البدلة البيضه وهمها الكبير عند العرايس :)

انا يعورني قلبي لما اقرا بنات شايلين هم البدلة البيضه

وللأسف كل ماندش عرس نطلع واحنا نقول وع هذي بدلة تنلبس !

بنات ياقلبي انتو لا تفكرون حيل بالبدلة البيضه

انا اقولكم شلون

حطو في بالكم ان :

مو كل غالي حلو ولا كل رخيص ويع

يعورني قلبي لما اقرا البنات كاتبين انا حاطه ميزانية 2000 دينار للبدلة البيضه والمصيبه أجار

والمصيبه الأكبر تلقينها على قد حالها وماعندها غير مهرها

ليش كل هذ1 يا بنات

في وايد أماكن تبيع الرخيص

انا طحت لي على وحده في بيت تصمم بدل عرايس بأوربا ( فرنسا – ايطاليا) وتييب البدل

تسويها مخصوص لج ت
اخذ شهرين على ما تيي

والحمدلله ربي رزقني فيها لاني فكرت بعقل وما احب الاسراف ( آنـا مو بخيله بس أفكر بعقلي حيل )

الاجار عندها ب600 بعد المكاسر لبسه اولى لج وتصميم راقي اوربي ولا أحلى
كانت توها مبلشه تجارتها
الحين مادري عنها

المهم انا بدلتي ما بغيتها اجار شريتها وخليتها عندي

( بليز لحد يسأل عن رقمها لان بجهاز امي ومالي خلق اطلعه وادش المنتدى وأكتب )

وخالاتي لما قلنا لهم انها طلبية من اوربا وجذي بّين عليهم ان مو جايززلهم الوضع

دشيت العرس والحمدلله المدح كان فوق فوق فوق فوق ماتصورت الحمدلله

ولو ابيعها راح يرد لي نص السعر او اقل بشوي

وبجذي فكرت عدل

نصيحه يا بنات لا تاخذون الغالي نصيحه من قلب

واخر شي اجار وبتردين البدلة ونص العرس بيقولون ويع وملبّخ

مصممين الكويت استغلاليين

دورو الاماكن الي مو مشهورة

تلقون الزين وبسعر جدآ معقول

لا تروحين لمصممين كبار دامكم على قد حالكم

بنت خالتي راحت لمصصممم مو متخصص بالعرايس سوت بدلتها بـ 900 وماشاءالله تهبل

للي ميزانيتهم وسط او اقل من الوسط ومعتبره البدلة البيضه هم كبير

هدفي لـ هالفئه من الموضوع :

أتمنى تفكرون زين ماتاخذون غالي ولوعه وانتي ما كنتي قادرة عليه بس مضطرة

دوري عدل وبتلقين والله صفّي نيتج

والله اول ما ييت بيت زوجي

قالت لي خالتي رفعتي راسي كنتي احلى عروس بهالسنه

قلت شدعوه !!!

قالت والله ما اجاملج عرايس هاليومين يلوعوون الجبد يا مشتطه
ذبحوننا أوف وايت وضيج ولا كأنها عروس حالها حال الموجودين

بس المنفوش والابيض صار نادر وراقي وخاص بالعروس

الله يوفقكم يارب

بنات ترى العرس والتجهيز كله سهالات لا تحاتين والله