ما ابي اتزوج والسبب

السلام عليكم كويتيات حبايبي .. بنات ادري ان موضوعي مو مكانه هالقسم .. بس حطيته اهني لانه اكثر قسم نشط بالمنتدى ..بنات انا عمري 19 سنه لمن كنت صغيره تعرضت لحرق انكت علي ماي حار وصار فيني حرق ع رجلي صوب الساق من ورا يعني تقريبا ساقي الي من ورا فيها بقعه كبيره اثر الحرق اهو نفس لون جلدي بس تعرفون بنات الجلد متجعد .. قبل كنت صغيره ووكان عادي عندي لكن الحين بنات انا كبرت و ع وجه زواج ف هالشي مسببلي عقده حتى افكر ان ما اتزوج والله دايما افكر جذي .وتقريبا قبل 6 شهور انخطبت ورفضت والسبه اني احاتي هالاثر ومحد عارف السبب غيري . وما اقدر البس شي قصير ما احس ان حالي حال البنات الي بعمري احس اني ناقصه .. ف ابي شوركم ونصيحكتم خواتي ..

عادي حبيبتي لا تعقدين عمرش وتحرمين نفسش من الزواج
لان اكيد نهايتها بتزوجين يعني بتزوجين باذن الله الا بس اخرتي نفسش وممكن حرمتي نفسش من فرصه حلوه جتش وضيعتيها
من ناحيه الحرق اولا مكانه مب مهم كثير
وثانيا عاد من زين اجسام الناس يا مكثر الناس الي فيهم عيوب في اجسامهم وعايشين
وحتى لو مافيهم عيب بعد الحمل تعالي شوفي انواع القبح الي يصيب جسم الام من تشققات وترهلات تسد النفس
وفي ناس فيهم حبوب فضيعه في اجسامهم و ناس فيهم اثار حساسيه لا يطاق منظرها و و و واكبر طاف عايشن ولا همهم شي
واذا مستحيه اول ايامش عادي تدلعي ولبسي دلاغات مغريه لين ما تتعودين عالجو
وحسسيه ان ولا هامش الموضوع
ولا قعدي حني مكان الحرق
المهم الي ابقوله لا تكبرين الموضوع حتى لو هو كبير .. لان ان كبرتيه كبر وان صغرتيه صغر

ليش يا حبيبتي هالتفكير كله .. اثر حرق بجزء بسيط بجسمج ولا لا سمح الله جزء كبير .. قولي الحمدلله يا حبيبتي .. عيل الي فاقدة عضو عين أو سمع شتقول ؟؟ .. أو الي فيها مرض مزمن و انا منهم انا بعد ما ياني مرض مزمن و عود ما يوني خطاب تخيلي و أثر على نفسيتي قلت اكيد المرض الي فيني محد يبيني و ياني النصيب و بلغتهم امي بللي فيني و قبلو شرو أهلي و أخلاقي و سمعتي .. بس انتي ايونج الحمدلله و ترفسين النعمه .. يا حبيبتي الي بييج بتقولوله و راح يحبج و يعزج عشانج .. الجمال مو موجود بس باللبس القصير حتى بالطويل و الجمال باخلاقج و بويهج و بشعرج و بابتسامتج و بالف شي فيج ..

مابيج تصيرين نفسي لأنه حرام تحسين بنقص و انا واثقة انه ربي منعم عليج بالف شي و شي حلو بشكلج و باخلاقج .. و انتي مثل باجي البنات ما فيج إلا كل خير .. و توج بعمر الزهووووور ♡ ربي يحفظج من كل شر

حياتي كل شي ممكن يتصلح باذن الله ، حاولي تشوفين حل طبي او كريم تجميل او غيره ولا تكبرين الموضوع وتعطينه
اكبر من حجمه ترا ما يستاهل كل هذا ، زيدي ثقتج بنفسج ولا توقفين عند هالنقطة ترا غلط

اذت انخطبتي عطوا خبر للخاطب بالحرق و فيه ازواج كثير دروا عن حرق في اجسام البنات الي خاطبينهم ومع هذا وافقوا وعاشوا حياتهم

اعرف وحدة ضهرها كامل محروق و عطوا خبر للخاطب و ماكان عندة اي مشاكل لانه يشوف مثلا جمال الوجة او الاخلاق او الطول الخ اهم من هذا الحرق

الحرق بريلج مو بيويهج اسم الله عليج !

عادي يبه ماراح يدقق واذا دقق عادي اثر حريق !

الله يتمم عليج

عادي احس مكبره الموضوع روحي لعياده زينه و شوفي كريم و لا اي شي حق الحروق القديمه

شدعوه حبيبتي عادل مافيها شي ياما بنات فيهم حروق وتزوجو بس قولي حق الخاطب انه فيج حرق وانشالله يرضى ماكو أي مشكله وترى الطب تطور سويلج 20 جلست ليزر يخف حيل مكان الحرق انشالله الله يشفيج

حبيبتي انتي مكبره الموضوع وأهوا صغير عادي حبي أكيد له علاج وترقعه لج ويرجع الجلد ولاكانه صايرلج شي اسم الله علاج انتي شوفي راجعي دكاترة ويفيدونج وبتفك عنج العقده ان شاء الله

حبيبتي كله حرق لاتعقدين الحمدلله اعرف وحده فيها برص وانخطبت وبلغت اللي خاطبها ووافق واهيا فيها برص الله يكافينا شره

والحين عندها ولدين الله يتمم عليها وسعيده

روحي عالجي عند دكتور تجميل اذا ماراح يخف شوي ان شاء الله

وحتى لو بلغتي الخاطب ان فيج حرق ومكان صغير وهون تحمدين ربج انه ماخذاج لان اللي يرد عشان هالسبب عقليته مو شي وربج فكج منه

حبيبتي لا تتعقدين
روحي مركز علاج الحروق يسوون عليج عمليه تجميل بلاش وماراح يبين

روحي سوي ترقيع للحروق
في وحده اعرفها فخذها محترق وتزوجت مرتين والثانيه ثابته ماشوفها تطلقت بسبب حرق؟؟؟
لاتحرمين نفسج من الزواج والعيال عيشي حياتج
وانا الحمدلله مو محترقه مالبس قصير قدام احد!!!! الا زوجي
لاتفكرين بالناس ابد

حباايبي والله مشكورين ع ردودكم .. يعني باذن الله تهقون القى له علاج انا ما ابيه يروح ع الاقل يخف .. والحمد لله ان مو برجولي اثنينهم بساق وحده .. مشكورين يا حبايبي ما تتصورون شكثر كلامكم ريحني

ماركة كريلون للمكياج السينمائي عندهم شي مثل كريم الاساس بس حيل ثقيل ومخصص للحروق و الجروح و هالاشياء بتلاقينه عندهم جربيه حبيبتي