[] وأخيرا بيضت أسناني بالليزر، تجربتي مع عيادة المنار []

======

رحت بيضت بعيادة " المنار " بالسالمية
صايرة يم سوق السالمية.. العيادة داخل عمارة بالدور الأول..

=======

أول شي كنت حيل متخوفة، وانا كنت اساسا ابي ابيض من زمان
بس كل مرة اهون واتردد من كلامكم بالمنتدى. لان اساسا هالقسم
كله اسئلة عن الليزر وقليل الي جربت وسوت والباجي كله يطلعون فيه
مليون عذروب مع انه ماسوو.. سويت استخارة وطلعت زينة
وتوكلت على الله ورحت.. ما اجذب عليكم، كنت حاطة ايدي على قلبي
ولما دخلت غرفة الدكتور قلت بقلبي واااي برجع البيت انا شسويت وكنت ميتة خوف بس الحمدلله
كل شي راح لما شفت النتيجة..

===========

خذوا مني 75 دينار
فتح الملف + الكشف = مجااانااا

=========

أول مارحت فحصلي الدكتور أسناني علشان يشوف اذا اسناني تنفع للتبييض أول لأ؟
وبمجرد ما فتحت حلجي وكشف على اسناني قالي تمام واسنانج حلوة وبيضة تبين بعد
زيادة!! قلتله اي دكتور لاني مستخدمة لصقات كرست بو 14 يوم علشان جذي تشوفهم
فاتحين شوي والصفار خفيف وانا اطمح لبياض ناصع..

=========

بعدها قالي الدكتور خليني اقولج انواع التبييض
قالي فيه تبييض بالليزر واقدر اسويلج ياه اليوم وتطلعين
وفيه تبييض قوالب وهو ان نسوي قالب على شكل اسنانج
والتبييض يكون فعال وقوي

=========

قلتله دكتور شنو الفرق بين تبييض الليزر والتبييض المنزلي (القوالب)؟
جان يقول ان تبييض الليزر يبيض الاسنان الامامية او الاسنان
الي لما تتكلمين وتضحكين أما القوالب (المنزلي) فهو يبيض كل الأسنان
حتى الداخلية الي ماتبين وقلتله الليزر شكثر يطول؟ جان يقولي سنة اذا حافظتي
عليهم

==========

فقلتله الصراحة دكتور انا مالي خلق انطر زيادة وودي بتبييض فوري
ومالي خلق انطر ايام وايد علشان اشوف النتيجة.. جان يقول خلاص ولا يهمج
اسويلج ليزر

===========

التعليمات: قالي قبل التبييض بالليزر:

1- أستخدم لمدة شهر معجون أسنان أبيض سادة >> يعني ما يكون فيه خط احمر او ملون
2- أسبوع كامل ما أكل ككاو
3- أسبوع كامل ما أدخن ولا أشرب جاي ولا قهوة ولا مشروبات ساخنة وباردة ملونة
4- اشرب فقط ماي + لبن + حليب + سفن آب خلال هالأسبوع
5- ما أكل أي نوع من انواع الصوصات والمرق والكاتشب لمدة اسبوع
6- وباجي الاكل انا حرة اكل اي شي.. لحم ودياي وسمج..

============

التبييض بالليزر عبارة عن 3 مراحل بالجهاز " زومzoom " مال التبييض
قبل لا يحط الجهاز يلبسج نظارة مالت الليزر علشان تحمي عيونج بعدين
يفتح حلجج ويحط الفتاحة المثبتة.. وبعدين يحط مادة حماية حوالين اللثة علشان لا تحترق
او تحسين بألم.. بعدها يحط مادة على اسنانج ويبدا يحطلج الجهاز

=============

انا قلت التبييض بالليزر عبارة عن 3 مراحل. يعني كل مرحلة مدتها 13 دقيقة ولما انتهي من المرحلة الأولى الجهاز يوقف ويسألني الدكتور تحسين بعوار أو حرق؟ وأنا اقوله احس بشوي فوق ف يحطلي مادة عازلة زيادة والمرحلة الثانية نفس الشي وبعدها المرحلة الثالثة والاخيرة نفس الوقت ثلاثتهم 13 دقيقة.. يعني تقريبا التبييض + الفحص خذا مني 45 دقيقة (ساعة الا ربع )

============

عقب ما خلصت قالي مضمضي، القلاص يمج.. وتعالي شوفي اسنانج بالمنظرة.. واااي حسيت نفسي، مثل هذيل الجياكر الي يسوون عملية تجميل ويشوفون نفسهم لأول مرة بالجامة هههههههههه

=============

رحت شفت امبي فرق فرق بنات حسيت براحة وبس شفت اسناني قمت اضحك
والسستر والدكتور يضحكون وياي احسهم مستانسين أكثر مني وحتى الرسبشن تضحك معاي
وتقولي مبروك >> اكيد تقولج مبروك وتضحكلج دافعة فلوس مو بلاش لول

انا انشاالله بس اشييييل التقويم الي باط جبدي اسوي تبييض باذن الله …