|
|
السلام عليكم ورحمة الله و بركاته
رجاء حار من المشرفات ما ينقلون الموضوع لأنه وايد مهم و بالقسم هذا خاصة للمتزوجات وحتى المومتزوجات
اشلونكم كويتيات
انا بطبعي أحب ابحث عن حلول المشاكل اللي تصادفني من المتخصصين
ومن ضمن هذي المشاكل اهي سمرة المنطقة الحساسة و منطقة الإبط ..
طبعا بحثت بسايتات طبية أجنبية و أمريكية بحكم انهم متقدمين بالطب أكثر منا و عندهم خبرات أكثر لقيت عندهم الحل
وانصدمت صدمة لما عرفت سبب السواد لهذي المناطق .. لكن إذا عرف السبب بطل العجب
و حبيت إني افيدكم مثل ما استفدت ومابي منكم غير الدعاء لي بالتوفيج والدعاءلأخوي بالشفاء العاجل (فيه المرض الخبيث) و تتيسر له أموره ويحنن قلب دكاترته الجاسين
واللي تبي تنقل الموضوع خليها تنقله لكن لا تنسي تنقل طلبي للدعاء لي ولأخوي .gif "Eh S(2)")
———————————
أولا الحلو بالموضوع هو تعريف الخبراء للسمار في هذي الأماكن واللي أطلقوا عليها أسم ( التشوك الأسود Acanthosis nigricans)
وهو عبارة عن إضطراب في الجلد ينتج عنه جلد يميل لونه من البني الفاتح إلى الأسود و تظهر في عدة أماكن في الجسم اللي هي:
*في طيات الجسم (أدري بتطقوني على الصور لأنها تلوع الجبد 
)
*والرقبه
*والإبط
*والمنطقة الحساسة
*وأخيرا تحت الثدي
ثانيا مسببات التشوك الأسود Acanthosis nigricans :
التشوك الأسود يصيب أيضا الأصحاء من الناس او انه يظهر بسبب حاله مرضية, و بعض الأحيان يكون موجود منذ الولادة, وهذا التصبغ يظهرعلى
* ذوي البشرة اللي تميل للسمرة بصورة أكثر
*وايضا تظهر أكثر على الناس اللي عندهم مستوى عالي من الإنسولين في الدم مثل مرضى السكري
*والأشخاص اللي يعانون من السمنة
وأيضا في أسباب ثانية اللي تؤدي الي هذي التصبغات منها:
*مرض أديسون Addison’s disease وهي حالة تؤدي إلى نقص هرمون الغدة الكظرية
*العلاج بهرمونات النمو
*خمول الغدة الدرقية Hypothyroidism
*حبوب منع الحمل Oral contraceptives
*بعض أدوية الكوليسترول اللي تحتوي على حامض النيكونين Nicotinic acid
*معظم الناس اللي عندهم نسبة عالية من مستوى الإنسولين و هالشي بسبب
1- أكل الكثير من الأطعمة الخاطئة و خصوصا النشويات و السكريات (عاد احنا بالأكل ما نقصر بروحنا من الكاكاوات
والعيوش والمعكرونه و المعجنات)
2- وكون الشخص زائد الوزن يرفع نسبة الإنسولين بالدم
ثالثا: كيفية العلاج من التشووك الأسود
*أكثر العلاجات فعاليه هي التخلص من الوزن الزائد و ممارسة الرياضة
*أكل الأطعمة الصحية علشان تنخفض نسبة الإنسولين بالدم كل ما صار الأكل صحي أكثر
*العلاج بالكريمات (المعلومة هذي انا بققت عيوني عليها زين و قريتها عدل )
1- استخدام كريم ريتن أى Retin-A لعلاج السواد في الأماكن اللي ذكرناها (طبعا انا سويت بحث على هالكريم طلع في منه انواع يختلف في قوامه في منه الجل و في الكريم و يختلف في نسبة التركيز على حسب نوع الجلد بس وايد مدحوه ومدة استخدامة علشان تشوفون نتيجته الفعاله هي سبع أسابيع)
2- أستخدام الكريمات اللي تحتوي على نسبة يوريا Urea (وايضا سويت بحث عليه لقيت في منه كريم ايوسيرين هذا موجود في بعض الصيدليات وبحثت وايد عن كريمات تحتوي على اليوريا بس ما طلعت بنتيجة حلوه لأن اغلب الكريمات موجوده بره ويا ليت اللي تعرف كريم فيه هذي المادة و متوفر عندنا تقول لنا)
وهذا كريم ايوسيرين
3- كريم يحتوي على حمض الألفا هيدروكسي Alpha hydroxy acid
4- كريم يحتوي على حمض الساليساليك Salicylic acid
5- العلاج بالليزر
*** ملاحظة حلوه قالتها وحدة في الموقع انها سألت الدكتور انها تستخدم الليمون لهذي الأماكن تقول الدكتور ما نصحها باستخدام الليمون لأنه تفتيحة يروح بسرعه و فوق هذا يحرق الجلد
واتمنى موضوعي ينال أعجابكم و ترى وايد لخصته و اختصرته ورتبته لعيونكم
الرتن اي يعتبر مقشر للبشرة وسبق واستخدمته لـ علاج حبوب الشباب ،
يمكن الغايه من استخدامه هو انه يزيل طبقة الجلد الميت السوداء ،، لكــن لازم نستخدم معه كريم مرطب
اما ما ذكرتي عن الليمون .. فعــلا سمعت انه يحرق الجلد خاصه اذا تونا شايلين بالحلاوة او متروشين عدل
مشكوره وماقصرتي
تسلمــــين ياقلبي …
اللهم اشفى اخوج شفاء لايغادر سقما
شفاء عاجلا لا اجلا برحمتك يا ارحم الراحمين
اسال الله العظيم رب العرش العظيم ان يشفبك اخوك
ويرزقك كل خير
ومشكوره ع المعلومات القيمه
خوش مووضووع والصور شوي يعني مادري :/
بس انا اخاف حيل من الكريمات والسوالف هذي
اعتقد النظافة المستمرة والملابس القطنية تخفف من الاسمرار
وطبعا الجو مايقصر يسلخنا سلخ
عاجلا غير اجل ياارحم الراحمبين
والله يشافي أخوج
تهقين هالكريمات اذا استخدمتهم تجيب فايده؟؟
لاني بصراحه اعاني من هالشي واحاول ا دور حل لهاا قبل لا اتزوج
ومشكوره عالمعلومات