كل شي عن عملية الليزك بهالموضوع حياكم

قوة بنات
اول شي قبل لا اسوي عملية الليزك دورت بالنت عن تجارب الناس اللي تكون بالتفصيل الممل بس ما لقيت ولا شي و هذا اللي خلاني اتردد حيل قبل لا اسويها فقررت اسوي هالموضوع حق كل وحدة محتاجة معلومات و عسى الله يوفقنا وياكم و اذا عجبكم الموضوع ادعولي اتوفق بحياتي

معلومات العملية : سويتها بمركز الزهير الطبي و سعر العملية مع الفحوصات 275 دينار و جهازهم اسمه مل70 طبعا هذا عرض عندهم لي شهر 6 اتوقع و القطرات طلعوا علي ب 40 دينار من الصيدلية اللي تحت المركز يعني كله طلع علي ب 315 ..المركز مكانه يم مستشفى المواساة بالسالمية طبعا انا كنت ابي عند محمد وجيه اللي بدار الشفا بس وايد زحمة طق عليه و استخرت ليما قررت اسويها و اللي شجعني انه تأكدت من السكرتيرة سالتها اكيد الجهاز زين طمنتني و غير جذي سمعة المكان حلوة باقسامها الثانية.. وبعد شغلة في بمستشفى السلام يسوون هالعملية ب 300 من
allegretto غير الفحوصات بس جهازهم اسمه

و نصييييييييييييحة اللي ما سواها يسويها لانه صج عالم ثااااااااااني انا كنت مترددة وايد قبل لا اسويها و تحسفت اني ضيعت الوقت عالفاضي

بالعملية : طبعا اول شي فصخت حجابي و لبسوني كاب بلاستيك و رداء و حتي الجوتي وانتوا بكرامة فصخته و خلوني البس مثل اجياس جواتي مادري شلون اوصفلكم المهم بعدين حطولي قطرة مخدر على عيوني و خليت عيوني مبطلة ما ارمش عشان ينتشر مفعول الدوا وبعد خمس دقايق هم حطولي المخدر مرة ثانية طبعا رهبة مو طبيعية لما دشيت انسدح خفت حيل و يتني افكار انه اطلع و ما اسوي العملية مادري هلوست حيل خصوصا اني شايفة العملية باليوتيووب فبلييييييييييييييييز نصيحة اللي يفكر يسويها لا يدش اليوتيوب و يتليقف و يشوف العملية شلووون خصوصا حق ضعاف القلوب اللي ما يتحملون مثلي ههههه طبعا لما الدكتور قاعد يبلش بالعملية يقولج بالضبط شنو قاعد يسوي عشان ما ترمشين و دايما ينبهج انه تبطلين عيونج و تركزين على الليت اللي بالجهاز و طبعا حطوا على عيني مثل اداة روحت لي النظر وصار مثل ضباب و ضغط على العين بس الحمدالله تمت على خير و ما حسيت بولا شي هني انا ارتحت حيل و حسيت انه خفت عالفاضي و لما بلش عالعين الثانية ماحسيت الا و اهوه مخلص طبعا العملية خذت مني 10 دقايق بس ما طولت كلش على قولة اختي بس انا حسيت اني طولت لاني كنت خايفة
بعد العملية مباشرة : حسيت بوخز خفيف في العين اليسرى مما سبب لي عدم ارتياح بدرجة بسيطة والعين اليمنى ما حسيت بشي بتاتا وظليت مغمضة عيووني و لابسة النظارات من اول ما خلصت العملية طبعا لازم تييبين معاج نظارة و اتوقع اهمه يعطونج اذا ما يبتي و الافضل تييبين نظارة غامجة و لما رجعت البيت حسيت عيوني حساسة للضوء ما اقدر حتى اطالع تلفوني وحسيت بعوار خفيف كل ما حاولت طبعا لبست النظارة ما فصختها يوم كامل ليما نمت وقدرت اطالع تلفزيون بعد 3 او 4 ساعات و الرؤية ضبابية حيل و استمرت ليوم كامل اخذت غفوة لمدة نص ساعه جذي و لما قمت حسيت عيوني احسن بوايد..طبعا الدكتور خلاني اشتري قطرات بس قاللي استخدميهم من باجر مو اليوم خلي عينج ترتاح من الجرح
اليوم الثاني : طبعا اول ما قمت حسيت نظري صفى شوي و حسيت بصداع خفيف طول اليوم بين الحواجب مادري من عيوني ولا من قلة النوم فمو متأكدة من شنو..رؤية ضبابية طبعا ولكن اقل من اليوم الاول بكثييييير يعني الحين اقدر اشوف الحروف و الكلمات بدرجة شبه واضحة لولا الضباب و عرفت انه كلما استخدمت القطرات اللي وصفلي اياها الدكتور كلما اتضحت الرؤية .. اليوم ما رحت الدوام قررت اريح عيوني و ابعدها عن ضوء الشمس مع انه الدكتور سمح لي بشرط البس النظارات..طبعا ممنوع منعا باتا دخول الماي او الصابون للعين يعني كنت حريصة لما اغسل ويهي واستخدم كلنكس مبلل امسح حوالين العين و حتى لما اخذ شور.. و طبعا لازم اخيس ما اغسل شعري (ميخالف عشان العوينات كل شي يهون) بس مسموح لي اخذ شور اغسل جسمي..بديت اشوف تلفزيون و استانست حيل حيل قدرت اقرى الترجمة و اقرى عناوين القنوات بوضوح و الحمدالله ..طبعا اليوم راجعت الدكتوور و سوالي فحص الاحرف و نجحت فيه هههههه و لا تشوفون الكشرة لما الدكتور يباركلي بعيوني اليديدة
و طبعا الدكتور عطاني 3 انواع قطرات كلهم لازم 4 مرات باليوم جذي قسمتهم بالترتيب من الصبح لي بليل
القطرة الاولي (الدوا الاول) الساعه 11 الصبح
القطرة الاولى (الدوا الثاني) الساعه 12
القطرة الاولى (الدوا الثالث) الساعه 1
و اوقف اريح عيوني شوي
القطرة الثانية (الدوا الاول) الساعه 2
القطرة الثانية (الدوا الثاني) الساعه 3
القطرة الثانية (الدوا الثالث) الساعه 4
و اوقف شوي لي موعد القطرة الياي
القطرة الثالثة (الدوا الاول) الساعه 7 بليل
القطرة الثالثة (الدوا الثاني) الساعه 8 بليل
القطرة الثالثة (الدوا الثالث) الساعه 9 بليل
اوووقف شووي
القطرة الرابعه (الدوا الاول) الساعه 11 بليل
القطرة الرابعه (الدوا الثاني) الساعه 12 بليل
القطرة الرابعه (الدوا الثالث) الساعه 1 بليل

طبعا مثل ما لاحظتوا طول اليوم على هالقطرات و التزامي فيهم يرجع لسبب انه الدكتور قاللي كل ما التزمتي بالقطرات كل ما خفت الرؤية الضبابية و انا وحدة وراي دوام
بالنسبة للمكياج الدكتور سمح لي احط مكياج كاااامل هههه لاحظوا كامل بعد اسبوع من العملية و سمح لي اغسل ويهي طبيعي مثل الاوادم بعد مرور 48 ساعه يعني يومين يعني باجر ان شاء الله ممكن يدش الماي بعيووني
اليوم الثالث : من اول ما قعدت من النوم صارت رؤيتي واضحه اوضح بكثير من امس و خفت الرؤية الضبابية وقدرت اسوق و اروح الدوام طبيعي و طبعا رفيجاتي باركولي بعيوني اليديدة و ثنتين تشووقواا و قالوا بيسوونها لوول ..طبعا اليوم لما خذيت غفوة بعد الدوام و لما قمت حسيت انه في احمرار بعيني اليسار بس مافي عوار يمكن لانه دش ماي شوي داخل لما غسلت ويهي بس بعد ما حطيت القطرة خف الحمدالله و لا كأنه في شي.. و هم لاحظت اول ما اقوم من النوم يصير فيني جفاف بالعين والعين اليمين فيها جفاف اكثر من اليسار بس مع قطرة الترطيب يصير كل شي تمام..مافي صداع الحمدالله ..رؤية ضبابيه خفيفة..و لاحظت انه الرؤية بالعين اليمين اوضح من الرؤية بالعين اليساريمكن هذا شي طبيعي لانه للحين نظري مو ثابت و الحمدالله قدرت اطالع تلفزيون و اشبك بالابتوب من غير لا اتحسس من ليتات البيت ومافي اي مشاكل و الحمدالله مر اليوم عادي و قررت اني ما اطلع لسببين اول شي لاني ما اقدر احط مكياج عيوون كلش حتى لو شووي لووول و غير جذي في وحدة اعرفها سوت ليزك و مادري شلون حاشها غبار دش بعينها سوالها احمرار بعينها فديروبالكم شوي
اليوم الرابع: النظر وضح اكثر و لكن للاسف اهملت القطرات اليوم لاني طلعت و ما التزمت فيهم بس عموما النظر واضح اكثر من امس
اليوم الخامس: للاسف الرؤية ضبابية جدا لانه امس ما التزمت بالقطرات و احس انه عيوني جافة شووي فالحين انا ببداية اليوم و قاعدة التزم بالقطرات حسب الجدول اللي حطيته و االحمدالله خفت الرؤية الضبابية
اليوم السادس: استمرار الرؤية الضبابية بس اخف من امس و الرؤية ولله الحمد واضحه لكن شوي مشوش اتوقع يبيلي اسبوع بعد و بيصفى نظري بأذن الله و اليوم عندي عرس فدقيت على السكرتيرة و قتلها ميخالف احط ميكب ؟ اليوم بيصيرلي اليوم السادس جان تقولي عااادي حطي لا تشووفون الونااسة لوول بس هم راح اصير حريصه على عيوني لما امسح الميكب

المشاركة الأصلية كتبت بواسطة cup-cacke يعطييج الف عاااااااااافيه..جد جد موضوعج يا بوقته..انا نظري ضعف بسبب الاب وقعدتي عليه 24 ساعه…ومليت من العدسات والنظارات..وكان ودي اسوي عيوني..بس خرعوني بشغله يقولون لا سويتي العمليه تتمين اكثر من اسبوع بدون تلفزيون او نور او اي شي..تقعدين بظلمه…يعني مو نفسج كل يوم تتحسن الرؤيه عندج..لايقولون لازم بالمره ماتشوفين شي ولاتطلعين بره

المشاركة الأصلية كتبت بواسطة cup-cacke وتنصحيني بنفس الدكتور..او اللي بدار الشفا

المشاركة الأصلية كتبت بواسطة ذاهبة انا بعد ودي اسوي عيوني بس قالو لي اسبوعين ولا ليت وطالعين التلفزون وطلع بعد

المشاركة الأصلية كتبت بواسطة هيونه:) تسلمين حبيبتي ….بس كم كان مقاس النظر قبل العمليه.؟؟

المشاركة الأصلية كتبت بواسطة AL ANOOD مشكوووووورة على المجهود .. كلامج ريحني لاني شفت اعلانهم .. وقررت اسويها

المشاركة الأصلية كتبت بواسطة ((قاهرتهم)) يعطيج العافيه وماقصرتي

المشاركة الأصلية كتبت بواسطة مواضي مشكوره وجزاج الله خير وتنصحيني اسويها والحين كم صارلج من سويتيها وتشوفين 66

المشاركة الأصلية كتبت بواسطة dectora 7elwa الف مبروك وديري بالج من الجفاف ترا هو اللي يخرب النتيجه

المشاركة الأصلية كتبت بواسطة ¤§ زيتونة §¤ حمدلله عالسلامة حبيبتي وقرت عينج بقطتج للعدسات ههههههههههههه انا مفكرة اسويها الصراحة مليت من النظارة كل يوم مفصلة نظارة وقاطة الثانية لاعت جبدي من لبس النظارة حتى بالاعراس مااعرف البس العدسات بالمرة شكلي بسويها عند هالدكتور ماشاءالله شكله زين ولا شرايج؟