كنت طالبه منكم العون وماخيبتوني تعالوا اقول لكم شصار :) .

السلام عليكم
شلونكم ؟

بنات اذا تذكرون موضوعي هذا كنت كاتبته بشهر ثمانيه

ابي اتغير بس شلون ؟ تعالوا عطوني من افكاركم ..

اولا ما ابي منكم غير الدعاء بظهر الغيب
ثانيا ذكر الله " ماشاء الله لاقوة الا بالله وتبارك الله " لأن العين حق

بسم الله

بعد ماذكرت ان زوجي تغير علي وصار موطايقني كلش وعادي عنده فراقي

بديت اطبق كل كلمه قالتها الاخت كلي دلع

مره من المرات بشهر تسعه صار موقف بيني وبينه لما كنا قاعدين بالصاله وقالي كلمه متعود يقولها وانا كنت اسكت واتحمل كل مره انا اهني ماتحملت بس لين اهني وخلاص طفح الكيل
قلتله انت قد هذي الكلمه الي قلتها ؟
قال قدها ونص واكبر منها بعد

قلتله اوكي

رحت نمت واهوا كالعاده يتحراني برجع له او بسوي له سالفه او بتنازل مثل كل مره وبتبجبج عنده ابيك وانا اسفه

ثاني يوم قمت قبله اتصلت باخوي وقلتله تعال خذني البيت
رحت البيت غلقت فوني من الثلاثا لي الجمعه كنت افتحه مرات اطلطل اشوف شنو يطرشش

طبعا انا طرشتله مسج قبل هذا كله ان الي بينا بيظل بينا وما انصحك تقول لاحد من اهلي عن الي صار علشان لاتطيح من عينهم او تهتز صورتك جدامهم بالكلام الي بقوله عنك
اهوا خاف
اهلي وايد يحبونه ويعزونه

من بعدها الريال انجلب

شفتوا شلون كنت اقول لكم بموضوعي الاول انا ماقدر اخليه دقيقه ومستحيل تمر دقيقه ما اعرف شنو يسوي فيها او منو يحاجي او او او ؟

الله الهمني واعطاني القوه خلاني ابدا ما اتجرأ او ارد عليه

ما انكر ان قلبي يضعف وابي ارد عليه لان كسر خاطري حيييل

بس في قوه فداخلي تقولي اصبري كله ولا كرامتج الي انداست 3 سنين وانا اتحمل منه الضيم والكلام الجارح الي يقطع القلب
ومع هذا كنت انا الي اعتذر وكبر راسه علي

صار متخبل يافلانه شلون صرتي جذي ؟؟
كيف قدرتي تخليني وماتكلميني ؟

يا فلانه شلون قطعتيني كيف وكيف وكيف ؟؟؟

صار مايقدر يفارقني دقيقه

صاريعرف انه وجوده بحياتي عالهامش اقدر اخليه بأي دقيقه

كنت اقوله تبي تطلق طلق حسابي معاك عند عرش الرحمن ان كنت قصرت بحقك فيوم

تبي تاخذ غيري روح خذ بحياتك مابتحصل وحده حشمتك وسوتلك قدر غيري

بنات خلاصة موضوعي

زوجي صار مايتحمل فراقي ومستحيل يخليني اروح عند اهلي وانا زعلانه لانه يعرف انه مابيقدر يرجعني بعدين الا بالقوه " صار الموقف كذا مره فعلشان جذي اتاكد اانه وحوده بحياتي مو مهم مثل قبل "

صار عارف ان اقدر اخلييه باي وقت وكرامتي فوق كل شي " قلتله كرامتي الي دستها اكثر من مره مستحيل ترجع اتدوسها مره ثانيه وان رجعت مابيني وبينك الا اورقه من المحكمه "

زوجي صار يحترمني اكثر واكثر ومايقدر يزعلني او يفارقني من بعد ماكان يخليني مزهريه بحيااته

صار يعرف ان عندي اشيا مهمه بحياتي ثانيه لهيت فيها عنه " وبيني وبينكم كنت اقوي عمري واشغل نفسي باشيا علشان مايي فبالي "

علاقتي بربي صارت اقوى واقوى ودايما استغفر" الاستغفار يفتح الابواب "

شي وحده جزاها الله خير بنهاية موضوعي قالتلي كلمه تمت ترن بأذني وصرت ارددها بكل سجود " اللهم اني اسالك رضاك " وانا متاكده 100% ان هذا اهوا السر بموضوعي كله . . .

المطلوب منكم يا بنات

بموضوعي الاول ذكرت اني كنت مجنونه بزوجي وكان اهوا كل حياتي

خلي زوجج ننص حياتج مو كل حياتج انشغلي عنه والهي ولاتقولين ما قدر
لا تقدرين بس تلزمج همه + استغفار + رضى رب العالمين

حسسيه انه عندج اشيا ثانيه مهمه وانه فراقه عاادي وتقدرين تفارقينه

لاكن لاتقصرين بواجباتج ولا بحقوقج علشان لاياخذها ذريعه

لاتقولين له كل اسرارج الخاصه خلي عندج جزء غير مكشوف علشان يتشوق يعرفه منج بعديين

جننيه لا اتمين تسألين عنه وتحسسينه انه اهوا مهم عندج لاتدقين لما يطلع ولا تتخبلين مثل ما كنت اسوي
خلج غامضه

لاتلزقين فيييه ولا تتدخلين بشي لو شنو ماكان وخلي فضولج لبعدين راح ينفعج

والحمدلله الذي رزقني هذي القوه من بعد ماكنت ما اقدر افارقه
صار جزء من حياتي مو كلها
وهذا الي خلاه متخبل علي ومايقدر يفارقني " ماشاء الله تبارك الله "

في وايد اشيا انا ماذكرتها بالموضوع ولكن مع التطبيق راح تفهمين كل شي
انا حياتي فيها وايد اشيا مابقدر اذكرها فالموضوع ووايد اشيا ما ذكرتها

لكن عطيتكم المختصر المفييد

وانا والله ماحطيت هذا الموضوع وذكرت تجربتي الا اني اعرف ان وايد بنات عانوا ويعانون مثلي

بنات اذكروا الله ترا العين حق
وادعوا ان الله يحفظه لي ويحفظلي عايلتي واهل بيتي ويطول بعمر ابوي وامي ويوفقني بدراستي ويرزقني الذرييه الصالحه

وصلوا عالنبي
اللهم صل وسلم على محمد وعلى اله وصحبه وسلم

مشالله تبارك الله .. حلو التغير الي سويتيه و يا رب البنات يستفيدون من قصتج .. و عسى ربي يسخر لج زوجج دوم و يحفظه لج و يحفظ لج اهلج و يطول باعمارهم و يوفقج بدراستج و يرزقج الذريه الصالحه ياااااا رب ♡

حلو مشاءالله

بعض الرياجيل لا شاف المرا محتاجة له يتفرعن عليها بسسس لما يشوف العكس وانها بدونه بتعيش حياتها ولا راح يغير شي يخاف هو يفقدها ويتسنع

تعلمو يا خواتي بسس في رياجيل ما يمشي معاهم جذي يكون عصبي ويعفس الدنيا

الله يتمم عليكم و يبارلك لكم و يرزقكم الذرية الصالحة

الله يهنيج ويسعدج

الناس انواع فيه اللي تتغلا من تشوف شخص ميت عليها ،، وفيه اللي تقدر هالشي وتحافظ ع الشخص

مشالله عليج الحمدالله وايد تغيير حلوو الله يهنيج حبوبه ويتمم عليج حياتج السعيده وعسى ابتسامتج ماتفارقج وراحتج ما تنقص بيوم

ما شاءالله

الله يتمم و لا يغير عليكم يا رب

انا مع ريوف فعلا

والله بصراحه زين سويتي فيه لانج كبرتيه و عطيتيه اكبر من حجمه و بجذي يصير عادي عنده لو يطنشج او يجرحج اشكره

بس ي بنات الا الكرامه دلعي نفسج و عزيها لا تحسسينه انه مهم بحياتج
استانسوا طلعوا من غيره و اذا ما قعد تعشى او تغدا عندج مو شرط ما تطبخين لااا اطبخي لنفسج و دلعي نفسج و ربج اولا واخيرا لا تقصرين بعبادته
خليه الاول و الاخير بحياتج

و الدعاء ان الله يجعلهم قره عين لنا و يجلعنا قره عين لهم

ماشاءالله تبارك الرحمن

ترا كل هذا من الله عطاج القوه

وزوجج رده فعله نصدم اهوه من قبل يحبج بس كان مستغل حبج الحين تغير سبحان الله جذي دنيا ماشيه تبينبله انج بتموتين بدونه يكشت ويطنش تثقلين يلزق وهالشي موبس بالريال حتى المرا تسوي جذي

ما شاء الله تبارك الرحمن
الله يتمم عليكم و يوفقك بدراستك و يحفظ لك و لنا والدينا يا أرحم الراحمين

ما شاء الله تبارك الله
الله يسخركم لبعض ويهنيكم
والشكر موصول لـ كلي دلع

ماشالله

الله يخليكم لبعض ويتمم عليكم يا رب

الى حد ما نفس سالفتي قبل

كانت بينا مشكله وكنت ذابحـه عمرري عشان نوصل لحل وهو مطنش ليين ماوصلت حدي صج !!

طنشت انا ولهيت بحياتي والله العظييم صار اهو يركض ورااي وانا مطنشته ويتآسف لدرجه يقول خلاص الغلط مني

شوفو شلون بنات اذا خليتو ريايلكم كل حياتكم راح تتعبون وتتعبون اكثر اذا بينتو لهم هالشي ماراح يسون لكم اهميه او قيمه

اما اذا خليتهم جزء بسيط واصغر من الذره راح تنقلب الموازين

الله يوفقج ويهنيج ويوفقج بدراستج ويرزقكم الذريه الصالحه يارب

ماشاءالله اللهم لا حسد
عسى دايم مرتاحة ولا تنذلين لـــــ أي شخص غير رب العباد بس
تجربتج حيل مفيده ان شاءالله الخوات يستفيدون