختي اللي قالته

ونفس المعاش ونفس الوظيفه والاساسية بالديوان اول

الفرق الوحيد

الاختلاط

فقط لااااااااغير

اتمنى افدتج

شنوو بالديوان اول اذا بالديواان اول عيل الكل دش تربية اساسية

اكيييييييييد في امتيازات اكثر للجامعة

ورفيجاتي توظفوا نفس بعض

وبعدين اختي بالثانوية قالت لي ان جت لهم وحدة من التطبيقي ندووة وقالت لهم ان الاساسية يتوظفون درجة رابعة والجامعة ثانية ؟؟

والتربية الاساسية مافيهاا ثاانوي ومتوسط؟

نفس الراتب والدرجه الرابعه كلهم هذولا اهم شيين عاد الفروق الثانيه مثل الدراسه انا اشوف انا الاساسيه اسهل

شي ثاني الجامعه يتوظفون على الدرجه الثانيه مستحيييييييييييييييييييل
خواني وخواتي كلهم جامعات توظفوو درجه رابعه ومع الوقت صاروو الي الدرجه الثالثه والثانيه وجذي

والاساسيه بس ياخذون الثانوي
بعد شنو

احلى شي بالاساسيه انه على راحتج بس بنات

وبس سلامتج

ما فيه فرق

بالعكس التربية الأساسية فيها تخصصات أكثر مثل " الفنية ، الموسيقى ، البدنية ، الإقتصاد "

وبعض التخصصات تكون دراسة التربية الأساسية أحسن وأصعب ومخرجاتها أقوى مثل رياض الأطفال لأنه مواد الجامعة نظري ومواد التربية الأساسية فيها نظري وفيها عملي

بس الفرق الوحيد انه الجامعة يكون فيها بالتخصص إما إبتدائي أو متوسط وثانوي بس الأساسية بس إبتدائي بالتخصصات كلها ما عدا اللي ذكرتهم قبل

يعني خريجة تربية أساسية لغة عربية ما تتوظف إلا بمدرسة إبتدائي .. الجامعة ممكن الواحد يتخصص لغة عربية إبتدائي ويكون مثل خريج الأساسية بالضبط .. أو متوسط وثانوية فيدرس المراحل هذي

بس ما فيه فرق بالمسمى ولا الدرجة ولا الشهادة ولا شي

الجامعة شهاتج معتلاف فيها عالميا والتربيه الاساسيه بالكويت وبس ما تقدرين تكملين ماجستير اللي بعد ما تاخذين دبلوم عالي علشان ترقعين فيها عمر الجامعة ما كانت مثل التطبيقي الجامعة دوليه والتربيه الاساسيه هيئة داخل الكويت خاااصة

بالنسبة للمعاش و الدرجة نفس الشي

الجامعة تختارين المرحله اللي تبين تدرسينها التطبيقي بس ابتدائي

و نسب القبول بالاساسية اعلى من الجامعة

و تقدرين تكملين ماجستير و دكتوراة لان دكاترتنا كلهم خريجين الاساسية و مكملين بامريكا

و مستوى دكاترة الاساسية اقوى من الجامعة لانهم ما يقبلون الا الدكتوراة من امريكا او بريطانيا

حبيبتي اثنينهم نفس الشي في التوظيف والمعاش

ومن قال ان التربية الأساسية بس يدرسون ابتدائي

لا حبيبتي هالكلام خاطئ

انا الحين نازلة تربية عملية .. المشرفات يقولون لناا احتمال التوظيف يكون بالمتوسط

لأن في اكتفاء بالابتدائي

هذا غير باقي التخصصات الاقتصاد والألعاب والفنية والمكتبات ..ألخ هذولي اكثر شي مرشحين للعمل بالمتوسط وثانوي

واللي اكيد يتوظفون بالمتوسط او الثانوي .. الانجليزي والاقتصاد المنزلي
=====

ومن ناحية المواد الدراسية فـ التربية الأساسية افضل جداا واسهل
ومافيها تعب
والمحاضرات كلهاا بقاعات قريبه من بعض

يعني مانحتاج نركب باصات وتنقل من كيفان الى الشويخ الى الخالدية …الخ

====
والأخت اللي ذكرت ان التربية الأساسيه بس معترف فيها داخل الكويت
حبيبتي والدكاترة اللي قاعدين يدرسونه هذول من وين شهاداتهم؟؟؟

كلهم خريجين تربية أساسية وطلعوا بعثات لـ أمريكا ومصر
والحين احنا بعد
مفتوح لنا المجال لــ الإبتعاث للخارج لأكمال الدراسه

والحصول على الماجستير والدكتوراة

وحبيبتي رااجعي موقع الهيئة وشوفي بنفسج
مكتوب بخط احمرررررر كبير وان التوظيف بيكون بالكلية نفسها بعد
======

والكلام في الفرق بين تربية الجامعة والتربية الأساسية كثيير جداا

ولكن بالأخير
تتفوق التربية الأساسية عن تربية الجامعه

وجهات نظركم احترمها

بس ماكو احسن من جامعة الكويت

انا بالتربيه الاساسيه والحين عملي
ونسبتي دخلتني الاداب بس انا فضلت التربيه الاساسيه عليها

مادري احس التربيه الاساسيه احسن منالجامعه بوااااايد

انا ثنتين من بنات عمي تبارك الرحمن تخرجوا من الثانويه بمعدل عالي ودخلوا الجامعه وضيعوا على نفسهم جم سنه واخر شي حولوا عندنا

ورفيجتي كانت بالجامعه وهي تبارك الرحمن متفوقه ونسبتها كانت 96 بس عقب 3 سنين من الجامعه ماقدرت اتكمل وحولت عندنا وماشاء الله متفوقه وماشيه

وعلى فكره ترى دراستنا مو سهله و وايد دكاتره صعبين بس هم احسن من الجامعه

تبين الصج عاد الناس اتقول الجامعه والجامعه بس برستيج لا اكثر ولا اقل
وبالنسبه للوظيفه فانا اختار اذا ابتدائي او متوسط

على فكره شكثر عندنا دكتورات ودكاتره متخرجين من كليتنا وكملوا دراسه يعني مايبيلها دبلوم ولا شي
ومنهم د راويه الحميدان كان تخصصها علوم والحين اهي بقسم التكنولوجيا ود لطيفه الكندري تخصصها عربي والحين اتدرس بقسم اصول التربيه

انا درست بالجامعه ثلاث سنين وكورس ضاعت هباء الرياح تنقلت فيها بين العلوم والاداب وفي الاخير حولت عالتربية الاساسيه

وبنات الجامعه يعرفون انهم يدشون من اول كور ما يتخصصون واحتمال تقعدين سنتين او ثلاث ما تخصصت لان اذا كنتي تبين تتخصصين لازم تاخذين مواد معينه وتجيبين فيها معدل معين يعني مصعبين الامور

والله يا اختي الحين انا بالتربية الاساسية وعادلولي المواد العامه الي درستها بالجامعه والحمد لله باقي لي سنه واتخرج لان في التربية الاساسيه تمشين بالمجرشيد صح وتتخصصين من اول كورس

بصراحه

تربية الاساسية هو اختياري <———–مثل الي بالدعايه يقول التجاري هو اختياري

وانا متحسفه عالثلاث سنين الي ضيعتها بالجامعه وعلى فكرة كل خواتي جامعيات وكلهم اخذو اكثر من اربع سنين للتخرج من التربيه

اختي تقولي ان الجامعه معترفه عالميا والاساسية بس داخل الكويت بس احس هالكلام غلط لان اغلب دكاترتنا خريجين الاساسية بس اظن لازم يدرسون جم ماده بالجامعه عشان يتعادلون مع الجامعه وبعدين يكملونها ماجستير ودكتوراه
بصراحه اهم شي الكويت معترفه فينا ما يهمني حتى لو بنغلاديش ما تعترف فينا

يقولون فيفرق بالكادر السنوي بس مدري بالضبط شنو الكادر السنوي ؟؟