الزوجة الذكية ؟

شلوونكم ؟

بنات دايما نسمع بالزوجة الذكية .. و ان دايما الزوجة الذكية اهيا اللي مرتاحه مع ريلها و فاهمته .. و اهيا اللي حياتها الزوجية سعيده و ماشية ..

سؤالي اهوا

1. هل تعتقدين انج زوجه ذكية ؟

2. شنو الاشياء اللي تسوينها اللي تحسبين نفسج زوجه ذكية

بالنسبة لي الزوجه الذكية اهيا اول شي اللي تحط ربها جدام اي شي تسوي مع زوجها و بدونه .. و يكون ايمانها بالله قوي بكل شي ..

ايضا الزوجة الذكية اهيا تكون 3 في 1 مثل ما يقولون .. ام و زوجة و عشيقة .. و كل واحد له وقته .. الام ان تعطيه حنانها وقت اللي يحتاجه .. و تكون زوجة و شريكه حياته و تساعده باتخاذ قراراته و تحافظ عليه و تصونه و تربي عياله .. و العشيقة في الفراش و سوالف الحب ..

الزوجة الذكية اللي ما تسمح حق زوجها يهينها و ينزل من مستواها و هالشي لازم يكون من اول الزواج و لا خلاص ماكو فايده .. لازم تبين له ان الزوجة شريكته مو خادمته و خادمة عياله .. لا اهيا شريكه و متساويين في اغلب الاشياء

الزوجة الذكية اللي تدري و تثق ان اهيا و زوجها ما راح يكونون متفقين على نفس الشي دايما .. و مع هذا تدري ان هالشي عادي و ما راح يسبب مشاكل ..

الزوجة الذكية هي اللي تسعى وراء زوجها عشان تكسبه لو كانت تحس انهم متباعدين شوي .. مو تقعد تبجي و تحن و تشتكي .. لا تسعى ورا الشي اللي تبيه

الزوجة الذكية اللي تعرف شنو هوايات و الاشياء اللي يحبها ريلها .. و تحاول تبدي اهتمامها فيهم و تشاركه اهتماماته حتى لو ما كانت تحبهم ( مثل سوالف الكرة و البلاي ستيشن اللي معورين راسنا بالمنتدى هني و صايرين لنا شراايج هههه )

الزوجة الذكية اهيا اللي تدري ان اهيا و زوجها شخصين مختلفين عن بعض .. يعني مهما كان الحب لازم الزوجة تخلي مجال لزوجها يطلع و يروح مع ربعه و ما تتوقع ان يظل 24 ساعه مجابلها اهيا و عيالها و اخر شي تقول ما يحب يقعدبالبيت و كله ملل و روتين .. الريال يغير الروتين لما يطلع مع ربعه و صدقوني كل ريال يحتاج يوم بالاسبوع يطلع مع ربعه بعيد عن البيت و الزوجه و العيال .. و هذا مو معناة ان ما يحبها ..

الزوجة الذكية اهيا اللي تدري ان اذا اهيا ما اهتمت بنفسها اهيا غير قابلة انها تهتم باي شخص ثاني .. يعني حبي نفسج و اهتمي بنفسج قبل ما تحبين غيرج و تهتمين فيهم ..

و اكو وايد نقاط بس انا احس هذوول مهمين بحياتي .. شاركوني بنات .. شلووون تحسون ان هالزوجة ذكية ؟؟ لما شنو تسوي ؟

و اتمنى الموضوع يعجبكم