رغم ال dry food الاسهال مازال مستمر شسوي؟ :(

مرحبا بنات

طبعا الموضوع مبين من عنوانه

عندي العتوي مالي اسمه Blue و عمره ست شهور

من يبته و اهو معدته مو مضبوطه لما اعطيه wet food على طول يصير معاه اسهال تكرمون
وديته دكتورته بمستشفى رويال قالت لي عطيه بس dry food ولما مشيته على ال dry food صار احسن ووقف الاسهال بس فترة قصيرة شهر ورجع مره ثانية بالرغم من انه بس ياكل dry food…

رديته الطبيب عطوني دوى نوع حق بليل وثاني بالنهار لمدة خمس ايام قالوا يمكن فيه دود عطيته الدوى وصار احسن ، والطبيب وانا طالعه عطاني انبوبة قالي اذا ما تحسن اييب عينة من البراز وانتوا بكرامة

وقلت له شنو احسن نوع dry food عطاني هذا النوع

وعقب العلاج مشينا على هالنوع لما خلص ولما رحت اييب منه لقيته خالص شريت هذا

والحين صار له اسبوع رد له الاسهال مره ثانية

قولولي شسوي

يتراوالكم شنو فيه ، اهو ينام عالسيراميك يمكن ماخذ برد ولا نوع ال dry food اليديد ما ناسبه ولا شنو ؟ مع العلم اني ما اعطيه اي نوع البان أو أجبان ، حبيبي عايش عالماي والبسكوت

المشكله اني ما ادري شلون احط عينة من البراز وانتوا بكرامة باللعلبة الاسطوانية الصغيره وشلون اقدر اراقبه طول اليوم عشان اوديها بالوقت المناسب :/ …. ما ادري احس لوية

شوروا علي وقولولي تجاربكم لا تطنشوني عفية بليييييييز

انا لما قطوتي تصاب بالأسهال الجئ لطريقه وحده

روب + قفشة عسل << مو تكثرين

و اصومها يوم كامل

واليوم الثاني اسوي لها اكل و يكون فيه نشا الذرا << مضاد للاسهال

تييبين صدر ديايه و تقطعينه و تييبين جزره و كوسا و تبرشينهم

و تحطينهم بماي و تسلقينهم

و تحطين قفشه نشا ذرا و تخلطينه بشوية ماي و تحطينه مع الدياي المسلوق و تحركينه لين يتماسك

و يتقدم للقطو مفيد حيل و افيد من الدراي فود

^^^

ممكن يكون عنده اسهال جرثومي << يكون مزمن بعض الشي

مابي افتي من عندي بس شوفي هالطريقه اذا ما نفعت معاج خليهم يسوون له فحص القناة الهضميه لا يكون عنده فشل كلوي لا سمح الله يسبب له اسهال دائم extraintestinal

غلط اساسا توكلينه بس دراي فود

الدراي فود كثرته مضره للكلى و تسبب انحباس البول مع الوقت

و خصوصا الويسكاس والفريسكاس و غيره يسببون لهم سرطان و يحتون على املاح كثيره

اساسا القطاوه حيوانات لاحمه

ولا تعيش الا على الرو فود ( لحم الخام ) اي انها تصطاد فريستها و تأكلها بحرارة جسم الفريسه

لا تاكل لا مطبوخ ولا مجيس ولا دراي فود ولا معلبات ولا غيره

بس مع التطور تغير كل شي و بدو يعطونهم هالاكلات

مع ان عملو دراسه للقطط الي تمشي على نظام الرو فود << اللحم الحي الني
وجودو انهم يعيشون اكثر من 30 سنه ! بعكس قطط الدراي فود حدها 11 سنه

واسنانهم سليمه و البراز لا رائحه له وصحتهم سليمه و و و الخ

عشان جذي لازم تبدين تنوعين له بالاكل بعد ما يخلص من الاسهال

وطبعا مو تغيرينه فجأه عشان ما يصيبه اضطرابات بالمعده

يكون الطبق 80% دراي فود المعتاد عليه و 20% دجاجه مسلوقه او بيضه
وبعد مرور 3 ايام60% دراي فود و 40% ارز و دجاج او سمك
وهكذا لين يتم تغيير النظام الغذائي

و يحب ان تغييرين النظام الغذائي لان اساسا الدراي فود مصنوع ليكون طبق مكمل ومشبع غذائي لاوقات الحرج فقط لا غير والاكثار منه مضر

و سلامته

شوفي حبي اذا عالاسهال عطيه دوا كابتين موجود بصيدليه البشريه
او وكليه قفشه روب وصوميه يوم كامل بس عطيه ماي
واذ مافاد ضروري تودين العينه لان يمكن يكون فيه جرثومه او دود او فايروس الله لا يقوله
اسفه عالاطاله

فشل كلوي يا حسرة قلبي بعد هذا أمر الله ….

اوكي راح أجرب الوصفة اللي قلتيها مع اني مو ذاك الزود ويا الطبخ ، بس شنو نوع النشا استعمل اي نوع عادي ، وجم يوم اعطيه نشا ؟ بس يوم واحد بعدين اكمل دياي عادي ؟

مشكووووره عالوصفة

اي صاجه انا الويسكاس والفريسكاس كرهتهم من زمان ، اخترعت لما سمعت عن الامراض اللي يسوونها .

أنا ما كان ودي اعيشه على الdry food بس مشكلة معدته ضيقت خلقي والدكتورة بمستشفى رويال قالتلي امشيه عليه ، ولا انا دايما ضميري يأنبني لأني احسه يوعان و مو قاعد يشبع مسيكين :/

من باجر اذا الله احيانا راح ابلش بالتغيير التدريجي نفس ما قلتي

مشكوره مره ثانية عالنصيحة ، والله يسلمج ويخلي لج قطوتج

أنا مشيته على دوى من الدكتور بس كل ما اوقف الدوى يرد الاسهال و ما ابيه اخربط له بالادوية اخاف ينعفس زود

مبدئيا راح أجرب اليوم قفشة الروب مع شوية عسل

ومثل ما قلتي اذا كل هذا ما فاد مالي إلا اني اودي العينة ، يا رب ان شاء الله ما نوصل لي هالدرجة ..

مشكورة حبيبتي عالنصيحة ، و بالعكس كلامج كان مختصر ما فيه اطاله ، الله يخلي لج منورة