أنا و اللولب أدعووولي بنات

حبيت أنقلكم تجربتي مع اللولب أو موانع الحمل عموما عشان الكل يستفيد …

أول شي بقولكم بعد ولادتي الاولى صار معاي تسمم حمل ، وما كنت أدري أن الحبوب المانعه للحمل ماتناسبني وجربتها وسببتلي نفسيه خايسه و زيادة وزن فقمت وسألت لما عرفت انها ماتنسبني وقطعتها وكنت استخدم ياسمين
واستمريت بمنع الحمل بطريقة العد و العزل يعني طبيعي وبصراحة وايد أريح بس بعد فترة كم شهر غلطت وحملت والحمدلله على كل حال ربي رزقني بالطفل الثاني ..
المهم
قررت هالمرة أركب لولب لانه اريح من الحبوب وأضمن من العد … وفعلا بعد ولادتي ب شهرين ركبت اللولب وكنت مقتنعة فيه حيل مع ان يوم ركبته جاني عوار في بطني مثل التقلصات وقالولي عادي هذي بس اول الايام وبعدين تروح ظلت معاي هالألام كم يوم اسبوع تقريبا وبلغت الذروة في يوم من الايام لدرجة اني رحت المستشفى وقلت لهم بطني حيل يعورني لدرجة اني ماقدر امشي ( طبعا العوار محتمل بس صاير مثل تقلصات قوية وتزيد اذا صار فيني غازات ) وبعدين اختفت تماااااما ولا حسيت بشي !
طبعا الظاهر على قولتهم اهني صار شي وكان المفروض دكتور الطوارئ يتكرم ويفحصني بدال مايصرفني ويقولي هذا عوار عادي لان اللولب جديد !!!!
(( هذول دكاترتنا بعد … خلف الله عليهم ))
جت الدورة الثانية بعد تركيب اللولب وكانت دورة عاااااادية جدا جدا واستغربت حتى منها لا ألم و لا طولت حيل مثل ماقالولي !!! بس كانت اغزر شوي من دورتي الطبيعية وجدمت يومين !!
المهم صار موعد التجيك على اللولب وطبعا مثل ما انتو عارفين التجيك يكون بعد شهر من تركيب اللولب …
رحت الطبيب ويوم حاولوا يشوفون اللولب من تحت عن طريق الفحص السريري العادي ماشافو الخيط !! دورت الدكتورة الخيط وحاولت تشوف اللولب ماقدرت !! قامت وقالتلي روحي سوي سونار داخلي عشان نتأكد …
المهم سويت السونار الداخلي … وكانت الصدمة ………
اللولب الحبيب …. متحرك من مكانه ….. صاعد فوق …….. ثــــــــــاقب الرحم …. ونصه طالع برا الرحم صوب الكبد ……. !!!!!!!!!!!!!!!!!!
ياويلتي ويلتااااااااااااه
وطبعا قرروا الدكاتره بالاجماع أن اللولب الحلو هذا لازم ينشاااال باسرع وقت وعن طريق عملية منظار !!!
وطبعا الدكاترة بالاجماع بالخاص والحكومة قالولي نفس الشي … وان صعب يطلعونه من تحت لا زم فتحه بالبطن !
وان شاء الله الاسبوع القادم بسوي العملية عشان أشيل اللولب …. وخلال هالفترة نصحوني اني ما اتحرك بقوة عشان لا يطلع اللولب بره اكثر ويسببلي مشاكل
وطبعا قالولي لا تفكرين باللولب مرة ثانية لان جسمج ممكن مايتقبله !!
وقالولي ممكن تجربين الحبوب الخفيفة اللي هي للي يرضعون أو اللزقات أو الإبر … !!! وأنا مو عارفة شنو اختار او ارد على طريقة العزل و العد ؟
وقالولي بعد انهم راح يكوون الرحم من داخل !!! وااااي الله يستر علي
أكيد الحمدلله على كل حال و قدر الله وما شاء فعل …. وقل لن يصيبنا إلا ماكتبه الله لنا
وطبعا هالحالة نادرة ماتصير وايد وعلى قولتهم يمكن سببها دفاشة اللي يركب يكون داز اللولب حيل داخل !!!!!! والله أعلم
أنا الحين خايفة نوعا ما