خالتي خالتي خالتي مشكلتي الكبيرة .ساعدوني

احتاااج نصيحه او مشورة من احد تكفووووون …..حالتي ماساه اليوم والنفسيه كلش موشي
لان ريلي يبي ان نسكت في مكان واحد مع خالتي والله يهداها خالتي من النوع الاناني وتبي تفرض رايها بالغصب علي وعلى ولدي والمشكله انا ريلي وحيدها ومابي اني افصله عنها ولا اسبب مشاكل بس انا كنت ساكنه عندها فتره والله العظيم كل يوم مششاكل وتغار مني وانا ماقدر الومها هذا ضناها ووحديها ولا ابي اسوي مشاكل معاها كلش فقلت لريلي نطلع مكان بنفس المنطقه بس خل نفتك من المشاكل والحمدالله الحين حسيت بحياتي واني متزوجه والحين انا ولدت ومناشبتني على ولدي يالله تعبانه منها شي موطبيعي لانها مره عوده وحياتها فاضيه ماتسوي شي كلش فماعندها الا انا وولدها وولدي

ياربي انا من النوع مااحب اقول كل شي حق الناس وخالتي بس تعرف اني سويت اي شي ترووووح تنشره بكل مكان شنو اسوي شلون اتعامل معاها ماااادري

والحين ريلي لقا بيت وانا قلتله الله يخليك خل يكون شقه فوق شوي فيها خصوصيه ومعزوله لانه ماينفع تتدخل بلبسي وشنو اغسل بالغساله وبالخدامه وتربية ولدي والغرفه اذا نظيفه ولا لا والطباخ وشنو اسوي بالمطبخ وشلون وطريقه تعاملي مع الخدامه وشنو اسوي مع اهلي ومتى اكلمهم وكل شي كل شي كل شي لدرجه تتدخل اذا ريلي اييني ولا لا !!!

ياربي تعبت من شخصيتها والله ريلي مايتعامل معاها الا بالطناش ويطلع طيب هم هالاسلوب عيب ولا ارضى يسوي جذي فيها ومابي اعاملها موزين لان عندي ياهل مابي هالشي ينعكس علي
والله انا كافيه خيرري شري ماني من النوع الي اسوي مشاكل احاول اتجبنها واجاملها ومااحتك معاها باي شي شخصي بس المشكله تفرض نفسها بشكل انا انحرج ولا اعرف اردها او اتفاداها
والله تبعت واغلب مشاكلي معها لاني احاتي اذا دقت علي شنو اسالتها وشلون ارد عليها لانها منالنوع الي تغار وتقارن اذا قلتلها طالعه ولا العب ولدي بالالعاب ولا اي شي اسويه فكله اقولها في البيت قاعدين او نايميين

والله قمت اجذب يماااااا استغفرالله الله يسامحني بس شسوي ياناس تعبت احس اني بايقه مومتزوجه وريلي ترا مقام يطلع معاي لان اذا درت طالعين ادق تول انا تعبانه ودني الدكتور او مرني او لاتتاخرون ردوا مبجر

احتاج افضفض مع احد والله تعبت وريلي تعب اكثر مني والحين المشكله البيت وانا نسكن مع بعض يعني راح يصير سجن وجحيم بالنسبة لي

الله يعينج في خالات يكون من النوع المسالم اهم شي يكون عندها شوفت ولدها مرتاح ومايشتكي من شي

وفي خالات الله يهداهم من كثر محبتهم حق عيالهم يظلمونهم من محبتهم الزايده (اتقول انا اللي كبرت وربيت واتيي وحده وتاخذه مني)

طبعا في خلات يشوفونها صعبه وااايد عليها انج اتخليج بحالج

الحل الانسب انه ولدها اهو اللي يكلمها بطريقته الخاصه يفهمها انه انتي ام ولج كلمتج في بيتج وتصرفاتج اللي ماتتعدى الاحترام

لانه الكلام ماراح يكون مقبول اذا انتي وصلتيه لها وبعدها ماتدرين شنو راح يصير

الله يهدي الجميع ويوفقج في حياتج

سوري البدليات وااااايد بس كنت متحمسه اني اشارك في موضوعج

امين يارب الله يسمع منج…. صاجه والله اهي بالعكس زينه بالتعامل بس كلامها يجرح وتتدخل بكل شي والمصيبه انا ادري ان اهي تفكر نفس ماقلتي انا ربيت وتيي وحده تاخذه مني وهذي مشكله الله يعيني ويصبرني عليها

لا عادي حبيبتي انا فهمت عليج ولا لاحظت البدليات اساسا

طيب هي ما عندها اهل تزورهم خوات اخوان جارت تنشغل فيهم

اختي
دامه وحيدها
وانتي تحبين زوجج وتبينه
ماراح تتغير اغلبهم يصير فيهم حب التملك
نصيحة
الدعاء
ثم الدعاء ثم الدعااااء
ادعي ربي يسخرها لج
محد قادر على كل شي غير الله
ادعي وانتي متيقنة من الاجابة
هالحالة اللي هي فيها تعتبر عقدة بعلم النفس
تحتاج منك خلق ابن ثاني لها حتى تتغير شخصيتها
خليها تدخل طنشي
اهم شي زوجك مومتاثر بتحكمها ولاتغير عليج
وارجع واقولج ادعي ربج يهديها
الدعاء يغير القدر والمكتوب
وعسى ربي يهدي بالج

ي حياتي و الله .. انتي مبين عليج حليوه و على نياتج … لكن اذا دقت عليج قوليلها خالتي انا طالعه مكان قريب و برد .. او خلي زوجج يرد عليها او لا تردين ع تلفون بالاساس قوليلها حاطته صامت ناسيته بالبيت تهربي منها و او خلي هم زوجج يحاجيها يقولها يمه شفيج عسى ماشر البنت مضايقتج بشي عشان تعاملينها المعامله هذي انا مالومج تبين تكون حياتج فيها خصوصيه اكثر .. طبع خالتج مزعج لكن تحملي و تصبري و اجرج عند ربج ان شاء الله ..

حبيبتي والله انتي الطيب كله….. والله ادعي دايما الله يعطيني الصبر وقوه التحمل وطولت البال ومرات اطنش مارد اولها ماسمعته او صامت وانا والله ماحب جذي وااي اتضايق طول اليوم واخلي ريلي مرات يتحجج باي شي والله يعيني بس صج صارلي سنتين تتضايقين انج موعايشه حياتج براحه شوي الا اهي متدخله في كل شي

]

عندها الاهل بنفس المنطقه المصيبه تروحلهم واهم كلهم حريم كبااااار وادق علي تعالي يمااااااا اروح شسوي وياكم وانتوا حريم كبار وولدي صبي يبي يلعب ويتحرك موينحكر في بيت ويمعه حريم وانا مره صغيره ماني كبيره بالعمر الي اقعد اسمع حزاويكم…..نوعها اذا اروح مكان لازم جنتي وياي ومااخطي خطوة الا بامرها وشورها ….لا ماحب جذي ماني ياهل

امين يارب والله مالي الا الدعاء والله يصبرني …. انا عارفه هذا نوع من الحاله وانا عاذؤتها عشان جذي احاول اتفاداها عشان لاتصير مشاكل ولا تحس اني متضايقه او يصير او كلام بيننا ماحب مهما كان اهي مره عوده وعيب والله العظيم اخليها تتكلم وتتدخل بيني وبين ريلي عادي بس انا جربتها مع ولدي شنو كانت تخربه وكان كله اعصاب ويصارخ ويقط الاغراض ويكسر عندها هذي طريقه تربيه ياهل انا تضايقت وقمت اتحجج ماادوي ولدي عندها الا انا معاه باجي الايام اقولها حضانه عشان لاتقول ييبيه والله خربت طبايع ولدي

مايخالف تحملي و احتسبي الاجر امرج لله وحمدي ربج ريلج عارف وضعج و ما يناجرج في رياييل لو شتسوين اهلي الصح وانتي الغلط
خالتج مرة عوده و مو دايمة لج عامليها بما يرضي الله عشان الله يرزقج زوجة لولدج زينه تسويلج نفس ما سويتيلها

حبيبتي قولي الحمداللهفي خالات قشرات و تسعي لطلاق و تتبلي على الچنه و تسب و تغلط

إنتـي خالتج مسالمة قولي الحمدالله بس تعاني من فراغ يا أنچ تتقبلينها عنصر رابع معاكم
يا تحطين ولدج عندها يشغلها ههههههههههه توديه و تيبيه الحضانة الجمعية اي شي

و لازم تعطينها وقت … عزمي خواتها … خليهم يوم بالاسبوع اليمعة عندها …
انتي و ريلج تعشوا معاها … بعد لازم تباشرينها حرام ترى كلنا بنمر ها لمرحلة

و اذا هي تنشر الكلام تحرصي منها و حرصي خدامتج أنها ما تودي و لا تييب الكلام

الصبر زين مهما كان وحيدها والله يكتب لك الاجر

انا برأيي وسوري عاللفظ انج تكسرين عينها مثلآ مروها انتي وريلج وحسسيها انه ولدها اييلها وانج مو ماخذته منها بالعكس انتي وياه بمزاجج رحتو لها مثلآ روحيلها وانتي يايبه هديه او شي حببيها فيج وخليها بدال لا تفكر انج ماخذه ولدها منها
انها تقول والله ولدي بين ايد امينه وطول ماهو مع مرته انا مرتاحه هي يمكن معذوره لانه وحيدها بس بعد انتي ما ييتي من بيت اهلج عشان تتحاسبين على كل شي ونفس الشي كلمي ريلج وفهميه ان هالشي يضايقج وبنفس الوقت انج حاسه فيها عشان لا يقول انج كارهه امه وتبين تبعدينه عنها..
ومهما قالت قولي اي ان شاءالله مايصير خاطرج الا طيب وسوي الي تبينه او مثلآ تدخلت بطريقتج بالاكل ولا اي شي وقالتلج سوي جذي قوليلها اي صح خالتي حلوه طريقتج بجربها ان شاءالله

وان شاءالله الله يحنن قلبها عليج
ويريح بالج