كلمة شقردية لكل زوجة مخلصة

شلونكم احلى و اغلى خوات على قلبي

بنات اليوم حابة اتكلم بموضوع وياريت تفكرون فيه مثل ما انا فكرت فيه بس سبحان الله هالتفكير ياني من وحي الصدفة

اليوم زوجي كان وايد تعبان فقعت فوق راسة وهو نايم و ادلك راسه فقعدت افكر بتفكير الله لا يقول بس هذا شي لا يمكن نهرب منه

قعدت اتمقل بريلي و اقول لنفسي

((شلون حياتي بدونه))

يالله شنو هالسؤال أثر فيني ودمعت عيني لما قعدت اتذكر

كل نجرة تناجرتها وياه
كل صرخة صرختها عليه
كل جرح سببتله اياه
كل ضيقة ضايقته فيها
كل دقرة دقرته اياها

قلت ريلي صج حبيبي مايستاهل مني هذا كله وعلى شنو

ما يطلعني ؟
ما يقولي كلمة حلوة؟
ما يجاملني؟
مايعطيني الحرية بالتصرف في شكلي ؟ وهذا كان موضوعي أمس

لكن مافكرت ان ريلي ولله الحمد

مصلي
مسمي
صايم شهره
متصدق
لاهو سكير
ولاهو عربيد
ولاهو راعي شقق
ولاهو قمار
ولا هو راعي بنات
ولا عمره مد ايده علي
ولا عمره سبني مسبة جايدة
ولاعمره احتقرني

كان بلسمي لي زعلت
وكان دواي لي مرضت
والله انه يحاتيني مثل محاتاه الام لرضيعها
ليش انسى ان في مرات تطلع منه كلمة حبيبي
ليش انسى ان عزني على خواتي وحريم اخوانه بشقة عمري ماكنت احلم فيها
و اثاث كل من يتكلم عنه

ليش وليش وليش

ياريت كل وحدة اليوم تناظر عيون زوجها ابو عيالها وتشوف اذا هالصفات فيه

تصلي صلاة شكر ان ربي رزقها هالزوج الصالح وتحاول كثر ماتقدر انها تكسبه صوبها
وتتخيل وتقعد مع نفسها شلون بتصير حياتها بدونه