|
|
السلام عليكم بنات شلونكم وشلون النونو سلم قلبه ربي يحفظهم من كل شر …
حبايبي انا مابي اخرع احد ابد ترى الولاده سهل وايد بس انا ظرفي غير يعني لاتخافون منها ….
………………..
انا رايحه يوم الخميس اللي طاف موعدي عادي مراجعه يوم حطوا السونار على بطني قالوا كل شيء تمام بسسس الدكتوره قالت تبي تشوف عنق الرحم فجأه مابين معها والسبب ان البيبي قالب راسه تحت يعني متهيأ للولاده اوكي هني انهبلت الدكتوره قالت لازم اسويلج فحص داخلي انا رفضت هفت انها توسعني ومعروف انه مو زين ابد المهم عصبت علي واخر شيء خليتها تفحصني والصدمه انها لقتني مفتوحه 2 سانتي هني طارت الدكتوره تدخل اوراقي تنويم قلت لها ما ابي وعد ارد للبيت ارتاح الين اولد مستعده انسدح 4 شهور بس مابي انام عندكم المهم رفضت قالت بس بنخليج تحت الملاحظه يومين بنشوف الرحم يرد او لا انا طبعا هني قلت خلاص اللي تشوفينه ونمت الين السبت طبعا من الخميس وهم ايد داخله فيني وايد طالعه والادين احجام كل يوم شكل وروحي تطلع من احجام ادينهم المهم قرروا السبت يسون لي ربط دخلوني غرفة العمليات وبنجوني كامل علشان يربطوني والدكتوره حسبي الله عليها وين ماودت وجها تخيلوا وهي تنضف الرحم قبل ماتربطه اكتشفت اني مفتوحه 4 سااااانتي طبعا من كثر مادخلوا ادينهم فيني المهم وهي تنظف بطت جيس ماي الياهل تخيلوا والماي كله نزل والبيبي من يوم السبت مافيه ماي بنت اللذين قالت خل نصبر اسبوع يمكن يتكون ماي له من يديد شلون الله اعلم المهم يوم الاحد يوم جيكوا بالسونار والا الياهل ابد مو واضح هذا يعني ان مافيه ولا قطرة الماي بعد قلبي…هني انا انهبل وقمت اصيح واصارخ مابي اولد حرام عليكم تسون جذيه فيني ربي رحمني وارسل لي دكتوره باكستانيه يوم درت ان الجين ماحوله ماي انهبلت قالت اللحين تحطون لها طلق صناعي حرام اذا صبرتوا بتتسمم الام والطفل هني ريلي وامي قالوا اوكي مابيدنا شيء نسويه وحطولي الطلق من الساعه 9 الصبح الين 3 العصر وانا طلقه ورا طلقه الين ماقمت اصارخ اقولهم خلاص ابي عمليه ما اتحمل الالم وركبولي الكمام صج مررررريح وريحني الحمدلله بس اللي موتني يوم يت اولد الساعه 5 المغرب شالوا الكمام لاني صرت ما اقدر اساعدهم ابد بالذات الياهل توه صغير مايساعد يدفع وماكو ماي ابد ناشف حوله المكان هذا اللي بهذلني والله يابنات لحظتها اقولها خلاص خلوني اموت مابي شيء ابي اموت لان الجهد كله علي انا وبس وشوي شوي والحمدلله طلعت البنت بعد قلبي تحمس القلب وربي يوفق هالدكتوره وين ماراحت ويفتح بويها ابواب الخير صج رحمة ربي بعبده …
تخيليوا والدكتوره اللي بهذلتني وبطت الجيس متى يتني تتحمد السلامه قليله الحيا من باجر يت تقولي الحمدلله على السلامه وشلون الولاده قلت لها الحمدلله ربي يسرها تتوقعون شنو قالت ودي قايمه وذابحتها تقولي لا هي سهله بس انتي دلوعه بقلبي دلوعه من الي سويتيه فيني لو يهودي ماسوا سواتج يالظالمه تخيلي وطلعت يعني مسويه ظريفه يايه ترقع اللي سوته …
حسبي الله ونعم الوكيل …
ونصيحه بالفحص الداخلي اذا انتوا مادخلتوا شهركم انتبهوا يقولون لكم خل نفحص داخلي هو اللي يودي بداهيه…
بنات امانه ماتتخرعون ترا والله كل شيء تساهيل بس انا مثل ماقلت ظرف غير وكلها غلطه طبيه وان شاء الله ماتصيرون بمكاني يااااااااااااااااارب…
بنات كل من يقرا سالفتي يدعي لبنتي واللي معاها يردون لاهلهم بصحه وعافيه لاتبخلون على هالاطفال ….
بس انتي ولدتي بأي مستشفى؟
أشوه نبهتينا انه محد يسويلنا فحص داخلي
والله يسامحها هالدكتوره اللي غربلتج ومشكوره علي تنبيهج للفحص الداخلي وانشالله تبشرينا بسلامه بنتج ياارب
وماتشوفوون شر انشالله
وبعدين هذي الدكتورة ما تفهم ولا شنو..اصلا الربط المفروض يسوونه بأول الرابع مو بالسادس عشان الرحم ما يتحفز للولادة
حسبي الله ونعم الوكيل
و يخليها لج و لابوها و يفرح قلبكم
الدكتوره لعبت فيج حسبي الله على ابليسها بس الحمدالله على كل حال هذا الي الله كاتبه
والحمدالله على سلامتج
بس شنو اسم الدكتووورة ..لازم كنتي تقولينلها في ويها عشان لا تبهذل غيرج
و جيكي علي بنتج نقص الماي ما اثر عليها !!
والله يقومكم بالسلامه ان شاء الله
حسبي الله على الاطباء مخلينا حقل تجارب
ربى لاتذرنى فردا وانت خير الوارثين
وانشالله الله يشااااافي بنتج وتطلع وتقر عيينج بشوفتها
امبيه شالدكتوره القصابه
الحمد لله على سلامتج
والله يقوم بنتج بالسلامه
الله ياجرج ان شاء الله على اللى هالتعب ياقلبي
يطلع بنيتج بالسلامه
والف الحمدالله على السلامه