سويت عملية شد ذراعين و بطن عند الدكتور اشرف عبد القادر

السلام عليكم و رحمه الله و بركاته

الحمدلله سويت عمليتين شد على يد الدكتور أشرف عبد القادر في مستشفى السيف
سويت عمليتين بوقت واحد أول عملية شد للذراعين الى منطقة الاباط لان كان حيل مترهل بعد عملية التكميم و ثاني عملية شد للبطن

بقولكم قبل العملية شنو صار :

راجعت الدكتور اشرف بشهر 12 و طلب مني بعض التحاليل و سويتهم و بنفس اليوم فحصني و حده فشلة وقفت جدامه بس بصروال بس للامانة ما يخزج يعني بس يفحصج من غير ما يتمادا بالنظرات

رجعت للدكتور بعد يومين شاف تحاليلي و الحمدلله كل شي اوكي و قالي روحي للسكرتيرة و حددي موعد العملية و انا حسبالي مواعيده بعيده من حجي البنات عنه بس عادي مواعيده مناسبة

طبعا قالي انتي جسمج كله مترهل شنو حابه تشدين بالبداية قلت له ذراعي قالي انصحج تسوين وياه مره وحدة بطنج علشان يخصملي من قيمة العملية و هم علشان الكورسيه اللي بلبسه يغطي منطقه الذراعين و البطن و خذا مني 2600 دينار لعملية الذراعين و البطن من غير حساب المستشفى

و حددت موعد العملية بتاريخ 10-1-2013 و الموعد مو متاخر بس لظروفي انا الخاصة اجلت الموعد شهر تقريبا من مراجعتي وياه
بعد فترة دق علي الدكتور احمد حجازي المساعد للدكتور اشرف و بلغني ان عمليتي تأجلت كم يوم لان الدكتور صارتله ظروف و سافر و الموعد اللي أكدته خلاص تاريخ 14 – 1 -2013

بالنسبه للكورسيه : بعد العملية لازم الالتزام بالكورسيه علشان يشد الجسم و الدكتور احمد حجازي مساعد الدكتور اشرف اخذ مقاساتي و عطاني مواصفات الكورسيه المناسب لي و دقيت على الشركة و يوصلونه لج بنفس اليوم و سعره 75 دينار و شريت عدد 2 كورسيه للنظافة و التبديل

يوم العملية :

رحت مستشفى السيف الساعة 11 الصبح لان عمليتي الساعة 1 الظهر و كنت صايمة و دفعت حساب المستشفى 1025 دينار شاملة اقامة يومين من غير التحاليل و لا الدكتور المساعد و لا الادوية اللي اخذهم البيت .

تجهزت للعملية و الدكتور اشرف قبل العملية قالي انا شلون ما صورتج و تخيلو رديت تفصخت جدامه ووقفت و صور جسمي من غير ويهي

طبعا حيل تاخرت عمليتي المفروض 1 الظهر بس ما سويتها الا 3 و نص العصر و ما حسيت بنفسي الا الساعة 7 و نص بليل يعني عمليتي كانت 4 ساعات تقريبا

الحمدلله العملية كنت متخيلتها مؤلمة حيل بس العوار بسيط يعني محتمل بس برابيشي اللي في بطني مئذيتني و دخولي للحمام بعد مؤذي و عقب عمليتي على طول الدكتور لبسني الكورسيه و ما افصخه كلش حتى لو بدش الحمام عزكم الله لان في فتحه من تحت كبيرة للبول و للخروج

ظليت بالمستشفى 3 ايام و دفعت فرق الزيادة و دفعت فلوس طبيب مساعد و الادوية و طلع علي 261 دينار يعني المبلغ الكامل اللي دفعته لمستشفى السيف 1286 دينار

المستشفى رعايتهم وايد ممتازه و مستشفى هادي و سبق لي اني سويت فيه عملية التكميم علشان جذي اخترته لان الدكتور خيرني بين مستشفى السلام او السيف و انا السلام ما احبه بس عيب مستشفى السيف ان لمن تبين تسوين اجراءات الخروج يأخرونج وايد بس انا عندي اهم شي الرعايه

الحين من سويت العملية صارلي 6 ايام و الحمدلله حالتي زينة و باجر عندي موعد عند الدكتور علشان البرابيش و علشان يغيرلي على الجرح

انا للحين ما اقدر امدح شغلة او أذمه لاني توني مسويتها و حتى شكل الجرح ما شفته لان فوقه شاش و لزاق العمليات و راح أقولكم بأمانة تامة عن حالتي بموضوع منفصل بعد فترة
بس للامانة الدكتور ارتحتله نفسيا بس النتيجه للحين مجهولة و ادعولي الله يقومني بالسلامة و النتيجه ان شاء الله تكون مرضيه لي يا رب

نصيحة : عملية الشد يبيلها 3 أشياء :
1- الجرأة 2- الصبر 3 – فلووووووووس
الجرأة ان قلبج لازم يصير قوي و تتخذين قرارات غير ان لازم تتفصخين جدام الدكتور

و الصبر لان كل شي بالعملية يبيله صبر و الفلوس ان العملية مكلفة شوي تقريبا طلعت علي للحين فوق 4 الاف دينار شاملة الدكتور و المستشفى و الكورسيهات و النثريات .

ملاحظة : شكر خاص جدا جدا للعضوة كلي غنج لانها السبب بعد الله سبحانه و تعالى اني سويت العملية لانها شجعتني و ساعدتني و عطتني معلومات وايد مهمة عن الدكتور و كل شي خاص بالعملية الله يوفقها بحياتها يا رب و يرزقها كل خير

الحمد الله على السلامه
ومبروك الشكل اليديد أنا معاج ان الدكتور شغله روعه أنا سويت عنده
وتتهنين باللوك اليديد ….

الحمدلله على سلامتج حبيبتي

الحمدلله على السلامة حبيبتي
والله يفرح قلبج بالنتائج
ويسعدج

وعأبالنا يا رب

حبيبتي وووايد فرحت لما قريت انج سويتها انا متابعتج من زمان من زواجج لين وفاه ريلج الله يرحمه لين تكميم واللخين وله فرحت لج عسى الله يوووفقج وتصيرين احلااااااا والفال انشاءالله تبلغينا بزواجج و ولادتج انشاءالله

حمدالله عالسلامة يالغالية

الحمدلله على سلامتج
ومبروك النيو لوك

الحمد لله على سلامتج يا أميرة و ان شاء الله تتهنين بنتيجه العملية

مشكورين بنات اللي تحمدو لي بالسلامة و الفال لكل وحدة فيكم يا رب اذا محتاجة للعملية

الله يسعدج حبيبتي و الحمدلله على كل حال
الحياة ماشيه و الحزن ما راح يرجع اللي راح و لازم اكمل اللي بديته

الله يهنيج بالنتيجه يااارب
طيب التكميم بكم سويتيه لاهنتي شامل المستشفى وكل شي و شلون النتيجه

و بغيت اسالج يعني توقفين قدام الدكتور بسروال طويل و ستيان ولا شلون و الدكتور نظامه يخز ولا عادي صراحه احس فشششششله

الحمدلله ع السلامه
متابعتج

الحمممد لله ع سلااامتك خيتي ^^

التكميم سويته عند الدكتور خالد العنزي هذا موضوع ثاني غير الشد
الدكتور خالد اخذ بالعيادة 2000 دينار و المستشفى تقريبا 700 دينار بس من غير الادوية
الحمدلله النتيجه حلوة بس ما انصحج تسوين تكميم اذا وزنج مو متعدي 100 كيلو