|
|
حبيت أعطيكم بعض الأفكار حق اللي زوجها مسافر أو راح يسافر أو الأخ على طول سفراته ماتخلص دراسة أو عمل أو بزنس أو غيرووووووووووو
عزيزاتي …
بصراحه وايد صارتلي مواقف بايخه مع زوجي وأنه أزهب جنطتة قبل لا يسافر ؟؟؟؟؟؟
أنا ما أعرف أسوي شي إلا لما أكتبه على ورقه
مثال أكتب شنو الأغراض اللي يحتاجها ابو العيال على ورقه كلها
بعدين ابدي أحطهم بالجنطة
الله يسلمكم سمعوا معاي هدا الموقف؟؟
طبعا كنا في أول سنه للزواج اضطر زوجي ان يسافر
فعاد آنه اهنيه بطلعله السنع اللي عندي …
وبتشيحط عنده وابين له إني خوش مره
المهم طبعا حطيتله كل أغراضه بالجنطة بعد ما بخرت ملابسه وعطرتهم ودخلتهم الجنطه
وألحين حان موعد السفرة طبعا الجنطة تسكرت وراحت قبله المطار
ودخل الريال يتسبح قبل لايروح المطار وقالي زهبيلي ملابسي ؟؟؟؟
قتله من عيوني
تدرون شصار؟؟؟؟؟؟؟؟
أنه السنعه حطيت كل ملابسه الداخلية بالجنطة والجنطة راحت المطار ؟؟؟
وما خليت له شي …..
هي هي هي هي
عاد انتو كملو شصار
فودي اعطيكم حبيباتي بعض الأفكار وان شاء الله تعجبكم وانه بعد أبي اسمع أفكاركم
في كل مرة يسافر فيها زوجي أتعب وآنه أفكر واكتب شنو الأغراض اللي يحتاجها
ففتحت الكومبيوتر وسويتلي جدول في الخانات التالية
1- الغرض: وكتبت فيه الأغراض مثل شامبو / فوطه /فنيله /مزيل عرق/ دشداشه/بنطرون/دلاغ /…إلخ
2-الخانه اللي يمها :العدد مثلا إذا كتبت في الخانه الأولى دلاغ الخانه اللي يمها أكتب عدد الدلاغات اللي راح أحطها بالجنطة
3-الخانه الثالثة نحتاجه أو لانحتاجه (ليش كتبت هالبند لأن ساعات من أغراض السفر الاحرام للعمرة وأحيانا مايحتاج دشداشة أو غترة )
4-الخانه الرابعة كتبت :تم
فالغرض اللي أحطه بالجنطة أحط عند خانة تم صح
والخانه الرابعه :للملاحظات
وحفظتها بالكومبيوتر ومن عقبها وانه مرتاحه كل مرة أسوي طباعة وأعطيها زوجي يحط علامه على الأغراض اللي يحتاجها والعدد اللي يبيه
وان شاء الله قريبا أنزلكم الجدول اللي مسويته عشان تستفيدون منه
فكرة حلوة إنج تحطين حق أبو العيال ظرف فيه رساله حلوة تعبرين فيها عن حبك له وانك راح تولهين عليه وايد …إلخ وانتو أشطر مني بالكلام
وظروري تذكرين له بالرساله دعوة حلوة منك صادقه ان الله يوفقه ويرده لكم سالم …إلخ وتذكرينه ان دعاء المسافر مستجاب فلا ينساكم من الدعاء
وتحطينه من غير لايدري بجنطته في مكان بارز عشان يشوفه
جربوها والله راح يستانس ويحس حتى وهو مسافر إن في ناس ناطرينه ويحبونه
واهو من اول ما يقراها راح يسيح (من كلامج الحلو )وراح يحس انه مشتاقلج حتى لو كان توه راكب الطيارة
وراح تحسين بالفرق وأثر الرسالة بعد أول اتصال يتصل فيه عليكم
أو حطيله هديه صغيرة عطر مثلا غلفيه وحطي الرساله معاه
أو حطيله الرساله معاها علبة كاكاو يحبه
والله حتى لو شي بسيط المهم تحسسينه إنك على البال وفي ناس يحبونك
أوكي خلصنا من جنطته والريال سافر ألحي لازم تسوين فناتق حق ردته وه>ي أفكار عالسريع واللي تبي تفصيل تسألني وأشرح لها
1- اشتري كفر جديد وحلاته يكون عنابي أو سوالفكم الحلوة
2-زيدي عدد الكوشايات اللي على السرير
3-حاولي تغيرين أماكن الأثاث إذا البيت يسمح عشان يرجع يشوف تغيير
4-فرشي تكرمون الحمام وزينيه بالاكسسوارات الجديدة
6- ضروري يكون عندج قميص نوم جديد ماشافه
7-تسنعي وتزهبي حق يوم وصوله
8- قصي شعرج أو صبغيه سنعي أضافرك + شيرة وغيره يعني غيري ستايلج عن كل مره
9-استقبليه بملابس حلوة وجذابه
10- لاتنسين تتعطرين وتتمكيجين
11- أهم شي لاتنسين عشا أو غدا يحبه
12- وشي رائع ان تستقبلينه بعد مايقعد وتسلمون عليه ويرتاح قلاس عصير طازج بارد يرد الروح تحطينه بقلاس الضيوف الكشخه وبسكم تخشش بمواعين الضيوف اللي ما يون إلا من سنه لي سنه ولا تحطيله قلاس مال كل مرة
13- لاتنسين الحلويات اللي يحبها
14- عطري البيت قبل لايوصل وبخريه
15- غرفة النوم عطريها عدل وخصوصا الكفر بالبخور والعطور السنعة
16- حطيلج ليتات لونهم أحمر رومانسي جدا
17- مثلا طرشي أحد أو السايق يودون سيارته للتنظيف وعطريها من داخل وسنعي دثرته وعفسته اللي ماتخلص بسيارته (بس ديري بالج لاتقطين شي حطي أغراضه اللي بالسيارة بكيس ولا رجع عطي يفرز اللي يبيه واللي ما يبيه يقطه ؟
18- في عطور حلوة مثل الجيلي للسيارات أحلى شي اللي لونها أحمر حطيها بسيارته
19- كتبي رساله صغيرة أو ورقه لزقيها على مكان بارز بسيارته كتبيله نورت الديرة بوجودك أو من غيرك البيت مايسوى …إلخ
20- لاتنسين عالعشا حاولي تصرفين عيالج بمكان نوميهم مبكرا عشان يحلا الجو لج انتي وياه عالعشا
حطي عالطاولة مفرش عنابي وشموع وردي وأحمر ونابكنز نفس اللون وفازه فيها ورد جوري طبيعي وتكونين طبعا مزهبه الصحون ومرتبتهم ولا أحلى من الفنادق وطفي الليتات وشبي الشموع (حده روعه )
وحطي الأكل حار من السخان إلى فمه
لقميه كم لقمه من ايدج خدميه
حاولي قد ماتقدرين تسوين العشا اللي يحبه اهوا مو اللي انتي تحبينه ؟؟؟
واللي عندها أفكار ياليت تفيدنا لأن زوجي بيرجع من السفر بعد كم يوم وودي بأفكار جديدة ماسويتها من قبل
(خواتي يمكن تقولون اشدعوا ماله داعي كل هذا 
أقولكم لازم تحسسينه بشي غير لم يرجع وان اهوا إنسان غالي عليكم وردته لكم تسوا الدنيا ومافيها بجذيه تملكين قلبه وراح يحس ان زوجته غاليه بالنسبة له ومهما كان هذا زوجك وابو عيالج )
ولو رد ولقا ماكو فرق بين روحته وردته كل شي على حطته صراحه ضيقة خلق
راح يحس انه مهمل من صوبك ومحد يهتم فيه …
وترى أي انسان يسافر يستانس لما يشوف فرحة أهله بردته حتى احنا لما نسافر نفرح بحسن استقبال الناس لنا وضيافتهم
وأيضا خلي من ردته من السفر مناسبه وفرصة لتغيير الروتين في الحياة الزوجية
أتمنى تكونون استفدتو من الموضوع وللموضوع بقيه ان شاء الله
والحمدلله على سلامة أزواجكم 
والسلام عليكم ورحمة الله وبركاته
وأحين راح اكمل لكم بعض الفكار البسيطة واللي تغير شوي من الروتين اليومي للحياة الزوجية
1- حلو تحطيلة تحت المخدة شي (هدية أو ورقه فيها غزل أو مدالية …) أو تحطيلة ورد جوري في فراشه
2- والعيال خل يلبسون ملابس طلعة عشان يستقبلونه إذا كانو راح يستقبلونه في اليبت موحلو يدخل ويلاقيهم بالبجامات
3- الأفضل استقباله في المطار إذا استطعتي أو العيال يستقبلونه عشان تتفرغين حق تجهيزات البيت
4- ممكن إذا في امكانية مادية تستقبلونه بلموزين من غير مايدري وتكونون انتو داخلها ولازم أحد يوصله للسيارة ويتفاجأ فيكم داخلها
5- حلو انك تنثرين أوراق الجوري على السرير وأرضية الغرفه مع الليتات الحمرولاتنسين الشموع (بس لايشوفونه العيال )حاولي تسوين هالشي لما تنومين العيال وأبو العيال يكون بالصاله مثلا
6- حتى تكرمون الحمام خلي اضاءته هاديه وحطي شمعه ريحتها حلوة(أنا أحب الشمعة الوردية اللي تنباع بالجمعية سعرها دينار وريحتها حلاو وقوية حلوة للحمام )
7- سويله ماي حار في البانيو مع الرغوة
8- خلي العيال يشاركونك بأفكار لاستقباله خليهم يتفخون بالونات ملونه تنثرونه في الصاله أو المدخل وكل واحد من العيال يكتب عليها عبارة حلوة حق ابوه
والله راح يصير البيت في جو مرح وهنيه انتي صديتيهم ولهيتيهم عن الحنة والرنه على راسك عشان تتفرغين لأبو العيال
9- لوكان سفر أبو العيال دراسة ماجستير أو دكتوراه أو راجع من علاج
تسون هذي الفعاليات مع ضرورة تصويره بالفيديو من بداية دخوله للمنزل
10- يمكن أيضا وضع هدية حلوة وبسيطة في سيارته
11- يمكن مفاجأته بطلعة للشاليه بعد أيام من سفره ويكون التجهيز عليج والفعاليات تسون نصها في البيت ونصها بالشاليه
هذي بعض الأفكار البسيطة وعاد أبي همتكم معاي وأبي افكاركم قبل لايرد زوجي من السفر
لأن أحس مخي قفل ماني قادرة أفكر
والسلالالالالالالالالالالالالالالالالالالالالالالا لالالالالالالالالالالالالالالالام
وانشالله البنات يستفيدون
احلى شي قلاصات الضيوف خخخخخخخخخخخخخخخخخخخخخخخ
وافكارج ماشاءالله تينن
كفيتي ووفيتي
بس عندي نصيحه صغيره
لا تعودين الريال على كل هالشغلات….لان راح يمل منها ويبي زود
والانسان بطبيعته طماع ويبي الاكثر والاحسن…
كثر ما تقللين هالسوالف يكون افضل علشان يحس انه سويتي له شي مميز ويديد
وشكرا