ابي رايكم بسالفتي

هلا بنات

بنات البارحة انا طلعت مع زوجي على اساس ان من زمان ما طلعنا اول شي اهو اقترح ان نقعد في مكان هادي عاد انا قلت له ان ودي اطلع مكان مفتوح وفيه ناس واتمشى شوي واخذ فكره لي رحت بزهب للعيد. المهم اهو ما قصر ووداني مجمع من غير نفس وبالسيارة يتصل على ابوه ويتهاوش معاه على سالفة بايخة<<<<<<<<مادري ليش اذا نطلع وانا معاه بالسياره يتذكر كل اتصالاته ويتذكر كل السوالف اللي تقهره ويفتحها ويعصب وينقلب الموضوع عليييييييي

المهم نزلنا المجمع وكلما اقوله ابي ادخل اشوف هالمحل ما يرضى قلت له نفقعد بكوفي شوب لان ما خاطره يتمشى هم ما رضى.

بعدين زفني على عبايتي اللي مسويتها لرمضان يقول لي تبين رقبتج وتم طول الطريق واهو يهاوش ويصرخ وماد البرطم شبر وحالته حاله والله يا بنات ما تسوى علي هالطلعة واخر شي قلت له بنزل بيتنا ونزلت وتم طول الوقت يتصل لي وانا ما ارد<<<<<<<<<<<<<<<يتصل لان حاس بتانيب الضمير وخصوصا انا ما تكلمت ولا كلمة

ونمت في بيت ابوي واليوم انا بالدوام واهو يتصل وانا من قلب مالي خلق ارد عليه امس طول الليل وانا
الناس لي طلعوا يستانسون واهو كله بهالحال.

احس اني ملييييت من حركاته اللي تدل على عدم مسئوليته ما يعرف يتحكم بكلامه ولا بتصرفاته اذا اهو معصب ليش قال لي خل نطلع واهو ما يبي وماله خلق ولا تقولون اني زودته والله اني كنت هاديه ومن يقول شي اقول انشائ الله.
قول لي نصحوني ارد عليه وانا مالي خلقه ولا اسكت عنه عشان يعرف الغلط اللي ارتكبه.

ومشكورررررين

وي حبيبتي والله ترى في رياييل من هالنوع انا اخوي جذي كله يعصب …اول شي حراام ردي عليه ولا تطنشينه وبكل نعومه وهدووءء ودلع قولي له انج امس تضايقتي وفتحي معااه عن اللي مضايقج وقوليله انه ليش تسوي جذي كل طلعه تخربهاا علي ؟؟؟ تفاااهمووا بالهدااوه والله احسن لج وردي بيتج ترى ما يسوى …. والله يوفقج .. وتذكري اذا ما كاان يحبج جاان ما دق عليج ولا سال عليج بعد ….
وترى انا بعد ريلي لا طلعناا السوووق واااااي يبط جبدي كله يعلق باللي اكوونلابسه فالحين تعلمت وعرفت شنوو اللي يحبه وشنووا اللي ما يحبه عشان مالي خلق الحنه بعدين

والله يا ام راشد هذه مو اول مره اكون طالعه من البيت متملله ومختنقه وهو يزود علييي بحركاته اللي مال امها داعي

وادري لا رديت على مكالماته ما راح يتاسف ولا يبين ان اهو غلطان حتى نقاش وتفاهم صرت ما احب اتناقش ولا اتفاهم معاه لان راح يكابر

(

ياقلبي مايسوى تطنشينه

عادي الأمر

ما صار قدامج الرجال خرب مزاجه من اتصال أبوه

حبوبتي فكيها عاد

دامج كنتي ساكتة وهادية جان كملتي معروفج ونمتي في بيتج …. ليش تنامين عند اهلج

واااااي بصراحة لاتزعلين بس انا مافي شي يبط جبدي كثر اللي تزعل من زوجها وتنام عند اهلها … احس ماله دااااااااااعي كلش .. مكانج في بيتج ونومتج في بيتج وبس .. وعشان يتعود عليج

وصدقيني هالحركة تعوده على الجفا .. لازم تخلون رياييلكم يتعودون علي وجودكم بالبيت ..

وبعدين دامه عصبي جذي خلص قوليله ماني طالبة منك ولا طلعة . . قوليله انا زوجتك ومن حقي تحترمني وهذي ابسط الحقوق … وعادي ردي عليه اذا دق .. كثر الحقران يزهق الريال ترا
خليج لينة اذا راظاج بنفس الوقت بينيله انج زعلانة منه وانشالله تنحل الامور

والله يعينج و يسخره لج

تعوذي من ابليس وردي على ريلج السالفه ماتسوا
وكافي قاعد يدق عليج
ترى الكل جذي حزات الرياييل يكرهون روحه السوق ويمدون بوزهم ويطنقرون
ويمكن كان متضايق من شي او نفسيته تعبانه
ردي عالريال وكلميه وقوليله انه هالشي يضايقج ولا تكبرين السالفه

الغلط الي سويتيه ان نمتي بيت اهلج
مايصير كل دقيقه تزعلون وتروحين بيت اهاليكم هذا مو سبب مقنع ان هو غلطان

دقي عليه وتفاهموا مع بعض قوليله الي بقلبج

ردي علييه الله يهدييج كبرتي الموضوع
خل يعصب خل يصاارخ شينوو يعني
بالعكس المفروووض تهديينه وتبينييله دام انا معااك مو في شي يسووه
واذا عصب سكتي عنه خل يعصب كثر ما يبي بعديين بيحس بغلطه وبيعتذر برووحه

شوفي انا كنت كل ما اطلع مع زوجي اتهاوش معاه مادري ليش
بعدين قب ما اطلع اقولا شوف قط شيطانك اهني وينانوتك والشر والمشاكل وخنطلع واحنا مستانسين اي انتقاد
اي مشكلا لمن انرد البيت نتناقش فيها
والحين وايد احسن من قبل

ريلج يبط الجبد

مااحب الرياييل اللي يقلبون الطلعة على المرة ويزهقونها

اشدعوة مااستاهل اطلعني وتونسني ؟؟

شوفي حبيبتي كونج كنتي هادية ونزلتي بيت اهلج باسكات هذي حلوة

مااحب المرة اللي تتهاوش وتصارخ وبعدين تقط كلام جارح وتخرب على عمرها

انا هذي طريقتي اذا عصبت سكت بس ابوز طبعا واصير نفسية

وهم انج مارديتي على مكالماته احسن خل يحس على دمه ورمة ثانية لي بغا يطلعج يمسك اعصابه ويحاول يونسج بالطلعة

بس نومتج بيت اهلج موحلوة

جان رديتي البيت وتغليتي شوي وبعدين براضيج وبيتأسف

ردي اليوم البيت وخليه يراضيج وارضي عاد واخذي منه وعد انه لاينكد عليج على كل طلعة

وهم لاتقوليله ترى ماراح اطلع معاك مرة ثانية لانهم يبونها من الله العيايرة

قالج من البدايه ودي اقعد بمكان هادي

ليش العناد الريال تعبان وده يقعد معاج بهدوء

مشاء الله عليج وديتيه مجمع لو منه جان ردينج البيت
اسمحيلي قهرتيني بلقافتج الريال يقول ودي بجذي تودينه مكان عكس الي يبيه

مشكورة على الرد الحلو جوري 2024
اخت غلا عزوزي انا قلت له اي مكان تبيه نروح له وتمينا عشر دقايق كل واحد يفكر بعدين انا قلت اللي عندي وهذا اللي صار!!!!

ررررررردي عليه
قولي له :

آخر مرة تسوي هالحركة
بتطلعني ؟ طلعني ونسني
مو تخليني اتنرفز زود لو سمحت

يعني ردي ولاتسكتين – دافعي عن روحج
علشان لايكررها

يا اخت دوللي هالمره انا لزمت الصمت لان كنت مريضه بانفلونزا ومالي على الكلام والنقاش الوايد.

وترا للحين انا ما اكلمه.

اهو قام يدق في البداية بس امس ما اتصل الا جم مره وطرشلي مسج قالي تحبين تزورين خالتي معانا؟؟؟؟ اهو وامه واخته بيروحون!!!!

رديت عليه قلت له انا بطلع مع اخواني وبس قال لي براحتج من غير نفسية والحين ما يتصل وحاقرني وانا نفس الشي

انا ما اتصلت ولا سالت لان ما اعتذر لي ولا حس ان اهو غلطان عباله الشي اللي سواه صح!!!!