اتطلق ولا اتوكل على الله وسوي العرس؟

اول شي زين انج عرفتي ان غلطتج انج بينتي له انج ميتة عليه ..
تعلمي تتغلين .. في انواع من الرياييل ما يحبون المرة الحنانة ..
و المرة اللي تلاحقهم .. فإنتي احترسي تصيرين من هالنوع ..
حتى اذا ما دق عليج .. نطري .. و صدقيني بيدق اهو ..

شكلج لي الحين مو فاهمته .. و شي طبيعي المشاكل بأول الزواج ..
انتي ياية من بيئة و اهو من بيئة ثانية .. انتي لج أطباعج و اهو له أطباعه ..
و هالمشاكل اللي بالبداية تصير كلها تخليكم تعرفون بعض و تكتشفون اطباعكم ..
اهم شي .. لا تفكرين شنو قالج .. فكري " ليش "قالج هالكلام ..
حاولي تفهمينه و تعرفين وجهة نظره .. و تفهمينه وجهة نظرج بكل ذوق و بدون عصبية
و تشنج .. خليه يعرف شلون تفكرين .. و سمعيه … حللي كلامه .. حللي شخصيته ..
اكتشفي طريقة تفكيره .. شنو اللي يحبه بالمرة … و شنو اللي يكرهه ..

اقري كتاب " الرجال من المريخ و النساء من الزهرة " و دوري بالنت عن الشخصيات
الجنوبية و الشمالية وايد راح تستفيدين من هالنقطة و هالمعلومات راح تعلمج شنو
نوع شخصيتح و نوع شخصيته و شلون تتعاملين معاه ..

و مادري ليش خايفةمن الاستخارة ؟؟!!!
استخيري حبوبة و توكلي على الله " و ما خاب من استخار "

و بالتوفيق ان شاء الله

حبيبتي صلى صلاة استخارة ان اذا لج خير بهالزواج الله يسهلة و يتم بسرعة و اذا مافيه خير ربج راح يوقفه و عسى ربي يهدى سركم

بس اختى شكله الريال راكز و تكانه و حليو و شايل مسؤوليتج و كاهو بيكلم المدرس مالج لا اتدققين على تعذر و كلام حلو و خرابيط ترى اغلب الرياييل ما يهتمون بهالاشياء و عذرينى اختى بس شكلج ام دميعه على ابسط شيء تبجين و ترى الريال ما يحب النكد و اللى كل ساعة تتبجبج و كثر ما يشوف دموعج يتعود عليها و ما اتأثر فيه مع الايام يعنى خلى دمعتج عزيزه علشان تكون عزيزه عليه بعد و تاثر فيه

استهدى بالله و ان شاء الله ربي يسخره لج و يسخرج له و يهدى سركم

ممكن تكونين انتي انسانه حساسه وتحسبين على كل كلمه يقولها
الرياييل انواع مثل الحريم ناس تقط الحجي ما تثمنه ولا تحس فيه وناس تحسب احسابها بكل كلمه تقولها
وصفه ثانيه بالرياييل ما يحبون كثرة الدموع ويسمونها دموع التماسيح
فمن كثر ما تبجين قام يحس ان دموعج هذي رخيصه ومالها قيمه
لانج قمتي تبجين على كل شي
الريال لما ايي وقت نومه ما يحب احد يصدعه وانتي الله يهداج في هالوقت تيين تبين تشكين
لازم تعرفين ان الريال غير المره
المره تحب تسمع وتواسي رفيجتها في هالوقت لكن الريال يبي يرتاح بهالحزه ويحس ان هالشي تفاهه
وبالاخير كل اثنين لازم يواجهون مشاكل باول حياتهم وكل الطرفين لازم يتحمل
لانه اختبار قصير اذا انجحو فيه استموا واذا ما انجحو فشلوا
حمدي ربج ان ريلج ما يقعديذلج وما يحب تتكلمون باللي صار لان هالشي راح يزيد تعقيد المسأله
وبالاخير لازم تفهمين اهوا شنو وشلون شخصيته
انتي الحين متوتره وخايفه
لو انج استخرتي لرتحتي لان ما خاب من استخار
والافضل انج بدل لا تقعدين تتعبين قلبج بالتفكير والبجي
انج تتوجهين حق ربج وتصلين لج جم ركعه بالليل تدعين فيها ربج انه يسخره لج ويحبحه فيج
كلنا عانينا ببداية زواجنا ولا تنسين ان الصبر باب الفرج
اذا ما تحملتي زوجج الحين ما راح تتحملين اي انسان ثاني بحياتج
وبالاخير الطلاق مو سهل
سواء كنتي امملجه والا ام والا عروس
ولا تكثرين من ذكره ترى الشيطان يسهله ويحليه لج
واكثر شي يسعد الشيطان انه يفرق بين المره وزوجها
وكثري من الاستغفار وذكر الله
ولا تربطين تصرفات زوجج بالابراج لانها خرابيط وبالاخص حرااام ما ايي منها ولا شي خير وكلها توقعات واوهام من الناس

حبيبتي والله فديتج

بس نصيحه لا اتطلقين .. وانتي صلي صلاة استخاره وشوفي

ومثل ماقالو البنات .. الريال مايهمه شي, ترا هذي فطره بالرياييل
نفس احنا الحريم شلون عندنا فطره انه نشك ونغار بسرعه وبسرعه نزعل

الريال نفس الياهل ترا ولا بعد اخس منه والله .. شوفي الياهل لمن ينام
تعالي قوليله انتا سويت وسويت .. شوفي شيقولج
بيقعد يصارخ و وخري عني وجذي
الريال همن جذي .. وقت نومه يبي الي تريحه الي تقوله
اوكي تامر امر روح نام
يبي الي تريحه مو الي تحن وتون فوق راسه
نصيحه ارعيه قد ماتقدرين
يعني لمن يقول بنام قولي اوكي باي
وجربيها بس ثلاث مرات ولا اربع
و وراها خيقولج بنام وقوليله انا مشتاقتلك
صدقيني بيقعد ويكلمج
بس طبعا مو تسوينها يوميا

وشي ثاني .. ترا فطرة الريال انه مايحب الحنه
والشكايه .. اهوا ياخذله وحده عشان تريحه وتوخره عن المشاكل
مو عشان تحن فوق راسه وشوف وشوف
انتي لا تحنين عليه ولا تقوليله انتا سويت جذي و جذي
دايما قوليله الي يريحك على امرك
وتمي نفس ماقتلج جم يوم على هالشي
وبعدها قوليله انا ماتحمل تزفني ولا قوليله انا زعلانه وجذي
والله بيسمعج كلام حلو
بس مو كل مره تسوين جذي
وبالاخير قوليله ابي اتغلى عليك اشويه ممكن
وانتي اهني قطي نغزات يعني
واذا ضايقج لا تقولينها بوقتها
قوليها بعدها بيوم او يومين
قوليها على انه ارفيجتج ويا ريلها
قوليله مسكينه جذي وجذي سوه ريلها تكسر الخاطر
امبيه حدها كاسره خاطري
وعاد لا تييبين الموقف الي صار بينكم انتي وياه بالضبط
بس دخلي اشياء عاديه وجذي

وشغله ثانيه .. البنت حساسه زياده عن اللزوم
يعني اي كلمه تاثر فيها والريال يشوف هالشي ما ياثر
فأهني يصير سوء تفاهم

ولا تلومون الريااييل لانهم مايعرفون شلون يتعاملون مع البنات
ولا قرو ولا عاشو هالشي .. بس مع الايام والعشره بيعرفون

وانتي ثقلي عليه شوي لا ادقين وايد ولا تعاتبين
وانشغلي بشي ثاني يلهيج
وشوفيه والله اهوا الي بيدق عليج وبيكلمج
وبيقولج وينج اشتقتلج

وترا ريلج ماينعاف والله .. ماشاء الله عليه والله يسعدكم يارب
والله يكتب الي فيه الخير

بس حبيبتي لا تزعلين ومشكلتج والله مو مشكله
بس مشكله عندنا يالحريم الحساسين لول

والله يوفجكم

أنا مع خواتي ….

أول شي تفكـــريــــن فيـــــه أنه الريال … زيـــن وما ينعـــــاب …

ثـــاني …شي … انتي تحبيــــنه

وبعدين .. اي اثنين في بداية حيـــاتهم … لازم يكـــون في اختلافات … يعني انتي ستل ما تعرفين طبعه وشنو أسلوبه … وهم واهوا نفـــس الشي … وكــل واحد يبي الثاني يمشي على مثل ما اهوا يحـــب … هذا غلط .. يعني لازم تتنازلين واهوا يتنازل .. على شان يكون في اتفاق …

ومثل ما قالوا البنات … ان انتي سياستج معاه غللط .. المفرووض ما تشكيــــن وتحنيـــــن وايد شخلتي حق بعدين

( اتغشمر ) .. لاجد … يعني حتى لو كنتي متضايقه وفيج بجوووووه لا تبجيــــن قضبي عمرج … خلي دمعتج … غاليه … وصدقيني … خلي لســانج معاه دايما حلووو … حتى لو كنتي متضايقه وايد عاتبيــــه وحتى وانتي تعاتبيــنه خلي لســانج حلووو .. لان الكلمه الحلو تريح البال .. وتهدي النفس … لا تبجين وتصارخيـــن .. وتغلي … امشـــي على هالاسلوووب من اليوم وان شـــاء الله … تتغير الأحـــوال …

واهم شي …

تستخيـــريــــــن لان ربج راح يهديـــج حق الطريج اللي يكون له خير لج …

شووووفي يمه انا مابي ااكلمج مثل الاطباء النفسييين ولابعطيج حلول مثل الاخصائيين ولابقول لج شى من هالكلام
انا بوصيج وبعتبرج بنتي واعتبريني امج خالتج يدتج مرت جيرانكم المهمممممم تشوفين كلامي ولاااتطوفين اي حرف وكبري عقلج وابتسمي قبل كل شي

شوفي يمه حتي ماعين المطبخ اتراقع مافي حياه بدون مشاكل صدقيني هالمشاكل بتقربج من ريلج اكثر وتخليج تعرفين طبايعه اكثر واكثر علشان بالمستقبل تتفادين كل المسببات هذى نقطه

النقطه الثانيه ياقلبي انتي تقولين ان ريلج حنون وطيب واشزينه ويحمق ويعصب من تصرفاتج ترا الريال ماايحب المره الحنانه اللي كل شوي اتبجبج جدامه وتتعذرب باتفه الاسباب
مثل مانتي تبين يراعيج ترا اهو بعد يبي من يراعيه تلقينه مل من تصرفاتج ويقول بقلبه هذى ماخذيتها وجذي كل شوي تصيح وتزعل اشلون لما اعرس عليها
لاتخلين ريلج يفكر ينحاش منج بسبب ماله داعي يمه وانتي توج مالجه واهلج مستانسين فيج لاتخربين فرحتهم بوساوس ابليس بيخرب عليج عيشتج ياحظيييييييي

المره السنعه تدعي ليل ونهااااااار حتي لو ريلها خمار قماار واهيا تبي الستر تقووول يارب اهدي لي زوجي ورده لي ردا جميلا
الهم جملني بقلبه وبعينه واجعلني نصيبه بالدنيا والآخره
وانتي يااالعوبه تقولين يارب قوي قلبي وكرهني فيه شهالخرابيط اللي تقولينها
يومنج ماتبينه شكوووووووو وافقتي عليه وتحبينه بعد هذا اشحال لووماتحبينه يمكن جاان ماايمديه يلبسج الدبله تقوليله حظ اوفر
كبري عقلج باجر بتصيرين ام وبتربين عيالج عالعقل والثقل اشلون تربينهم وانتي طاير فيج ابليس بس ولبج تزعلين وتطنقرين
وسقطتي خير ياطير اشصاير بالدنيا يعني توج باول الطريج يمديج تعيدين الماده وتاخذينها
ترا الريااال ماافيه شى وزين وولد حلااااااال حطي عقلج براسج تعرفين خلاصج
وحركات اليهالوو والطناقير انسيها خلاااص الله عطاج مخ تشغلينه وتفكرين فيه وتحلين امورج بنفسج بدون ماتفكرين بابغض الحلال

شوفي يمه تراااا الجدر من الناااار والريال من الكلام
فهمتي شقصدي؟؟؟؟؟؟؟؟؟؟؟
يعني الجدر يطبخ ويغلي اللي فيه من الناار من الجوله
والرياال يطبخ ويغلي من الكلااااام اللي ماله معني
باجر والله ماتسوا عليج يعصب والاااااا ينترس قلبه ويقلب عليج قلبة الشر ويمسكج يتولاج طراقات يكووفنج من بيرده والسبب سوالفج

الريال يكلمج حتي لو انتي زعلانه ومتضايقه اختاري الوقت المنااسب وفتحي معاه الموضوع واي شى من تصرفاته ماتعجبج صارحيه فيها واهو نفس الشي علشان حياتكم تستمر مو اتييين قبل ماتنامين تدقين وتبجين اشتبينه يقووول لج مل بس طقت جبده قال لج باى وروحي نامي

تبون الريال كلش مااايبطل حلجه ولايقول لكم ثلث الثلاثه جم ليش يمه ماخذه ريال وبيصير عزوتج وسندج وسترج وغطااج والا ماخذته طرطور بس تبينه فاج الحلج ويضحك
ريلج نوعيته نادره بهالزمن شوفيه تقولين انه طيب ومايبخل عليج بشي ومايقصر بحقج متي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ لي شافج طيبه وسنعه
ويقلب عليج لي شافج هبله وماتعرفين مصلحة نفسج

سنعي امورج وكل شى بيدج والطلااااااق لاتفكرين فيه ولاااتستسهلينه ترا بتخسرين وااااااااايد وايد وايد صدقيني لعني ابليسسس ومن باجر دقي عليه وضحكي ابويهه وخليج حبوبه وخوش بنت ولاتكدرين خاطره وخططي لمستقبلج بكل راحة بال والامور التافهه خليها حق اليهالووووووو اللي تعديتي مرحلتهم وايد

قرقتي ماتخلص والحجي بقلبي وااايد بس ماقول غير الله يهديج ويسخر لج ريلج وتعيشين معاه في سبات ونبات وتخلفييييييين اصبيان وبنات"

ضحكي يالله اشووووووف" ايييييييييي جذي اشحلاتج يالعوبه"

لا يا وخيتي .. ديري بالللللللج كلش ولا الطلاق لأن ماكو مشكله .. ترى كل الرياييل جذي ما يحبون المره تقط عمرهم عليها صدقيني .. حتى اللي تقول ريلي يدق دق علي ويكلمني بأنصاف الليول تكون محسره فيه يعني تتغلى بالعربي الفصيح … انتي لازم تتغلين .. وترى الرياييل ماعندهم دلع إلا اب اوقات معينه .. يعني ما يحبونه بكل حزه فلا تقعدين تتبجبجين لأن اللي عندج كل البنات عندهم منه كل الرياييل صدقيني … بالعكس انتي اللي غيري هالدلع والحساسيه وخليج قويه وثقلي ولا تدقدقين خليه اهوا يدق ولاتسولفين وايد اهوا يسولف … وشوفي شلون بيتغير …. صدقيني .. وترى هذي كلش مو سالفه توصل للطلاق … حبيبي فتحي عقلج لا شكوكي ولا هو بخيل … الريال عمووووووووما ما يجااااااامل …… صدقيني وانتي بتتعودين عليه … وبيتعود على طبعج … بس مثل ما وصيتج ثقلي ولا تدقين خليه اهوا يدق يوم يومين ثلاث .. خليه ولا تسوين نفسج انج تتغلين لا بيني له انج مشغوله ولهيتي بالجامعه عرفتي … وقولي لنا شصير معااااااج ….

البنات كفوا ووفوا الله يهديكم لبعض ويسخركم يارب

أعــوذ باللــه ليش الطلااق .. الموضــوع مايستاهل ..

شوفي حبيبتي الرجال يحب يسمع كلام حلوو خصوصا بفترة الملجه مو حنه ورنه وتشكي ويمكن انتي حساسه ماتحملين شي ..

بس عادي اذا قط عليج كلمه وضايقتج اخذيها بضحك وعديها مافيهاا شي هذا زوجج لاتخلينه ينفر منج وانتوا بأول الطريج ..

وبعدين فجي عنه شوي لاتدقين ولاتسألين وشوفي شلوون يركض وراااج <<<< وربي مجربتهاا

نصيحه خليج عاقله ورزينه وخليه هو اللي يركض ورااج واي سالفه تضايقج كلمي اختج رفيجتج اي احد بس اهو لأ .. لان اهو اكيد ناطر منج كلام حلوو مو تشكي وبجي ونوح ومشااكل ..

آخر شي : نصيحه مني ومجربه اقري سورة البقره كاامله واهي بتريحج بإذن الله .. وفالج التوفيق حبوبه ..

استخيري ربج بصلاة الاستخاره

خل اقولج شي حبيبتي
مابي اقولج كل شي الا الطلاق ويطلع ريلج بعدين مو زين بس عقب ما تتزوجين وتتطلقين عقب ياهل او اثنين
لا حبيبتي
خلي براسج ان الطلاق دام انتي عالبر احسن حل اذا تحسين ان ريلج انسان قلبه اسود وموخوش ريال

اما سالفة انج بتتطلقين عشان ريلج مايقولج حجي حلو
بالله عليج وين بتلقين ريال كويتي واركز على كلمة كويتي
يقول كلام حلو؟؟
واللي يقولون كلام حلو بس أول الزواج
يعني بمعنى اصح
ان تطلقتي من هذ عشان تبين ريال يقولج كلام حلو… بتعنسييييييين
وحتى ان لقيتي ريال يقول كلام حلو بيكون هالكلام اول الزواج بس بعدين انسيه

انا ما أتكلم عن نفسي بس حبيبتي
انا اتكلم عن معظم البنات
شوفي اختي عمره ريلها ماقالها كلام حلو الا اول يومين زواج يمكن بسسس
والحين ماشالله تبارك الرحمن صارلهم خمستعش سنه متزوجين ومرتاحين مع بعض مو مخلي عليها قاصر
لأن تأقلموا عالموضوع
عمره الكلام الحلو مايبينلج نوع الريال اللي جدامج
تصرفاته اهي اللي تبينلج اهو شنو
وعلى اساس تصرفاته بتعرفين نوعيته وتحكمين عليه اذا اهو خوش ريال والا مو خوش ريال

انا ما اشوف عندج مشكله الا ان انتي حساسه زياده عن اللزوم
والتشكي والتبجبج الزايد عند ريلج خلاه يمل وما يعد لزعلتج اعتبار
لازم اتغيرين طبعج ترى جذيه انتي خليتيه ياخذ عنج فكره انج حنانه ورنانه
الريال يحب المره اللي اتدلعه وتسمعه مو اللي تزعل وتالي ترد بروحها
حتى زعلاتج انتي تراضين روحج فيهم ما حسستيه انه خاطرج عود
حبيبتي اذا زعلتي زعلي على شي جايد الله لا يقوله(خيانه- اهانه-غلطه شنيعه)
طوفي ويا الريال قد ما تقدرين علشان يحب عشرتج وما رده بيصير مثل ما انتي تبين بس عطيه وقت

تعوذي من ابليس وروحي وياه عند دكتورج ولا اتعاتبينه تقوليله كله منك لااااا
قوليله مشكور انك رحت وياي عساك دوم ذخر لي ولعيالي عقب
ونسي الريال بالحجي الحلو ابتلقينه خاتم بصبعج
بس عاد مو تصيرين لزقه ولا تصيرين كاشه منه
مسكي العصى من النص

الله يسهل امرج

حبوبه يمكن انتوا للحين مافهمتوا بعض عدل وبعدين انتي لاتعودين الريال ان ماتقدرين تستغنين عنه شوفي ساعات تعودينه انه هو لج بالدنيا كلها وساعات تبينيله انج تقدرين تعيشين بدونه يعني حيريه لا انتي ضعيفه ولا انتي قويه جدامه وبعدين مو كل ليله يدق يسولف تطيحين له بجي لو هو جذي جان انتي زهقتي في اسلوب وفي حوار وفي اقناع ومو شرط تقطين الموضوع بويهه تقدرين تنقزينه والله يعينج يارب ويوفقج

انا مع الغاليه نونو بكل كلمة