تجربتي مع الاستغفار وصلاه الليل

اشلونكم يا حلوات
حابه اكتب لكم تجربتي مع الاستغفار وصلاه الليل
طبعا محد فينا ما يمر بمشاكل وهموم
بس انا من بدايه 2024 والله قسما بالله ما شفت يوم حلو مصايب وبلاوي ومشاكل
وكنت ادعي واستغفر تخلص المشكله الي انا فيها ومايمديني ارتاح واطيح بمصيبه ثانيه وظليت على هالوضع لي شهر 4 من هالسنه
مشاكل مع زوجي ومشاكل ماديه ومشاكل مع اهلي ومشاكل الدوام ومرض ووفاه ابوي و………الخ وكنت احيانا ايأس تحوشني حالات ياس واحباطات واكتئاب وكنت ادعي على روحي بالموت كرهت الدنيا
المهم اني واظبت على الاستغفار واصلي صلاه الليل والحمدلله انا وزوجي عقب الصيحه والمشاكل صرنا اوكي اخر هوشه بينا كانت شهر 4 خو شهر 3 و4 قضيناها نجره وهواش حتى انه كان يسبني واسبه شوفوا لي اي درجه ويقول لي يارب تموتين واقول له انت يارب تموت وراح ادعي عليك بكل صلاه انك تموت وافتك منك اكرهك
والله جنه عين وحايشتنا كان بفتره شهر 3 و4 الي توهم طافوا يسهر بره بالقهاوي والديوانيه مايرد الا الفير واذا رجع مبجر يقعد مع اليهال او مع اهله بالصاله وهاملني وهو بالاول حده 12 او وحده بس كان يعاندني وانا اذا راح الدوام اطلع مع رفيجاتي قهاوي ومجمعات وكان من وراه طبعا واذا راح الدوام اهو دوامه شفتات كنت استانس
وكنت اشكي عند رفيجتي وكله ابجي اقول لها الي فيني شي مو طبيعي مادري ليش جذيه او اذا تزاعلنا بنفس اليوم متصالحين بس الحين عادي شهر شهرين ما نكلم بعض واهي تهديني
تهاوشت مع زوجي ومع عمي ابو زوجي وصرت ما اكلمهم ولا امر صوبهم حتى خالتي شاشت عليي واحنا الي كنا حيل مع بعض بس عقب تصالحت مع عمي بس خالتي ما صالحتها لان ضايقني انها كله بصف ولدها وانا الي وقفت معاها يوم طاحت بالمستشفى وحاشتها الجلطه ووقفت معاها اكثر من بناتها بس حمواتي بعد عمري وقفوا معاي وواسوني حتى حماتي الصغيره تهاوشت مع خالتي علشاني اشكره بطتها بويه امها انتي منكر حسنه ولا تنسين بس الالف دينار الي عطتج اياها سلف وطيحت عليج الاقساط يوم مرضتي انا كنت السنه الي فاتت مسلفه خالتي وكانت تدفعهم لي اقساط كل شهر ترى يمكن اخذت منها 4 او 5 اقساط كل شهر تعطيني 60 والباجي طيحتهم عليها يوم مرضت و عليها بالعافيه بس بنت خاله زوجي ما قصرت عسى ربي يحقق لها كل الي في بالها ويسعدها دنيا واخره اهي الي اقنعتني اني اصالحها وانا قلت لها لان خالتي قالت حق خواتها وحرفت الموضوع وانا وضحت النقطه لبنت خاله زوجي وقالت لي احنا مصدقينج لان انتي سويتي لها الي ما سووه بناتها كافي انج متحمله وعايشه بالضيج غرفتين وحمام من اول ما تزوجتي وليلحين وقالت لي كل من يمدح فيج على وقفتج مع خالتج
بس واظبت على الاستغفار والدعاء صلاه الليل يمكن مو يوميا بس احاول اصليها اغلب الايام والله من شهر 5 الا الان الحمدلله صايرين سمن على عسل ومتفاهمين وقام يقعد بالبيت والحين صار لنا 3 اسابيع نقلنا سكن يديد مع حمولتي وتوسعت بالسكن الحمدلله كنت بغرفتين وحمام الحين عندي غرفتين وصاله كبيره وبلكونه راهيه وبنسوي مطبخ والمنطقه مكانها قريب حيل حق دوامي ومدارس عيالي ولي الحين مواظبه على الاستغفار كل ليله انشغل سوره البقره ومواظبه على صلاه الليل والدعاء وبفضل من ربي حاليا اموري مستقره مع زوجي وامي وخواتي واخوي الكبير بس اخوي الثاني ما اكلمه ولا ابي اكلمه خل تنفعه زوجته ابوي مات وهو غضبان عليه لكن حسبي الله على زوجته
امس حتى رفيجتي كلمتها الي كنت اشكي لها كونها اعز صديقاتي وقالت لي صوتج متغير ماشاء الله مبين انج مرتاحه نفسيا
الحمدلله الحمدلله بس في اشياء هم ناطره ان ربي يحققها لي ويارب تتحقق
الاستغفار طبعا اقل شي 120 مره احاول استغفر لي 500 او 1000 وسوره البقره احيانا اقراها وكل ليله اشغلها والله صج الحمدلله فيه نتيجه بس الاستغفار صار عندي مثل الفرض وطبعا الصدقات اتصدق لو بالقليل
اللهم لك الحمد كما ينبغي لجلال وجهك وعظيم سلطانك
وادعوا لي ان الله يتمم علي ويحقق لي كل الي في بالي

الله يتمم عليج
فرحت من قلبي الله ييسر امورج وتشوفين الفرحة دوم
ويصلح مالج وولدج وزوجج والاهم دينج

عسى ربي يوفقج وتكونين من فرح لفرح وخلييج على الاستغفااااااااااااااااار حتى بوقت الرخاء

ماشاء الله تبارك الرحمن

جزاج الله خير ع ذكر هذا الموضوع ..

حبيبتي عسى الله يتمم عليج راحة البال ويهديلج ابو العيال

ما شاء الله

جزااااااج الله خير
و الله يتمم عليج و يرزقج من فضله

الله يتمم عليج أختي فعلا الاستغفار أنا اعتبره *** حلال من الله صج صج فوايده عظيمه وتأثيره سريع الله يتتم علينا وعليج يارب ويوفقنا لما يحب ويرضى

الاستغفار عن تجربة عجيب انا اذا ابي اسهل اموري او ابي شي استغفر دايما واوصل جم الف باليوم .. بس حبيبتي شرحيلي صلاة الليل انا اصليها ركعتين وعقب شفع ووتر وادعي .. بس ياريت تذكرين شنو الدعاء اللي تدعينة وجذي .. والله يهنيج على طول ويبعد عنج الهمووم والمشاكل يارب .. انا والله يا بريتتي مرة انظلمت من 4 اشخاص بدون مبالغة ومرت علي فترة كنت منهارة ما انام اصلي من كثر البجي والله اشاهق ما اقدر اسجد اختنق تخيلي لي وين .. بس والله كنت بكل سجدة اقول (( اللهم انت حسبي ووكيلي فحسبي الله ونعم الوكيل على من ظلمني اللهم من اراد بي سوء فاشغلة في نفسة ورد كيدة في نحره واجعل تدبيره في تدميره)) كنت ادعي هالدعاء من قلب ونيتي عليهم .. والله العظيم ما مرة شهرين ما تخيلين اللي دقت تبجي وتقولي حصة حلليني انا ظلمت واللي بعيني ظاحت ابلوه مو مشكلة والله ابلوة والزمن دار ودقت منهاره تقول الكل تخلى عني ماعندي غيرج واللي حاشها اكتئاب والله العظيم تاخذ حبوب مهدأ من دكتور نفسي وصارت ما تطلع حق الناس .. والله يابريتي الاستغفار والدعاء وقيام الليل عجييييييييييب عن تجربة شوفي انا ما استهزأ بلي ظلموني بس اقوولج شوفي ربج شلون والله العظيم ال4 كلهم ردولي منذلييييييييييين فوق ما تخيلين ويدرون هذي حوبتي فصج صج توكلي على ربج والاستغفار صج صج حياتي اهوا اللي يسهل اموري اهوا اللي يريحني ان تضايقت اهوا اللي يريحني اذا انظلمت اهوا ينصرني لدرجة حتى لما اكون بمكان زحمة او شي من استغفر تتسهل امووري بشكل مو طبيعي طبعا كل هذا بعد التوكل على الله والاستغفار والذكر والصلاة

الله يتمم عليج

الله يفرج عليج وعلى المسلمين

ماشاء الله تبارك الرحمن
ربي يسعدج دنيا واخرة ويرزقج ربي كل ماتتمنين يارب
شجعتينا يالحبيبه ربي يرزقج الفردوس الاعلى يارب

الله يتمم عليك يــارب ويسعدك ويحقق ماتتمنى
ربي مايخيب ظن من دعــاه

كملي الاستغفار وسوره البقره وقيام الليل
وربي يشــرح صدرك ويسعدك دنيا وآخـــره

سبحان الله وبحمده سبحان الله العظيم عدد كل شئ

ماشاء الله عسى ربي يحقققققق كل ماتتنمنيـــــــن

الله يتمم عليج ان شاءالله

وان شاءالله يتحقق كل اللي في بالج يارب

الله يتم عليج السعاده والصحه والعافيه
ياارب