|
|
حبايبي انا حامل بالسادس وهذا اول حمل لي وامي متوفيه وماعندي احد
ماني عارفه اي شي عقب امي الله يرحمها
مادري متى اجهز وشنو اجهز وين اجهز
وبالنسبه لنفاسي ماعندي خبره ولاشي وخواتي مومتزوجات وصغار ومادري قاعد تمر الشهور وماني عارفه
ادبر عمري
حتي بالمهاد ماعرف ولا حليب شكثر احط له وشنو اسوي صج تعبانه نفسيا هو جا عقب وفاه امي رحمه من الله لقلبي والحمدلله على كل حال
ابيكم تساعدوني تكفووون انا ترددت اكتب لكم بس مالقيت احد يساعدني ابيها من الله ثم منكن
امانه امانه امانه
الله رحمها ب رحمته .. ويغفر لها
بخصوص التجهيز ابدي من اللحين
بخصوص النفاس يمدحوون ام خالد الهاجري كورس النفاس حتى حاطه ورقه مع الكورس شنو متى تاكلينهم
اما ب خصوص شنو تجهوين انطري دقايق اجمع لج اللي راح تحتاجين له ي استفسار كلميني خاص وابشري
لا تحاتين سهل مايبيله شي
روحي مجمع عيد النصار في المباركيه
اخذي ١٢طقم كاملين من التبان الي اللفه و اخذي ثلاث طقوم من سنتر بوينت للمستشفي احلي شي حاليا هذا رايي
خذي لفات قطن ٤ و اخذي لفات صوف ٢ لطلعه
و خذي كنابل ٤ و مخده و سرير و في بسنتر بوينت اسفنجه نايلون تحطين الياهل فيها لتبديل
اخذي فوطه له واخذي صادري زياده
روحي اشتري غوري لغليان ماي البيبي و ثلاث رضاعات اثنينا للحليب و حده للماي و مصاصات و مطاره تحفظين فيها الحار
و الجمعيه سودو كريم للحفاظه و شاميو و صابونه و بورده او كريم جونسون عشان ريحته تصير تنعنش
اما بالنسبه لج بجامات داخليه ثلاثه
ملابس داخليه و دلاغات و دراعات او بجامه ثلاثه
الاستقبال دراعه و كفر كشخه
ورد و اشتري صواني او اجري اتفقي مع محل اللي تبين تطلبين منه الحلو والموالح
عاد سكر و لقاح وهالسوالف عندج بياع الورد او انستغرام
هاتي لج خدمه ٢
اما ادوية النفاس اهم شي اللهوم والحسو يكفيج عن الخرابيط الباجيه تدفي و شربي و اكلي اشياء دافيه
و عن عدد الرضعات العلبه حليب مكتوب عليها الكميه و مقدار الماي لاتحاتين
واذا ميزانيتج تسمع هاتي سستر ٦ساعات من ١٢الي ٦الصبح ترتاحين
اما الاكل اكلج العادي بس العشا يوم قبوط و يوم مرقوق و الصبح عصيده بالبيض الباجي اكلج العاديه و شوربه اذا يعتي العصر
للمعلومه انا جربت نفاس بس البيبي انشاءالله جريب
حاسة فيج
وجهزي من الحين قبل الثقل بس لا تتعبين نفسج
جهزي بالتدريج
و أن شالله سهالات وبعد الاربعين تصيرين خبرة
صدقيني ايام وترووح
1 بالنسبة لرضعة البيبي اشتري مميات الي فيها رقمين وأربع أرقام 4 مميات كافي
وخلي وحدة منهم للاعشاب الي أهو اليانسون مرة وحدة باليوم بس جرعة خفيفة او اذا صار فيه مغص
2
و جهزي سكر نبات لأن كل ياهل يصير فيه بو صفار بالبداية وعلاجه سكر نبات مع ماي و الرضاعة الطبيعية وتحطين البيبي تحت الليت ( البوصفار )
اول شي البيبي يشرب رقمين حليب بس كل 3 ساعات وبعد الأربعين 4 أرقام
ووو جهزي مطارة خاصة حق الرضعات خليها يمه عشان مو كل شوي تغلين ماي حار
وانصحج بحليب نوفلاك ما سبب لبنتي امساك وتوافق معاها بعد ما جربت نوعين قبله
وعلى قوطي الحليب مكتوب شلون الطريقة تحضرين الرضاعة وكم رقم تعطين البيبي على حسب العمر
وانا أنصح ترضعين طبيعي من صدرج وايد اريح من غسل المميات كل شوي تسوين حليب وأحسن حق صحة البيبي عن تجربة ما يمرض ويتعبج وكل يوم من مستشفى لمستشفى
بس بالليل عطيه صناعي عشان ترتاحين وتنامين اطول
ولما ينام الياهل نامي معاه لأن بيصير عندج نقص نوم وتعب اول الولادة
والحفاظ أنصح بحفاظات ليبرو غالية شوية بس اريح لفترة الأربعين لأنها ما تسرب وتتعبج لا بامبرز ولا بطيخ كلهم جربتهم يسربووون هذا احسن نوع
ولما تنظفين الياهل حطي تحته فرشة خاصة للتغيير
ومسحيه بقطن وماي ومناديل جونسون ومسحيه بفازلين وحطي الحفاظة بجيس وقطيها
وشغلي قرآن يمج على طوووووول أهم شي
ولما تكونين قاعدة عودي الياهل ينام على بطنه احسن للغازات المغص بس عينج عليه
بالنسبة الخياط يمكن يعورج اول جم يوم ف المستشفى الي تولدين فيه لاااازم يوصفلج مرهم مسكن
والله يسهل امرج يا رب
الاحتياجات الثانية
2 طقم قماطات مع بلسوت وتبان وصفة كامل وكشخة حق الاستقبال واذا أحد زارج
4 قماطات كافي
10 طقم تبان مع بلسوت
4 أو 5 كابات
10 صدريات مهمممم لأن بتحتاجينهم وايد
دلاغات
4 أو 5 لفاات واللفات غير عن القماط
4 مميات 2 رقمين و واثنين 4 ارقام
حليب
حفاظات
مناديل مبللة ماركة جونسون
قطن
زيت وكريم وبودرة جونسون
فازلين
حوض الاستحمام ولازم أحد يساعدج لما تسبحينه
فوطة
فرشة لتغيير الحفاظ
مطاارة كبيرة للبيت صغيرة للطلعة
ممكن تحتاجين شفاطة حليب اذا بترضعين طبيعي