تجربتي مع عمليه الليزك

السلام عليكم

اشلونكم عساكم بخير

حبيت اليوم اقول لكم عن تجربتي مع عمليه الليزك

اول شي انا صار لي 10 سنين البس نظاره طبيه

وعمري ما كنت البس عدسات حتى لو طبيه الا في المناسبات

يعني طول عمري على النظاره

وكنت اسمع عن عمليات الليزك بس في كل مره اتردد

واشوفه إن مو ضروري

مع إن اشوف إن شكلي بالنظاره الطبيه و الميك اب مو حلو

بس مثل ما تقولون تعودت

عاد وحده من رفيجاتي قالت لي مره ليش ما تسوين عمليه ليزك انا سويتها عند عبدالمطلب بهبهاني بــ 500 دينار العينين قلت لها إن شاء الله لما اتخرج من الجامعه

ويوم تخرجت لهيت بالديوان والتسجيل والسفر ودورة icdl وما عطيت للعمليه اهميه

عاد مرت خالي سوتها عند دكتور وجيه بمستشفى دار الشفا بــ 450 تقريبا

وبهالفتره عاد دشت السالفه براسي صج قمت عاد اسأل مني مناك عن العمليه والدكتور الزين وتجارب الناس فيها وهم كنت متردده

سافرت ورديت وقلت خلاص نص السنه على الاقل يكون عندي معاش ومعطله اقدر اسوي العمليه على الراحه

بس بعدين انخطبت وتحددت ملجتي وقعدت اقول يعني لين متى لابسه النظاره ليش ما اسوي الليزك الحين دام عندي فلوس شويه ودام توا الناس على الدوام خاصه إن قريت في أكثر من موقع إن بعد العمليه بيوم اقدر امارس حياتي بشكل طبيعي

بس اهم شي اول يومين ما يدخل ماي بالعين وبنفس الوقت ما افرك عيني حيل لمده اسبوع

طاح بإيدي بالمنتدى موضوع cat women حاطه تجربتها بالتفصيل الممل عن مركز زهير الطبي وعمليه الليزك وكان السعر حيل مغري

وهذا لينك الموضوع كل شي عن عملية الليزك بهالموضوع حياكم

رحت العياده طبعا بالسالميه قريبه من مستشفى المواساة

اسم الدكتور نيوكلاس حجار لبناني وخوش دكتور محترم وفاهم شغله زين

مشكلته إن مو دايما يكون بالكويت اسبوع في لبنان واسبوع في الكويت

المهم اتصلت على المركز وخذيت موعد حق الفحص وقالت لي السكرتيره إن الفحص الشامل بــ 70 دينار

رحت اهناك الساعه 9 بليل

واهناك سوت لي الممرضه فحص اولي على الجهاز نفسه الموجود بمحلات النظارات

واكتبت بالملف ما ادري شنو!

بعدين دخلت على غرفه الدكتور وقعدت على كرسي جهاز الفحص وحطيت حنجي لووول على المنضده >>>متعوب عليها ترا هههههههه

وقام يفحص العينين

بعدين ياب لي جهاز ثاني حق العين وحط لي نظاره فيها عدسه وشغل جدامي شاشه فيها احرف بالانجليزي وقال لي اقري الاحرف وقريتها اوكيه لما كلما وتصغر الاحرف وصلنا لما 10 متر عاد في احرف ما اشوفها عدل احسها مغبشه مشوشه عاد حط لي عدسه ثانيه وقلت له اوكي وجرب معاي الالوان الاحمر والاخضر

ونفس الشي صار باليسار

عاد سمعته يقول حق السستر اليمين – 5 / 6

واليسار ناسيه والله جم بس اضعف من اليمين ووايد غير لي العدسه عشان تضبط وياي

بعدين طلعت منه رحت غرفه دكتوره ثانيه مساعده له هنديه وحطت لي جهاز ثاني حق قياس الالوان

بعدين حطت لي جهاز ثاني حق بعد وقصر النظر

اخر شي حطت لي بعيوني قطره مرطبه كنت خايفه منها انها تحرقني أو تغز لووول بس حيل عاديه

بعدين يابت نفس القلم ومن فوق لي فوق تدخله ببؤبؤ العين أو سواد العين مثل ما نقول عشان تشوف سمك القرنيه

خلال ثواني انطبعت كل النتايج بآله الطباعه لان كل شي على كمبيوتر وقدمت الدكتوره النتايج حق الدكتور

والحمدالله قال كل شي اوكيه وقال بامكاننا نسوي حق العينين ليزك

وقال لي حددي الموعد اللي تبينه حق العمليه

ونصحني لوول قال لا تشوفين العمليه بالنت أو اليوتيوب عشان ما تخافين ترا العمليه ابسط من جذي

قلت خل افكر شوي خاصه إن العين مو لعبه ومو شويه

مع اني وايد سمعت إن العمليه ما تسبب العمى في حالة الفشل

ووايد ناس يقولون ليش اطبا العيون ما يسون العمليه الا إن فيها إن السالفه

وناس تقول تعور وتحرق بعد ما يفتح البنج مال العمليه

فكنت متردده بين هالاراء :/

عاد انشغلت بعدين بسالفه المنطقه التعليميه والروحه والرده

وحاولت استفسر أكثر من البنات في المنتدى وارسلت رساله حق كات ومن لان مسويه العمليه عنده بعد بس للاسف ما ادخلت

و سبحان الله بروحي بروحي تشجعت و قررت اسويها يوم الاثنين

رحت يوم الاثنين اللي طاف الساعه 9 ونص واشوا كان الدكتور موجود

خذتني السستر غرفه العمليات كنت مو خايفه بس كان ودي يكون احد معاي بالعمليه خاصه إن العمليه مافيها بنج كامل بس السستر ما رضت تخلي امي وياي تدخل لووول

عاد قالت لي السستر افسخي حجابج وجوتيج وانتو بكرامه

ويت وحطت بعيني قطره البنج وبعد ربع ساعه حطت لي قطره ثانيه

وبعدها بربع ساعه يابت لي ملابس العمليات ازرق

و كاب حق الشعر

ونايلون حق الريل بدل الجوتي عزكم الله

دخلت غرفه العمليات والسرير بالوسط مع جهاز الليزك

قالت لي السستر انسدحي وخلي راسج ستريت ولا تهزين وتتحركين وايد

وعيونج خليها على الليت الاحمر

وقطتني باللحاف

وعقبها حطت لي قطره البنج للمره الثالثه

بعدها بربع ساعه يه الدكتور

وقال لي خلي عيونج مفتوحه ولا ترمشين وشوفي الليت الاحمر

المهم قال بشتغل اول شي على العين اليمين

فحط شاش على العين اليسار

وياب مثل انبوب فيها ماي ورشها على عيني اليمين

بعد قال الحين بييب الملقط وبتفح عيونج فيها

وايد وايد خرعوني منه وقال إن يشق الوي شق ويعور وما اعرفش فيه

والله ولا حسيت فيه هههههههه

وقال الحين بحط لج شغله راح يسبب لج ضغط وتنعدم الرؤيه خلال ثواني راح اشيل هالشغله

وصج اللي قاله صار بس ما يعور

وطبعا هذي الشغله عشان يشيل الطبقه الشفافه اللي حوالين القرنيه

بعدين قال الحين بنبلش الليزك و ركزي على اللون الاحمر ولا تهزين أو ترمشين حاولي تمسكين نفسج

مده الليزك 60 ثانيه

طبعا الدكتوره المساعده اهيا اللي شغلت الجهاز وكلما ما يصير وقت معين تقول

يعني مثلا تقول باقي 40 ثانيه 30 ثانيه 20 ثانيه 10 ثواني جذي كانت تقول

تحسين بريحه عطبه وحراره بس عادي كلها 60 ثانيه وتروح

لما قال الدكتور خلصنا من العين اليمين ورش عليها ماي وشفت ماسك بايده طبقه شفافه وحسيت انها الطبقه اللي حوالين القرنيه عشان يرجعها مكانها وغط عيوني بشاش

ونفس الشي صار بالعين اليسار بس حسيت إن بعيني اليمين طول أكثر

وخلصت وقال الدكتور الحمدالله على السلامه واشوفج بعد شوي بالغرفه

خلتني السستر ارتاح شوي بالسرير بعدين عاد قامت وامسكتني عشان تمشيني لي برا

ومسكينه حتى شيلتي و نظارتي انا يايبتها لان ما عندهم المهم تكون سودا لبستني اياها

عقبها امي مسكينه يتني وقاعده تلمني خايفه علي لوووول

رحت الدكتور وقعدني على الجهاز وشاف نتيجه العمليه والقرنيه اشلون

وقال تعالي باجر

المهم قال اول شي ما يحوش عيونج ماي قلت لها اشلون على الوضوء !

قال عادي توضي ورشي بويهج ماي بس حاولي إن ما يدش لقلب العين قصده سواد لمدة يومين بس

ولا تفركين عيونج لمده اسبوع

مكياج بعد يومين عادي مافي أي مانع سباحه بعد يومين عادي

التيلفزيون والاب توب تقدرين بنفس يوم العمليه اصلا زين حق اعصاب العيون

وصرف لي على 3 قطارات

احطها 4 مرات باليوم

سعرها بــ 20 دينار

دفعت حق السكرتيره بعد ما طلعت 205 حق العمليه

طلعت من المركز بنظارتي الشمسيه وللحين الرؤيه ضبابيه ومشوشه

رجعت غرفتي وكليت حبتين بندول وحاولت انام بس ما اقدرت

شوي صدع راسي بس مو الصداع القوي يعني على خفيف

واحس مثل عيوني لاصقه داخلها مثل رمل خفيف بس ما يعور ولا يحك

وشوي قامت عيوني تدمع

بعد اربع ساعه قمت اقرا ترجمه التيلفزيون من غير نظارتي الطبيه واااي لا تشوفوني شكثر استانست

واقرا رقم القناه بالريسفير ونااااااسه حيل

صج احلى احساس ونعمه من ربي

عاد ثاني يوم بعد العمليه وسويت فحص النظر

شنو تشققت من الوناسه ليش قال لي الدكتور مبروك نظرج 6/6

وناسه وناسه مو طبيعيه بس طبعا للحين في شويه تشويش وتضبيب بنسبه 50%

قال الدكتور مع الوقت بتكون النتايج احسن واحسن

تاخذ من اسبوع – 6 شهور

بس من ثاني يوم من العمليه تقدرون تسوقون سياره وتدامون عادي مافي أي مشكله

بشرط العين ما تتعرض للشمس والجفاف يعني قطرات الترطيب مهمه والنظاره الشمسيه مهمه

والاستمرار على قطرات المضاد لمده شهر

والعمليه تقريبا اطلعت بـــ 300 دينار مع المراجعات والادويه والفحص

اكتب لكم وانا بغرفتي مسكره الليتات ولابسه نظاره شمسيه

مع إن الدكتور قال لا تلبسينها بالبيت

بس انا احس إن عيوني متحسسه شوي من الليتات

وبس هذا كل اللي صار وياي

الف الف مبروك
الف الحمدلله على سلامتج جنان
واااي التفاصيل تخرع جنون..
كنت مفكرة اسوي ليزك بس من بعد الي قلتيه الصراحة مافيني قوة حدي حدي خوافة
اهم شي ريحي عينج الحين لاطول فترة ممكنة
والله يقومج بالسلامة..

الحمدالله على السلامه جنوووون جد جد اشتقنا لج وايد

وانا افكر في العمليه بعطله نص السنه

الحين ما يمدي

على الاقل احسن من النظارات الطبيه والعدسات

يعطيج العافيه على التقرير

الحمدلله على سلامتج والله يتمم عليج و يوفقج
و مشكورة على ذكر التجربة

الحمد لله على سلامتج ودي تسوي ليزك بس خايفه ومتردده

الحمدلله على السلامة وآنا بعد سويتها عند سامي الربيعة والحمدلله مرتاحة

عليج بالعافيه حبيبتي وسلامتج الف سلامه والله شجعتيني اسويها
بس اكيد بسوي سيرج عن هالدكتور مع ان هالستشفى ماييب الا شطار
انا زهقت من العدسة لازم البسها ولاماشوف شي

الحمدالله ع سلامتج

انا توني قبل أسبوع سويتها عند دكتور مبارك العجمي حده عجيب ماشاءالله ولبق بالتعامل صج صج خوش دكتور بس سويتها ب 500 والفحوصات 50

والحمدالله بنفس اليوم طلعت وسقت وكل شي عادي هههه لان سألت ناس قالولي عادي لأن صج صج شاطر ماشاءالله عليه ووقت العملية صج كنت ميتة خووووف بس ماحسيت بشي لأن أصلا ثواني وتخلص

يلا الحمدالله افتكينا من النظارااااااااااات

يعطيج العافيه حبيبتي و ربي ما قصرتي

صراحه ريحتيني حيييييييييل الله يريحج دنيا و اخره صراحه كنت خايفه من العمليه و من اثاره بس بعد كلامج تشجعت اسويه و الله يكتب الي في الخير يا رب

و الحمد لله ع سلامتج

الحمدلله على السلامه الفال لي
نظرج ضعيف حيل ؟

الحمدلله عالسلامه ومشكوره على التفاصيل انا مثلج ودي اسويها وخاااااايفه حدي
انا ما البس نظاره حاليا بس المفروض البس لان نظري ضعيف خصوصا العين اليسار ولما سويت نظاره صدعت
وحتى سمعت مره وحده تقول ان شخص سوى الليزك وتحسف لان طول الوقت مصدع

انا مستعده ادفع 3000 مو 300 بس ان تضبط العمليه لان اخاف نظري يضعف زود

الحين شلونج؟ تحسين كل شي عادي ماكو اي مضاعفات؟

انا بسوي عيوني ان شاء الله بس مو الحين

بحط اسم هالدكتور عند باللسته

وشكرا ع ذكر تجربتج. ..

همن انا سويت الليزك و الحمدالله ارتحت حييييل و احس زين سويت و ما ترددت فيهاا
بس تصدقوون احس في نقط سوود جدام عيوني مادري من شنوو بحث بالنت يقولون يسمونه ذبابة العين و ما منه ضرر و يروح بروحه في احد صار وياه جذي؟