هل طبقوا القرار الجديد الخاص بالطبيات ؟

السلام عليكم
ومبارك عليكم الشهر …

السؤال واضح وصريح :d

اللي من فضلكم عندها الجواب تقول لنا

مدري

بس شكلج مقطعه الغياب سنينج الى فاتت

وعليكم السلام شنو القرار الجديد مال الطبيات؟

شنو القرار اليديد بالضبط
أنا اللي أعرفه أن الوزير متشدد علي الغياب لمنتسبي وزارة التربيه

السلام عليكم ورحمة الله وبركاته

هلا يقولون انه في قرار اللي يزيد غيابه عن 15 يوم ما ياخذ امتياز
ويقصون من راتبه حسب ايام معينه بالتدريج …
مدري عاد طبقوه ولا لأ
لأني ناوية على نية شينة
غبت السنة اللي فاتت ما عطوني ضعيف … علشان لا يحولوني ادارية
وهالسنة الظاهر بسوي نفس السنة اللي فاتت
لأنهم لما اراجعهم وصار لي فوق السنة رايحة رادة من مجلس طبي ومن لجنة للثانية واخلص التقرير من شهر 6 يستهبلون ما يدرون عن شي والملفات ضايعة تصورا يقولون لي اثبتي لنا انش تشتغلين بهالمدرسة
اجل وين كنت اشتغل كل هالسنين وينزل راتب واجازات وخصومات وقرارات على اي أساس
والحين انا ابي احول ولا اقعد اثبت شي موجود

كله كوم والمجلس الطبي كوم ثاني من شهر 8 وانا احوس عندهم علشان موعد يخلصون لي فيه التقرير الحين يعطوني الموعد بعد شهر وانطر يا ….

لين يجيك الربيع وتفتك من هالوزارة هذا اذا ما طلع بالتقرير شي غلط مثل المرة اللي فاتت …

وزارة فاشلة وعيالنا بيطلعون فاشلين من وراها …
جايبين من برة مدرسات توهم متخرجات وفي منهم واااااااااايد تخصصهم مو تربية

لا وحاطينهم ابتدائي … ولا يعرفون يدرسون ولا شي

وانا وحدة منهم اداب ولا اعرف ادرس ولا شي

شوفا اذا ما حولت ادارية بصير ارهابية واغتال الوزير ومدير المنطقة وفراش مكتب الشئون الادارية واللي يبيع كاكاو تحت …

اي وبذبح الناظرة واخطف عيال الوكيلة … واحرق المختبرات واكسر الكمبيوترات كلها …

كيفي ارهابية …

حسبي الله عليهم جنننننننوني

السلام عليكم ورحمة الله وبركاته

ارسل ديوان الخدمة المدنية أمس الى وزارة الصحة المسودة النهائية للقرار المتعلق بنظام الاجازات المرضية الجديد، الذي يتضمن 12 مادة معدلة، لإعطاء الملاحظات قبل اقرار التعديلات، على ان يتم تطبيقها اعتبارا من أول سنة 2024 أو منذ صدور القرار.
وأبرز الجديد في القرار تحديد 60 يوما للاجازات المرضية من المراكز الصحية و120 يوما للمرضيات من المستشفيات والتي تتجاوز 7 أيام,
وبالنسبة الى المراكز الصحية تم توزيع الستين يوماً على أساس 15 يوما براتب و15 يوما بنصف راتب و15 يوما بربع راتب و15 يوما من دون راتب,
اما الاجازات الخاصة بالمستشفيات والتي تم تحديدها بـ120 يوما في السنة حداً أقصى، فتم توزيعها كالآتي: الـ30 يوما الأولى براتب ثم 30 يوما بنصف راتب وبعدها 30 يوما بربع راتب وأخيراً 30 يوماً من دون راتب، على ان تتجاوز الاجازة المرضية الواحدة سبعة أيام.
ويستحق الموظف اجازة مرضية براتب كامل في حال دخوله المستشفى أو في حال الأمراض المستعصية أو الاصابات اثناء العمل, وفي حال تجاوز الاجازات المرضية للموظف عدد الأيام المسموح بها، يعتبر كأنه انقطع عن العمل, واشترط القرار ان تكون كل المرضيات من المراكز المعتمدة للسكن ومطابقة للبطاقة المدنية.
وثمة اقتراحان لتطبيق القرار: اما مع بداية 2024 أو منذ صدوره واعتماده بالصورة النهائية، مع مراعاة ان كل الاجازات المرضية يجب ألا تكون متصلة في العام الواحد.

هلا فيــج ام جوري …

والله الوزارات ما ينعرف لها ..

أعرف بـنـات والله ما يداومـون ومعاشاتهم تمشــي ..
كلــهم محولين سكرتاريا لعضــو والعضــو طلع من المجلس وهم للحيــن ما يداومـون ومعاشات وترقيا ت وعلاوات وامتيازرات بـعد (الله يسلم الواسطـة بس)..

واااااي بمـــوت من القهــر مليــت ان سويتي العملية الارهابيــة أنا معاااااااااج

السلام عليكم ورحمة الله وبركاته

صرنا ثنتين

اللي تبي تدش معانا في الحزب تتفضل
التسجيل مجانا

لوووووووووووووووووووول ام جـــــوري …

تدريـن شنو امنيتــي ؟؟

انــي أصير وزيرة التربيـــــــــــــــــــة …

السلام عليكم ورحمة الله وبركاته

علشان اغتالش

ولا تبين تنسفين الوزارة

حددي اتجاهاتش الارهابية رجاءا ….

الغياب بوزارتنا بصراحه مصخررررره
في وحده معاي شفتها مره قبل سنتين اول ماتوظفت
شفتها اليوم وكانت بالشهر الخامس وقزرتها طبيات لمن ولدت خذت الوضع شهرين والامومه اربع شهور وبعدين مرافقة زوج
شرايكم ؟؟ والله الغياب لو شنو محد راح يتوب عنه …

موتنى ضحك ام جورى
كل هالغياب وماعطوج تقدير ضعيف والله عجزنا نفهم لهم
الي تحب مهنتها يعطونها ضيف والى تبي تنحاش مو راضين يحولونها
والله مافي غير الواسطه هي الي تنفع بعدين ليه مارفضتى التدريس دام
خريجه اداب انا الي اعرفه خريجات العلوم الاجتماعيه علم نفس اذا ماعجبهم
الوضع راجعوا الوزاره انهم مو قادرين يكملون بالتدريس فيسون لهم اختبار ومقابله عشان يغيرون وظفتها وانا معاكم بالحزب ههههههه حسبي الله عليهم

السلام عليكم ورحمة الله وبركاته

عسولة عمري الدنيا ماشية بالشقلوب
الصح غلط والغلط صح …

شكلي بدش عالناظرة واعطيها رشوة واقولها انتي حوليني ادارية

grey
انا الخبلة كنت اشتغل بالصحة
مدري طحت على راسي ذاك اليوم ولا احد مسوي لي عمل … قمت وطلبت نقل
على بالي بيعطوني دورة تدريس ومن هالسوالف واني بستانس لا وكنت حامل وقتها …
ما دروا عني

المهم
اللي تبي دعوة حلوة تشوف لي واسطة بدون مقابل يا في المنطقة التعليمية بالاحمدي يا في المجلس الطبي … اختاروا

ولها بوسة بسعابيلها من ود بنتي

وربي انا اللى أصلح إرهابيه

والله لأفجر راااااس النااااااااااظره اللى ما تفهم الشغل وتقعد تتفلس ساعه

ولا الوكيله اللى بس تحب تصااارخ تحسب خدم أبوهااااا

ولا المدرسااااات أهم وطبيااتهم

لوعوا جبدي كل يوم مسويه إشعار غياب ل15 وحده