{ . مــانوع الإعاقة التي يعانى منها طفلك . }

السلام عليـــكم

حبيت أنزل هالموضوع ونتشارك فيه

1- مــانوع الإعاقة التي يعاني منها طفلك؟

2- شلون إكتشفتيها وشنو كان شعورج؟

3- شنو سببها؟ هل اهو وراثي ؟

4- في وحده منكم زوجها كان ياخذ ابر وادويه والسوالف الي ياخذونها اللي يشيلون حديد؟

واتمنى كل وحده تدش تدعيلنا وحق عيالنا والدعوه بظهر الغيب مستجابه

أنا ولد اختي كان في توحد لكن من النوع الخفيف شلون اكتشفت كلنا لاحظنا انه ولدها كبر بالعمر وليلحين مايتكلم ويحب ناس معينين موالكل ومايلعب مع اليهال واعتقدنا انها شغلة عاديه لكن رجعنا حق دكتور جاسم حاجية وسوالفه اختبار وقال انه في توحد والحمدالله لحقنا عليه وتعالج مادري اذا السبب وراثي لانه خالتى بعد عدها ولدها كبير بالعمر الحين عمره 25 يمكن وهو صغير كان واايد حركي وعبقري بالفيديو قيمز وهالسوالف ولايرد ولايكلم ولايتواصل مع اي احد غير ابوه وماعالجته والحين كبر بالعمر وصار اهدى من قبل لكنة عصبي وانشالله الله يشفي عيالنا ويحفظهم يــــــــارب

نفس الشئ بس انا خواتي الثنتين عند كل وحده منهم طفل يعاني من التوحد الله يشفيهم ان شاءالله ويشفي جميع مرضى المسلمين

اختي اسووم الله لايحرمك منها ويشفيها قادر على كل شئ جل جلاله …والله يجعلها
سبب من اسباب دخولك للجنه …فكلما شكر العبد ربه على كل امتحان
من رب العالمين فــ بأذن الله هو زيادة له في ميزان حسناته..الله لايحرمك
اجر اهتمامك وعنايتك بطفلتك …
ماادري حسيت اني امام انسانه عظيمه واحترمتك قبل لا اشوفك …

انا ولدي فيه متلازمة داون عمره سنة

احبه واموت فيه

اذا ضحك تضحك لي الدنيا

وصاير شرير بس يطق ويسحب في شعري

والحين توها اطلعت الشمس لانه صحى فدييييييته

ادعوا له

ربي يشفيه ويخليه لي يااااااااااااااااااااااااااااااارب

مشكورة حبوبة على موضوعج الغاليه أسووووم
فيج الخير حبوبه
الله يباركلج ويحققلج ماتمنين
أنا ولدي اعاقته مزدوجة عندي 4 وهو الثالث بينهم
أحبه واموووت فيه مالي الدنيا كلها علي .. ولا أتخيل البيت من دونه
يستوعب ويفهم لكن لا يقعد ولا يمشي .. يقولون في ضمور بالعضلات
سحبوه وقت الولادة كان ملفوف الحبل السري عليه
حسبي الله عليهم دار الشفا .. صار نقص أكسجين أثر على العضلات
الحمدالله على كل حال
أسأل الله العظيم ان يشفيه ويشفي كل مريض

حبيباتي الله يشفيييي عيالكم يااااااااااارب وياجركم فيهم وتشوفونهم يلعبون ويركضون جدامكم اذا موبهالدنيا بالاخره انشاااالله

الله يشافي لكم اعيالكم ويخليهم لكم ولايحرمكم من الاجر قولوا امييييييييييييييييييييييين

ولدي اعاقته حركيه ايده اليمين فيها عظمه وحده قصيره والابهام مفقود والكف مايل الى اليسار
وقامته مو طويل وايد بس زين وديته للدكتور عبد الناصر العثمان واحنا معاه من سنتين وايد ستفدنا الحمد لله طال شويه خخخخخ
اهو البجر احبه طبعا هو بجري اكيد احبه وهو ريال الحين وايد اعزز فيه قيمه ان اهو اكبر اخوانه اطرشه يشتري اغراض البيت من الجمعيه مع السواق
يروح ساعات السوق بروحه ويشتري ملابس او جواتي طايح بالماركات عشتو
والحمد لله رب العالمين

ولدي لمن ولدته فيه ورمه بالظهره كبر البيضه فتريت كل مكان محد عرفله وكنت لمن اشربه الحليب يطلع من خشمه على طول وايد كان ضعيف وديت اشعه راسه امريكا قالولي تين بافرب وقت هذا ماي زايد براس ولازم تسوين له عمليه اول ما تولدينه تسوين العمليه عمليته الاولى شلت الورمه وبعد10 ايام زرعوله بايب من الراس لمن تقريبا يم البطن وطبعا هالورمه كانت والماي واهو بطني فااثر على مخه شوي تغليمه بطئ اهو حمدالله مشى بالابتدائي هالسنه في الصف السادس وايييييييد متعبني وما عنده ربع يمشي بروحه بس يحب يسولف مع الكبار