يا رئيسات الأقسام شنو اتسوون بمعلماتكم الغير متعاونات

تعاملي معاهم بالحسنى ولاتنسين انهم زميلاتج ومو معناتها انج رئيسة قسم انج ملكتيهم
ومااعتقد لو يحبونج راح يتمردون عليج
ولاتنسين انج كنتي بيوم مدرسه عاديه قبل ماتكونين رئيسة قسم فطبقي عليهم الانظمه اللي ترضينها على نفسج لو كنتي بمكانهم

اول شي سووي اجتماع لهم واعرضى العمل المطلوب منهم وخليهم يوقعون على الاجتماع وجذى ماراح يعترضوون على شي لان معاج الاثبات والله يعينج على المسئولية … موفقه

انتي اكيد مسوية اجتماع اول ما جيتي عندهم لانك جديدة ولازم تعرفين عن نفسك وتتعرفين عليهم هذا اولا

وثانيا لان بالاجتماع الاول فيه توجيهاتك ونصايحك واللي تحبين قسمك يكون عليه من صورة متعاونة ومحبة وركزي على محبة!

اكسبيهم اول خليهم يحبونك باسلوبك ومعاملتك ولا تشخطين فيهم والله اذا حبوك يسوون لك المستحيلات سالي مجررربة

ودايما كوني بصفهم مو مع الادارة ضدهم انتبهي من النقطة قسمك عايلتك نفسها تماما كل ما عطيتيهم يعطونك قلبهم

القديمات عطيهم اهميتهم وخليهم مساعدين رئيسة قسم استفيدي من خبراتهم وتقربي من الجميع وخلي القديمات يديرون اجتماعاتك الفنية وقولي بالاجتماع يشرفني وجود خبرات مثلكم استفيد منهم شخصيا وتعم الفايدة على الجميع .. عطيهم اهميتهم

والجدد عاد هذيه عجينتك الخاصة تقدرين تلعبين فيهم لعب بس باسلوب حلو ومعاملة احلا

ونصيحة لاحظت بأسلوبك شي مو حلو واسمحيلي على صراحتي

اذا بقيتي شي لا تامرين وتطلبين تراهم مو فراشات خلي اوامرك طلب بذوق ومشورة يعني

قولي الادارة طالبين من الاقسام يسوون هالشغله اشرايكم نسويها مع بعض ، يلا منو تروح معاي حبيباتي ؟

مو تامرين وتروحين !

باجتماعك لازم تبينين لهم انك اخت لهم وتدافعين عنهم وستر وغطى عليهم .. انتي شكلك ما اجتمعتي فيهم أو اجتمعتي وكان اجتماعك فاااشل

يعني اظهار شخصيتك وقوتها .. الله اعلم بس اعذريني على صراحتي اختي .. صدقيني سوي اللي قلتلك عليه وبتشوفين

انا لما كنت اول سنة رئاسة قسم كانت تحتي 25 معلمة كل وحده تقول ابشري وامري ومايمديني اطلب الا لبوه ما شاء الله

فالقسم بشطارة رئيسة القسم ولا تبينين للادارة ان في مشاكل بقسمك وانهم ما يسمعون كلامك ابدا ديريبالك

اظهري بصورة سليمة وخلي مشاكلكم بينكم وحلوها بينكم ولا تنسين! اكسبي حبهم اول شي والشغل لاحقه عليه

لان بحبهم تسوين المعجزات

تحياتي لك حبيبتي وعذرا على الاطالة

شكو تحاسبينهم ,, مو أهم شي ان الشغل خلص؟؟
ولا عشانهم قعدوا بقسم ثاني ؟

بعدين أنا ما أحب سالفة غير متعاونه ,,,يبه كل وحده بكييييفها ,,,واذا جااا وقت التقرير حطي عند بند التعاون الدرجه اللي تبينها ,,, ترى التعاون مو غصب ,,,أنا اللي أعرفه ان اللي يبي يتعااون من نفسه محد يجبره ,,, مثل أغلب رئيسات الأقساام حسبالهم معلمات القسم سيلانيات حاطينهم مطراش للناظره ودي وجيبي ولا وزعت سجلاتها عليهم وكل وحده مسؤوله عن سجل ,, واذا قالت لأ المعلمه راحت سيده عند الناظره وتقوول فلانه مو متعااونه <<<<<<< شوفوا نفسكم بالأول

عزيزتي تنبيه بسيط و كان الله غفور رحيم هذا اذا ماكان الشغل مخلص .. اما اذا خالصين شغلهم .. لا ما في اي داعي للحجي ..

و ترا احنا للحين بأول العام الدراسي .. يعني ما يمدي نحكم عليهم انهم غير متعاونات ..

و اذا طلبتي شي … تابعي الشغل عشان ما تتفاجئين و تعرفين الاخبار من المديره ..

كلام عالية الذوق جميل .. اقريه بتمعن

خواتي صاحبات بعض الردود .. هدو اعصابكم احس انكم تخيلتو صاحبة الموضوع مشرفتكم و حطيتو حرتكم فيها ..

انتي طحتي بموقف حرج ما بين الادارة ومدرساتج والله يعينج
وهذا الشغل يعتمد على اهميته: هل اهو من اختصاصات المدرسة ولا لأ؟
اعطيج مثال من واقع تجربتي: رئيسة قسمي اذا تبي شي مختص بالمنهج او تكليفي بشغل خاص في كمدرسة، اعطيها اعيوني
اما مثلا تقول لي روحي وزعي الكتب ورتبيهم مع امينة المخزن، اتأفف واحيانا انحاش من الشغل، لانه مو من اختصاصاتي
وعلى فكرة رئيسة قسمي اي شيء تطلبه مني انفذه اذا كان في مصلحة القسم والطلبة
فدايما تمدحني عند الناظرة وتتغاضى عن سلبيات عدم تعاوني في الاشياء اللي هي مو من شغلي بالاساس
الله يوفقج ان شالله

عالية الذوق فعلا عالية الذوووق ..إسم على مسمى

ما شاء الله عليج ..الله يكثر من أمثالج

وجان زين كل رئيسات الأقسام يصيرون نفسج

الله يهني قسمج فيج ..

إنتي جنج رئيسة قسمي جذي تعاملها معانا جدا جدا جدا راقي

وما شاء الله عليها الكل يحبها حتى الأقسام الثانية يحسدونا عليها ..

وتصدقين من كثر ما نحبها ما نردها بطلب تطلبه منا

حتى لو مو من إختصاصنا لأنها تستاهل المعاملة الطيبة

فعلا المحبة كنز لتعامل راقي

الأخت عاليه كفت ووفت

مع عالية الذوووووق

شنو يتمردون عليك !!!! يعني مثلا تبين تهاوشينهم !!! يدرون البنات ان في تقارير خلاص

انتي قوليلهم كلام الناظره باجتماع صغير واذكري ان المتعاونات غير الي مو متعاونات عند الناظره

كلميهم بالحسنى اول وبعدين شدي عليهم شوي

واذا ما نفع سوي اجتماع توزيع الشغل وخل يوقعون

بس حاولي تكسبينهم وقربيهم منج بكلمة حلوة وبالاقناع باهمية انجاز العمل وخاصة انه وقت فاضي مو مشغولين بتدريس ولا شي

وعموما انتي اذا ما لقيتي منهم تعاون لا تقولين حق الناظرة ترى اذا وصلت الامور لها بتتغير نظرتهم لج وما راح ترتاحين بينهم لانج دخلتي الناظرة بينكم وهالشي مو حلوووو

الله يوفقج يا رب ويهدي النفوس وتمشي اموركم بهدوء

أول شي "عالية الذوق" كفت ووفت ..

والله انا صج مو أبله ولكن الكورس اللي طاف كنت ميداني بمدرسة ..

وكنت أموووووت على رئيسة قسمي لأنها طيبه حييييييييل ..

وعبالج لأنها طيبه تمادينا عليها ..؟ لا حشى بالعكس كنا نشتغل ونبدّع بعد .. لأنها تستاهل ..

وحتى الأقسام الثانيه يقولون ياحظكم برئيسة قسمكم ..

وحتى اذا صارت ورشه والا شي هي براسها تشتغل ولا تطلب من الابلات يساعدونها مع ان الورشه مو لها ..

الله يذكر ايامها بالخير ..

وحتى كانت موجهتي هي الموجهه الأولى بالمنطقه .. والله كنت حيييييييل امدح رئيسة قسمي عند الموجهه من وراها ..

لأنها تستاهل كل خييييير ..

صيري طيبه والله هم بنفسهم بيشيلونج بعيونهم ..

وخلي الاجتماع مجرد نقل لكلام الناظره … مو تعصبين وتزفين ..

ووضحيلهم ان هذا من درجاتهم ..

ومع الايام راح يبين عندج منو اللي تشتغل ومنو اللي ماتشتغل ..

وتغاضي عن بند التعاون اذا شفتي الأبله مسويه شغلها على اكمل وجه ..

وأتمنى ترجعين لكلام عالية الذوق لأنه فعلا كلام من ذهب ..

يا حياتي مشكوووورة قلبي هذا اللي لازم نتمسك فيه وبعدين احنا كنا معلمات مثلهم

ونتمنى رئيسة قسم زينة فليش لما نترقى نتغير ونتكبر ونامر وننهي!

والله بالحب كل شي يصير .. انا سويت اسبوع ثقافي مو مني .. منهم كل وحده تبي تسوي شغله على مستوى المنطقة فخليته اسبوع … والله اعلم اني كنت اشتغل معاهم حتى وسيلة الدرس كنت اكتبها لهم بخطي والعنوان والتاريخ باللوحة
كنا اسرة وحده …

تعالي صج يمكن انا كنت رئيسة قسمك اشدراك هههههه

والله يوفق الجميع ان شاء الله

مشكورين حبيباتي اللي ايدوا رايي

يارب يوفقكم وين ماتروحون …