|
|
السلام عليكم ورحمة الله وبركاته
خواتي انا بمشكله وماني عارفه شسوي عيالي صايرين شياطين !
يراددون بشكل موطبيعي اول ماكانوا جذيه لكن هالفتره من شهرين بس اختلطوا بعيال عمتهم صاروا جذيه حتى بنتي صارت صبيك تقلد اخوانها
والادهى والامر صايرين ينقلون حجي يعني يروحون يطلعون بيت عمتهم او يدهم يردون يقولون لي كل شي عمتي قالت جذيه يدتي تقول و و و ماكانوا جذيه !!!!!!!!!!! غير طوالة اللسان سووا واجباتكم يردون علي اوووووه مانبي ؟؟ حتى زبوطة النقعه اقول لها تعالي قعدي يمي تقولي اووووه مابي ؟
انا وابوهم ضد مبدأ الطق الحين الي سويناه منعناهم من الاحتكاك مع عيال عمتهم بس بيني وبينكم مانقدر اكثر اخاف انها تزعل قلتله خل نكلمها عن عيالها يقول خوفج تتزعل علينا
اول مره بحياتي اشوف عيالي جذيه خمه اخوي يقولي هديني عليهم اكفخهم لج بس بصراحه ماحب جذيه اخاف على المدى البعيد يكون له آثار موزينه
صايرين مليغين ويبطون الجبد وقليلين ادب اول شحليلهم يمه ممكن يبه لو سمحت الحين لا العكس وصوتهم عالي ! بنتي صارت من تبجي تتسدح عالقاع وتتمغط وصراخها الي براس العاير يسمعها والله ذاك اليوم بغيت اشوتها الزقها بالطوفه بس تعوذت من ابليس !!
شالحل خواتي ساعدوني شلون اتصرف ؟ شلون اقدر اسيطر على الوضع ؟
بس انتي عارفه السبب من اعيال عمتهم صح……..
خلاص وقفي روحاتهم أو خففيها تدريجيا الي ان تنقطع بالمره
ولا تحاتين زعل حماتج اسمحيلي بس بالطقاق اهم ما عليج عيالج باجر تتأذين معاهم والسبه طوالة اللسان
وادعيلهم ربي يهديهم حسافه عقب ما كانوا ذربين تغيروا لا حول ولا قوة الا بالله
زين انا اقولج شي يحر اكثر من الطق العقااااااب وانج تحرجينهم يعني اذا عنده بليستيشن ويحبها شيليها وقوليله لانك سويت جذيه وجذيه وحرميهم من طلعه يحبونها وروحي بروحج ودقي حريهم والله يتوبون
والبنت عاقبيها انها تقعد بروحها بالدار جربي وانشالله بيرجعون نفس اول
أنا أبي حل بعد
من تصير الزواره مع عيال عماتهم وعمامهم ألا لازم جم كلمه يديده قذره متعلمينها
والله صرت أكره هاليوم والسبب هاليهال
احنا أمي أول كانت تهددنا اذا جذبنا أو قلنا كلمة مو حلوة أو نقلنا حجي انها بتفرك السانا بالفلفل و صراحة سوتها معاي مرة وحدة و عقبها توووووووووبة ,,, بس ما أدري جيلنا غير جيل ألحين ,, خوفج أهم يسوونها فيج ههههههه .. بس ما أقول الا الله يعينا عليهم و يهديهم و يصلح حالهم .