" قصـة ولادتـي دعـواتكم لـي "

السـلام عليكم ورحمـة اللـه وبركـاته

شلـونكم بنات شخباركم

بنـات بقـولكم قصـة ولادتـي.., اللـي لي الحيـن ماصحيـت من صدمتهـا…

أنا بجـريه وهـذي أول ولاده لـي أمي كانت تبي اولد عند دكتورتها بهواني و زوجي يبي ولادتي
في دار الشفا او الهادي….
بس أنا كنت مرتاحه لدكتورتي منتهى السالم في مستشفى العرف وبالذات انها مولده بنات
كثير اعرفهم واغلبهم اول ولاداتهم عندها..وانا كنت ابيها لاني كنت انزف في بداية حملي
وكان هالشي يسمونه انذار اجهاض..المهم..بعد ماخلصت التاسع ووصلت لليوم الخامس

بالشهر العاشر قررت انها تدخلني وتحطلي طلق صناعي وتخليني ع الراحه لين ربي يكتبلي ولاده
وتم هالشي دخلت الساعه عشر الصبح..وبدت معاي بالطلق الصناعي..زادت الطلوق..الساعه 7 المغرب
عطتني الطلق الثاني..وقالت معاج لين الطلق الثالث وزادت الطلوق بشكل قوي وكنت مااتحملها
وقتها امي كانت عندي بس تعبانه حيل فقرر زوجي يخليها تريح شوي وتردلي بعدين واهو يتم عندي
راحت امي من عندي الساعه 2 الفجر واهو نام وانا ماقدرت كنت ابجي والدكتوره اللي عليها مناوبه كانت
تفحصني وتقولي لي الحين االرحم 2 سم الساعه اربع ونص الفجر هدت الطلوق ونمت الساعه خمس الاربع
مرتني الدكتوره المناوبه وفحصتني لقت الرحم 3 سم وقالت الدكتوره كلمتني تقول نحطلج طلق صناعي
الثالث والاخير…كلمت امي بنفس الوقت..ودخلت غسلت وقلت لزوجي بنزل واهو قال خلاص انا وراج..
نزلت وشغلو التخطيط والنبض للبيبي وقالت لي الدكتوره ماشاءالله مايحتاج تحميله في ولاده بشوف دكتورتج
وطلعت نادت الدكتوره لقتها عند الباب اول مادخلت الدكتوره وفحصتني ودخلت انبوب بلاستيك لونه اصفر كانت يمها الدكتوره الثانيه وخمس ممرضات..فجـأه الكل يطالع في الثاني ودكتورتي ارتبكت..

حسيت بشي حار نزل مني توقعت انها نزلت الماي..لقيت الكل معتفس سألت خير شفيه قالت لي نزيف
امج وياج قلت لا زوجي بسرعه راحت تتطمن ع نبض البيبي وقالت لازم عمليه قلت لها لا مابي ليش قالت مافي نبض وماندري شنو النزيف ردت وقالت في نبض بعدين قالت لا لا بكلم زوجج لازم عمليه كلمته وقالها
اهم شي زوجتي انا كنت مادري شنو قاعد يصير ودوني العمليات وصحيت لقيت البنوته ماتت لانهم قطعوا
الحبل السري بالغلط….,وغيـر جذي دكتور الاطفال ماوصل الا بعد ربع او ثلث ساعه يعني متأخر..
وجذي طلعت من عندهم بعمليه من غير بيبي..,
انا عارفه انه قضاء وقدر وربي كتب لي انه البنوته تموت ع ايد هالدكتوره اللي لازلت احبها واقدرها واثق فيها
الله يسامحها..الحبل السري كانت تقدر تشوفه بالسونار لانه كان ع طرف بس اهي ماانتبهت..

عشان جذي بنات انتبهوا وقت السونار ركزوا ع الحبل السري

هذي قصتي اللي لي الحين انا ماطلعت من صدمتها..ع فكره انا بعدني بالانفاس لي 13 يوم بس

ادعوا لي ان اصحى من صدمتي اللي ليما الحين ماني مصدقه هالشي..وان ربي يعوضني
باللي احسن منها..

والحمدالله على كل حال
قصتي كتبتها بس عشان افرغ اللي داخلي لاني موقادره اتكلم بهالشي
مع احد لان الكل منهار ومنصدم بالذات بعد ماشافوا البنت وقالوا لي انها كانت اجمل الموجودين

ربي يعطي وماياخذ الا بحكمه

والحمدالله على عطاياه..

حبيبة قلبي..,

الحمدالله اللي مهون علي الموضوع انه رب العالمين له حكمه كبيره يوم اخذ روح..ومثل مايقولون روح تفدا
روح..وهالبنوته مومكتوبه اني اشيلها وتكون لي..

وتسلمين بعد عمري والله على ردج اللي يهون علي

فاعلـة خيـر

أم الفهـد