|
|
السلام عليكم و رحمة الله و بركاته
موضوعي هذا موجه بشكل خاص للمتزوجات اللي
بينهم و بين خالاتهم – امهات رياييلهم – مشاكل ..
و للبنات اللي على وشك الزواج .. و للجميع بشكل عام ..
و أتمنى انه مثل ماهو طالع من القلب .. يوصل لي القلب ..
" رب اشرح لي صدري و يسر لي أمري
و احلل عقدة من لساني يفقه قولي "
اتمنى تقرونه للآخر و تتفهمون وجهة نظري و تالي
تتفضلون و تتكرمون و تعلقون اذا ودكم ..
الموضوع و ما فيه ..
خالتج …
مهما كان تراها مرة عودة .. حتى لو تشوفين شكلها صغير
و حتى لو تلبس و تكشخ …
ترى الواحد كل ما كبر مخه يقفل .. و تدرون احنا لي كبرنا
و مد الله بعمرنا بنصير مثلهم و هذا حال الدنيا …
حطي روحج مكانها .. لي كبرتي تبين أحد يقدرج و يحترمج ..
ترى حزتها ما تبين من عيالج و من حريمهم شي
غير الاحترام و التقدير .. و تبينهم حولج … و اذا
احتجتيهم عندج .. فلا تنسوون .. ان كما تدين تدان ..
و ان الله يمهل و لا يهمل …
حتى لو خالتج فيها عوابة .. لبقي روحج .. و تحملي شوي ..
مثل ما تتحملين ريلج .. و اهلج مرات خلنكون صريحين ..
الدنيا مو على كيفنا و الناس مو على كيفنا بس شخص واحد
اللي تقدرين تتحكمين فيه اهو انتي …الحين حتى عيالج
بو سنة و سنتين ما تقدرين عليهم … عدل و الا لأ ؟؟
بتقولين .. ليــش اتحمل .. شالله حادني ؟؟
ارووح بيتي و مالي شغل بأحد و لا أحد شغل فيني
و ابعد عن الشر و غنيلوا وايد أبرك.. صح ؟؟
انا اقول لج ليش .. لأن هذي النظرة تعتبر قصيرة المدى ..
اذا انتي عزلتي روحج عن حمولتج معناته غالبا عزلتي
عيالج عنهم .. يعني باجر عزوتهم اعمامهم و عماتهم
اللي من لحمهم و دمهم ..بيصيرون غرب و بعاد عليهم ..!!
ما يعرف عيال عمه و لا عيال عمته و العالم كلهم يدرون
ان بينكم خلاف .. اييي ليش !
و كلكم عارفين أجر صلة الرحم ما أعتقد يخفى عليكم …
و كلكم عارفين أثرها على الناس !!
أصلا إذا ريلج شاف انج عازلة روحج عن اهله
و شاف حريم أخوانه زينين معاهم .. بيقول بنفسه ان
انتي السبب .. و يمكن يكرهج .. مثل ما انتي تبين اهلج
اهو يبي اهله بعد … و إلا آنا غلطانة ؟!
ومثل هالحالات احنا شايفينها في الواقع ..
و على فكرة .. تفكير المرة اللي تبي من تتزوج تعزل
الريال عن أهله هذا تفكير وحدة مو واثقة من روحها بتاتا ..
و صدقوني طاال الزمن أم قصر الريال راح يعرف ان هالمرة
مو سنعة و انها قطعته عن اهله – حتى إذا عطاها ويه
من أول الزواج – و صدق سوالفها و جذبها و تأليفها كل شي
راح يبين مع الوقت .. و حبل الجذب قصير ….
و على العكس .. المرة اللي تطوف .. و تاخذ و تعطي ..
راح تشوف أثر صبرها ..و تالي عمرها كل الخير اللي سوته
بيرجع لها … بالدنيا و إلا بالآخرة .. بيرجع لها و الله سبحانه
ما ينسى عبيده … و من ترك شيئا لله عوضه الله خيرا منه …
إذا لا سمح الله صارت مشكلة .. جدامج حلين .. اما انج تكبرينها
و تزيدين النار حطب و تونسين ابليس اعوذ بالله منه ..
و بيدج .. أول شي تتعوذين من الشيطان الرجيم ..
و تحلينها بهدوء .. و تفهمينهم وجهة نظرج و موقفج
بكل رقي .. ماله داعي صراخ و سوالف مو حلوة بحقج ..
و عيب .. و اللي يصرخ هذا دليل ضعف الحجة غالبا ..
و عندج الله سبحانه .. تدعينه .. ينصرج و الله سبحانه عند
حسن ظن العبد …
و هني يبرز دور الأهل .. للأسف في أمهات يشيشون بناتهم
على رياييلهم و حمولاتهم … هالأمهات غالبا فيهم عقدة
من خالاتهم امهات رياييلهم من قبل ..
و على بالهم كل الخالات جذي … فتزرع في بنتها من قبل
لا تتزوج كراهية الحمولة و الخالة أم الريل .. الله يهديهم
يعفسون حياة بناتهم و اهم ما يدرون !!!!
اللي أمها من هالنوع .. انصحها ان ما تقول حق امها
مشاكلها مع ريلها … تستشير ناس ثقة يهدونها و يوعونها
و يشيرون عليها بالخير .. و لا يخلون الأمور التافهة
أشياء مهمة حيل ..مثل اللي ريلها ما يقدر ياخذ لها جنطة
ماركة و طلبت الطلاق .. بذمتكم هذي لو عندها أهل
يعقلونها جان سوت جذي ؟!!! و لا تفكر أصلا !!
الجنة مع الوقت تصير خلااص تابعة حق حمولتها ..
مو يايبة عيال يشيلون اسمهم ؟؟ و يربطونها فيهم ؟؟
يعني المفروض تصير مثل بنتهم .. و لو في كراهية
و الا عداء راح ينقلب حب و مودة ان شاء الله مع الوقت ..
" وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا
الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ (34) "
كبروا عقولكم .. خلكم انتوا الكبار .. انتو المتحكمين
بالمواقف .. و خلوا مثل هالمشاكل تبين أصلكم و سنعكم …
و لا تنسون ان كل وحدة فيكم سفيرة لأهلها … و عايلتها …
فــ .. رفعوا راسهم ..
و هالله هالله بالابتسامة و الريج الحلو .. حسنوا النوايا ..
لأن الله يعطي كل واحد عل نيته .. اللي ما تحب تحتك وايد ..
لا تحتك وايد .. بس أهم شي لا تخلون الناس يشوفون عليكم العيبة ..
و لا تقطعون ريولكم انتي و ريلج عن بيوت حمايلكم …
و ادري فيكم ما عليكم قاصر سنع بس .. الذكرى تنفع المؤمنين …
موفقين يا رب
وانا معاج بكل كلمه قلتيها الحماه ممكن الوحده تنغث منها وتكرها لان يمكن تكون بنفس عمرج وتحب تناجرج بس الخاله على كثر ماتحبينها وتحترمينها هالشي بيرجع لج يعني من مصلحتج ..
مشــكوووووورة ويعطيج العافيه ..
وفعلا كلاامج صح والزوجه لووو تشوووف الضييم من خالتها مالاازم تشكي هالشي جداام الاوادم والريااااال ماااا يحبج الا اذا ارضيتي امه
وعسا الله يعيينه على هالشي ويهدينا ويعطيينا طوولت الباال ويهدي خالااااتنا ويسخرهم لنا <<<قولو اميييييييين بهالوقت عسا الله يتقبل منا هالدعوه
بالضبط .. مثل ما قلتي يا شوق ..
و الرياييل ترى يعرفون لا تحسبون اذا سكتوا معناته مو فاهمين شصاير ..
بس اذا صبرتي و طوفتي علشانه بيعرف ان عقلج كبير و انج متحملة علشانه ..
و اذا هو كريم أصل بيبين بعينه .. و يحطج فوق راسه ..
اهم شي اذا وزج ابليس تعوذي منه ..
الله يوفقكم و يوفقنا وياكم لكل خير ان شاء الله ..
شكرا لمروركم الرائع يا بنات
موضوع حلو
وكلامج ولا اروع من جذيه
وراح اكون متابعه وياكم
و الموضوع موضوعج حياج الله بأي وقت
مع انه خالتي الله يسخرها لي شوي متسلطه بس نسال الله ان يسترنا ويسعدنا
ويعينه على ما يرضيه
لاهنتِ
قولي امين
خووووش كلام
وعلى قولة امي
المرة يقدر ريلها يبدلها اذا بغى
بس الام ما تتبدل
الخاله ماتبي شى من الجنه الا تشوف ولدها مرتاح ومستانس واهيا سنعه بلبسها ولبس ريلها وبيتها نظيف وتحترم خالتها وعمها وحمولتها والنقصه لهم حتي لو جيس فلافل ترا يفرحهم ويكبرج بعينهم حتي لوبتروحين السوق قوليلها خالتي تبين شى ون طلبت شى خلي ولدها يدفع مووطالع شى من جيبج يمه وييبيلهياه فرحيها صدقيني بتكسبين خالتج وتبينها تحطج بعينها الثنتين حسسيها بحبج لها وشوفي اشلون ترزج وحتي بالمواجيب روحي معاها لاتتعذربين ترا الخاله تطير من الوناسه لي قالت للناس هذى جنتي مرت ولدي فلان
وموضوعوكم يهبل اشزينه عسا الله يسخر لكم خالاتكم ويهنيكم ويسعدكم دنيا وآخره يارب"
آنسة منشن :
الله يهدي بالكم يا رب و يتمم عليج بخير ..
يقولج " أحسن إلى الناس تستعبد قلوبهم .."
و استشعري الأجر و بالتوفيق حبوبة
كلاكلا ..
آميــــن و أجمعين يا رب …
صاجة الوالدة الله يطول بعمرها ..
يزاج الله كل خير على هالدعوة الحلوة
وحدة عسل ..
وياج يا رب ..
مشكورة على المرور الطيب و التعليق يا عسوولة
نورتوا موضوعي بنات
|
المشاركة الأصلية كتبت بواسطة الغاليه نونو
 خلوني ازيدكم من الشعر بيت حبايبي"
الخاله ماتبي شى من الجنه الا تشوف ولدها مرتاح ومستانس واهيا سنعه بلبسها ولبس ريلها وبيتها نظيف وتحترم خالتها وعمها وحمولتها والنقصه لهم حتي لو جيس فلافل ترا يفرحهم ويكبرج بعينهم حتي لوبتروحين السوق قوليلها خالتي تبين شى ون طلبت شى خلي ولدها يدفع مووطالع شى من جيبج يمه وييبيلهياه فرحيها صدقيني بتكسبين خالتج وتبينها تحطج بعينها الثنتين حسسيها بحبج لها وشوفي اشلون ترزج وحتي بالمواجيب روحي معاها لاتتعذربين ترا الخاله تطير من الوناسه لي قالت للناس هذى جنتي مرت ولدي فلان |
صاجة الغالية نونو .. و منكم نستفيد ..
أشياء بسيطة تقوي العلاقات بين الجنة و الخالة ..
حتى تشوفين مرات الخالة من كثر ما تحب جنتها ما ترضى عليها
اذا صار بينها و بين ولدها خلاف لأنها اعتبرتها مثل بنتها
و لأن جنتها تعاملها على هالأساس !
مرورج اللي يهبل يا الغالية نونو ..مشكوورة على الدعوة الحلوة
والله يسخر لج عيالج و جناينج ان شاء الله آمين يا رب
اهم شي ان البنت تعتبر خالتها مثل امها خو امج اكيد كانت تنزرج وتهاوشج مرات يعني تحملي مو تقعدين اتشينين النفس واتشكين عند الريل انتبهي!
واحسن شي ما ادخلين اهلج باي مشكله تواجهكم لو شنو يصير انا اصلا خالتي توقف معاي ضد ولدها مرات انتي بس كسبيها وكسبي عيالها
وتشكرات مره ثانيه حبيبتي فلانه وبارك الله فيج.